ଢେଙ୍କାନାଳ ଅଫିସ, ୧।୨ – କପିଳାସ ଚିଡ଼ିଆଖାନା ପରିସରରେ ଥିବା ଏଲିଫ୍ୟାଣ୍ଟ ରେସ୍କ୍ୟୁ ସେଣ୍ଟରକୁ ଅଧିକ ବ୍ୟାପକ କରାଯିବ। ଅଗ୍ରାଧିକାର ଭିତ୍ତିରେ ଜୁ’ରେ ଥିବା ପ୍ରାଣୀଙ୍କ ପାଇଁ ଚିକିତ୍ସା ବ୍ୟବସ୍ଥା କରାଯିବ। ଉକ୍ତ କେନ୍ଦ୍ରରେ ହାତୀ ସମେତ ଅନ୍ୟ ବନ୍ୟପ୍ରାଣୀଙ୍କ ଚିକିତ୍ସା ପାଇଁ ତାଲିମପ୍ରାପ୍ତ ଚିକିତ୍ସକ ନିଯୁକ୍ତ ହେବେ ବୋଲି କହିଛନ୍ତି ରାଜ୍ୟ ବନ୍ୟପ୍ରାଣୀ ବିଭାଗର ଅତିରିକ୍ତ ପିସିସିଏଫ୍ ଶଶି ପଲ୍। ଦୁର୍ଘଟଣାରେ ହାତୀମୃତ୍ୟୁ ଘଟଣାର ସମୀକ୍ଷା କରିବାକୁ ଢେଙ୍କାନାଳ ଆସିଥିବାବେଳେ ଶୁକ୍ରବାର ଅପରାହ୍ନରେ ଅତିରିକ୍ତ ପିସିସିଏଫ୍, ଅନୁଗୋଳ ଆର୍ସିସିଏଫ୍ ଡ. ପ୍ରଦୀପରାଜ କରାତ୍ ଏବଂ ଡିଏଫ୍ଓ ବିମଳ ପ୍ରସନ୍ନ ଆଚାର୍ଯ୍ୟ ଚିଡ଼ିଆଖାନା ପରିଦର୍ଶନ କରିଛନ୍ତି। ଏହି ଅବସରରେ ଅଧିକାରୀମାନେ କେଜ୍ ଏବଂ ହାତୀ ରେସ୍କ୍ୟୁ ସେଣ୍ଟର ବୁଲି ଦେଖିଥିଲେ।
ରେସ୍କ୍ୟୁ ସେଣ୍ଟରରେ ରଖାଯାଇଥିବା ନରହନ୍ତା ଦନ୍ତାର ଗତିବିଧି ଅନୁଧ୍ୟାନ କରି ଅତିରିକ୍ତ ପିସିସିଏଫ୍ ସୂଚନା ଦେଇଛନ୍ତି ଯେ, ଉକ୍ତ ହାତୀର ସ୍ବାସ୍ଥ୍ୟାବସ୍ଥା ଭଲ ଅଛି। ସେ ଶାନ୍ତ ଅଛି। ଜନବସତିରେ ଲୋକଙ୍କ ପ୍ରତି ବିପଦ ସୃଷ୍ଟି କରୁଥିବା ପ୍ରାଣୀଙ୍କୁ ଧରିବା ନିୟମ ରହିଛି। ହାତୀଟି ଜନବସତି ଲାଗି ବିପଦ ସୃଷ୍ଟି କରିଥିଲା। ସ୍ବଭାବରେ ପରିବର୍ତ୍ତନ ଲାଗି ତାକୁ ଆଣି ରେସ୍କ୍ୟୁ ସେଣ୍ଟରରେ ରଖାଯାଇଛି। ରାଜ୍ୟରେ ୨୦୦୦ ହାତୀ ଅଛନ୍ତି। ସେଥିରୁ ମାତ୍ର ୨ଟି ଏପରି ହିଂସ୍ର ଆଚରଣ କରୁଥିବା ନଜରକୁ ଆସିଛି। ରେସ୍କ୍ୟୁ ସେଣ୍ଟରକୁ ଉନ୍ନତୀକରଣ କରାଗଲେ ସମସ୍ୟା ରହିବ ନାହିଁ। ଚିଡ଼ିଆଖାନାରେ ଆନୁଷଙ୍ଗିକ ବ୍ୟବସ୍ଥା କରାଯାଇପାରିଲେ ଧଳା ଓ କଳା ବାଘ ଅଣାଯିବା ବ୍ୟବସ୍ଥା କରାଯିବ ବୋଲି ଅତିରିକ୍ତ ପିସିସିଏଫ୍ ସୂଚନା ଦେଇଛନ୍ତି। ଏହି ଗସ୍ତ ସମୟରେ କପିଳାସ ରେଞ୍ଜର ଦର୍ଶନିଆ ଭୋଇଙ୍କ ସମେତ ବନ କର୍ମଚାରୀ ଉପସ୍ଥିତ ଥିଲେ। ଏଥିପୂର୍ବରୁ ଅତିରିକ୍ତ ପିସିସିଏଫ୍ ସପ୍ତଶଯ୍ୟାରେ ଥିବା ଇକୋ ଟୁରିଜମ୍ ପରିଦର୍ଶନ କରିଥିଲେ।
