ଝାରସୁଗୁଡା ଅଫିସ/ଲଖନପୁର,୧୨।୧୨(ଡି.ଏନ.ଏ): ଫେସ୍ବୁକରେ ଫେକ୍ ଆଇଡି ଖୋଲି ଜଣେ ବିବାହିତା ମହିଳାଙ୍କୁ ବ୍ଲାକମେଲିଂ କରିବା ଯୁବକଙ୍କୁ ମହଙ୍ଗା ପଡିଛି। ପୋଲିସ ବେଙ୍ଗାଲୁରୁରୁ ଗିରଫ କରି ଗୁରୁବାର କୋର୍ଟଚାଲାଣ କରିଛି। ସୂଚନାଯୋଗ୍ୟ, ଫେସ୍ବୁକରେ ଫେକ୍ ଆଇଡି ଖୋଲି ଜଣେ ଯୁବକ ଜଣେ ବିବାହିତା ମହିଳାଙ୍କୁ ପ୍ରେମକରି ବସିଥିଲେ। ପରେ ଉକ୍ତ ମହିଳାଙ୍କ ଅଶ୍ଳୀଳ ଫଟୋକୁ ନେଇ ତାଙ୍କୁ ବ୍ଲାକ୍ମେଲିଂ କରିଥିଲେ। ଯୁବକ ଜଣଙ୍କ ମହିଳାଙ୍କୁ ବିବାହ ପାଇଁ ପ୍ରସ୍ତାବ ଦେଇଥିଲେ। ସମ୍ପୃକ୍ତ ମହିଳା ଜଣଙ୍କ ଝାରସୁଗୁଡା ଜିଲା ବଡମାଲ ଥାନା ଅଞ୍ଚଳର ବୋଲି ଜଣାପଡିଛି। ସେ ବିବାହିତ, ତାଙ୍କର ୨ ସନ୍ତାନ ଅଛନ୍ତି ବୋଲି ଯୁବକଙ୍କ ସମ୍ପର୍କୀୟମାନେ ଜାଣି ବିବାହ ପ୍ରସ୍ତାବକୁ ବିରୋଧ କରିଥିଲେ। ଏ ସମ୍ପର୍କରେ ମହିଳାଙ୍କ ସ୍ବାମୀ ଜାଣିପାରି ବଡମାଲ ଥାନାରେ ଅଭିଯୋଗ କରିଥିଲେ। ପୋଲିସ ଏନେଇ ଏକ ମାମଲା ରୁଜୁ କରି ତଦନ୍ତ ଚଳାଇଛି। ଏଥିରେ ସମ୍ପୃକ୍ତ ଥିବା ଅଭିଯୁକ୍ତଙ୍କୁ ବଡମାଲ ପୋଲିସ ବେଙ୍ଗାଲୁରୁରୁ ଗିରଫ କରି କୋର୍ଟଚାଲାଣ କରିଛି। ଗିରଫ ଅଭିଯୁକ୍ତ ଜଣଙ୍କ ଢେଙ୍କାନାଳ ଫାଟାଲ ଗ୍ରାମର ସୌମ୍ୟଜିତ ସେଠୀ ଓରଫ ଦୀପୁ ବୋଲି ଜଣାପଡିଛି। ପୋଲିସ ଏନେଇ ଅଧିକ ତଦନ୍ତ ଚଳାଇଛି।
