ନୂଆଦିଲ୍ଲୀ,୧୯।୭: ସରକାରୀ ବାସଭବନ ନ ମିଳିବା ପର୍ଯ୍ୟନ୍ତ ଦିଲ୍ଲୀର ଓ୍ବେଷ୍ଟର୍ନ କୋର୍ଟରେ ନୂଆ ତିଆରି କରାଯାଇଥିବା ହଷ୍ଟେଲରେ ରହିଥିବା ୮୨ଏମ୍ପିଙ୍କ ପାଇଁ କଡ଼ା ନିର୍ଦ୍ଦେଶ ଜାରି କରାଯାଇଛି। ଏମ୍ପିମାନେ ନିଜ ରୁମ୍ରେ ଖାଦ୍ୟ ଖାଇପାରିବେନି କି ତିଆରି ମଧ୍ୟ କରିପାରିବେ ନାହିଁ ବୋଲି ହଷ୍ଟେଲରେ ଲାଗିଥିବା ନୋଟିସ୍ରେ ଉଲ୍ଲେଖ ରହିଛି। ଭୋକ ଲାଗିଲେ ସାଧାରଣ ଲୋକଙ୍କ ଭଳି ଓ୍ବେଷ୍ଟର୍ନ କୋର୍ଟର ଏନେକ୍ସି କ୍ୟାଣ୍ଟିନ୍ରେ ଖାଇବାକୁ ପଡ଼ିବ ବୋଲି ନିର୍ଦ୍ଦେଶ ଦିଆଯାଇଛି। ଯଦି କାହାର ସ୍ବାସ୍ଥ୍ୟ ଖରାପ୍ ଥାଏ କିମ୍ବା ବିଶେଷ ପରିସ୍ଥିତିରେ ହିଁ କ୍ୟାଣ୍ଟିନର କର୍ମଚାରୀ ରୁମ୍ ପର୍ଯ୍ୟନ୍ତ ଲଞ୍ଚ ଓ ଡିନର ପହଞ୍ଚାଇବେ ବୋଲି ଏନେକ୍ସି କର୍ତ୍ତୃପକ୍ଷ କହିଛନ୍ତି। ଏଥିସହ ରୁମ୍ରେ ଖାଦ୍ୟପେୟ ପହଞ୍ଚାଇବା ପାଇଁ ଏମ୍ପିମାନେ ଦାଦାଗିରି କଲେ ସେମାନଙ୍କ କଥା ନ ଶୁଣିବା ପାଇଁ କ୍ୟାଣ୍ଟିନ୍ ପରିଚାଳକଙ୍କୁ କୁହାଯାଇଛି। ଗତ ବର୍ଷ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏହି ହଷ୍ଟେଲକୁ ଉଦ୍ଘାଟନ କରିଥିଲେ। ଏଠାରେ ପ୍ରଥମଥର ପାଇଁ ନିର୍ବାଚିତ ହୋଇଥିବା ଏମ୍ପିମାନଙ୍କ ରହିବା ପାଇଁ ଅସ୍ଥାୟୀ ବ୍ୟବସ୍ଥା କରାଯାଇଥିଲା।
