ବାଲିଆପାଳ,୨୬।୧୨(ସ୍ବ.ପ୍ର)- ବର୍ତ୍ତମାନ ସମୟରେ ଯୁବକମାନେ କୃଷି ଭିତ୍ତିକ କାର୍ଯ୍ୟଠାରୁ ଦୂରେଇ ଯାଉଥିବାବେଳେ ବାଲେଶ୍ୱର ଜିଲା ବାଲିଆପାଳ ବ୍ଲକ କଙ୍କଡ଼ାପାଳ ଗ୍ରାମର ଯୁବକ ଅଶୋକ କୁମାର ବାରିକ ଏକ ଭିନ୍ନ ବ୍ୟତିକ୍ରମ। ରିଲାଏନ୍ସ ଫାଉଣ୍ଡେଶନ ପରିଚାଳିତ ଦେୟମୁକ୍ତ ଫୋନ ଯୋଗେ ସେ ବିଶେଷଜ୍ଞଙ୍କ ଠାରୁ ମାଛ ଚାଷ ସମ୍ପର୍କରେ ସୂଚନା ସଂଗ୍ରହ କରି ନିଜ ଜମିର ପୋଖରୀରେ ମାଛ ଚାଷ ଆରମ୍ଭ କରିଥିଲେ। ଆଧୁନିକ କୌଶଳ ଓ ପଦ୍ଧତି ଅନୁସରଣ କରି ସେ ଏହି ଚାଷ କାର୍ଯ୍ୟ କରି ଆଜି ଆତ୍ମନିର୍ଭରଶୀଳ ହୋଇ ପାରିଛନ୍ତି। ଯୁବକମାନେ ଚାକିରି ପଛରେ ନ ଗୋଡ଼ାଇ କୃଷି ଓ ଆନୁଷଙ୍ଗିକ କୃଷି କାର୍ଯ୍ୟ କଲେ ଏହା ଆତ୍ମନିର୍ଭରଶୀଳ ହେବାର ବାଟ ଦେଖାଇବ ବୋଲି ସେ କହିଛନ୍ତି।
ଅଶୋକ କହିଛନ୍ତି, ପରିବାରର ଆର୍ଥିକ ସ୍ଥିତି ଭଲ ନ ଥିବାରୁ ସେ ମାଟ୍ରିକ ପାଠପଢ଼ା ସାରିବା ପରେ ଆଉ ଅଧିକ ପଢି ପାରି ନ ଥିଲେ। ତାଙ୍କ ଉପରେ ପରିବାରର ଭରଣପୋଷଣ ଦାୟିତ୍ୱ ପଡ଼ିଥିଲା। ଏଭଳି ସ୍ଥିତିରେ ସେ କିଭଳି ପରିବାର ପ୍ରତିପୋଷଣ କରିବେ ଭାବି ଭାବି କିଛି ବାଟ ପାଇ ନ ଥିଲେ। ଶେଷରେ ବାହାର ରାଜ୍ୟକୁ ଯାଇ ଚାକିରି କରିିବାକୁ ନିଷ୍ପତ୍ତି ନେଇଥିଲେ। ଏହି ସମୟରେ ସେ ନିଜର ମନ ପରିବର୍ତ୍ତନ କରି ନିଜ ଜମିରେ ମାଛ ଚାଷ କରିବାକୁ ସ୍ଥିର କରିଥିଲେ। ଏହାପରେ ସେ ନିଜ ପୋଖରୀକୁ ମାଛଚାଷ ଉପଯୋଗୀ କରି ଏଥିରେ ଭାକୁଡ଼, ରୋହୀ ଓ ଅନ୍ୟ ପ୍ରକାରର ମାଛ ଚାଷ ଆରମ୍ଭ କରିିଥିଲେ। ରିଲାଏନ୍ସ ଫାଉଣ୍ଡେଶନର ଜିଲା ସଂଯୋଜକ ଦିଲୀପ ପ୍ରଧାନଙ୍କ ପ୍ରତ୍ୟକ୍ଷ ତତ୍ତ୍ୱାବଧାନ ଏବଂ କୃଷି ବିଶେଷଜ୍ଞଙ୍କ ପରାମର୍ଶରେ ସେ ଯାଆଁଳ ଛାଡ଼ିବା ସାଙ୍ଗକୁ ମାଛଙ୍କ ପାଇଁ ଖାଦ୍ୟ ଏବଂ ରୋଗ ନିରାକରଣ ସମ୍ପର୍କରେ ଜ୍ଞାନ ଆହରଣ କରି ଏଥିରେ ସଫଳତା ଲାଭ କରିଛନ୍ତି। ବର୍ତ୍ତମାନ ମାଛ ଚାଷରୁ ସେ ବାର୍ଷିକ ୮୦ ହଜାରରୁ ଅଧିକ ଟଙ୍କା ରୋଜଗାର କରି ପାରୁଛନ୍ତି। ଏଣୁ ଆଗକୁ ମାଛଚାଷର ସମ୍ପ୍ରସାରଣ କରିବାକୁ ସେ ଯୋଜନା କରିଥିବା କହିିଛନ୍ତି।
