ଅନୁଗୋଳ ଅଫିସ, ୧୫।୧୨
ବିଳମ୍ବରେ ଚେତିଛି ଅନୁଗୋଳ ପୌରପାଳିକା। ସହରର ଗଳି କନ୍ଦିରେ ଲାଗିଥିବା ବେଆଇନ ପୋଷ୍ଟର ଓ ହୋର୍ଡିଂ କାଟିବା କାର୍ଯ୍ୟ ଶନିବାର ପୌରସଂସ୍ଥା ପକ୍ଷରୁ ଆରମ୍ଭ କରାଯାଇଛି। ଏପରି ଅଭିଯାନ ଆଗକୁ ଜାରି ରହିବ ବୋଲି ପୌର କର୍ତ୍ତୃପକ୍ଷଙ୍କ ପକ୍ଷରୁ କୁହାଯାଇଛି। ତେବେ ହୋର୍ଡିଂ କାଟିବା ସମୟରେ ଏହାକୁ ଲଗାଇବା ଦାୟିତ୍ୱରେ ଥିବା ଠିକାସଂସ୍ଥା ସହ କିଛି ସମୟ ପାଇଁ ତୁ ତୁ ମେ ମେ ହୋଇଥିଲା। ତଥାପି ପୌର କର୍ତ୍ତୃପକ୍ଷ ଉକ୍ତ ଠିକା ସଂସ୍ଥାକୁ ତାଗିଦ୍ କରିଥିବା ଜଣାପଡ଼ିଛି।
ଅନୁଗୋଳ ପୌରପାଳିକାରେ ହୋଡିଂ ଓ ରାସ୍ତା ମଝିରେ ଥିବା ଷ୍ଟ୍ରିଟ ଲାଇଟ୍ ଖୁଣ୍ଟରେ ବିଜ୍ଞାପନ ଲଗାଇବାକୁ ଟେଣ୍ଡର ପ୍ରଦାନ କରାଯାଇଛି। ପୌରପାଳିକାର ୫୪ ସ୍ଥାନରେ ମୋଟ୍ ୧୨ ହଜାର ୫ଶହ ବର୍ଗ ଫୁଟରେ ହୋର୍ଡିଂ ଲଗାଇବାକୁ ଅନୁମତି ପ୍ରଦାନ କରାଯାଇଛି। ଏଥିସହ ୧୭୦ଟି ଷ୍ଟ୍ରିଟ ଲାଇଟ୍ ଖୁଣ୍ଟରେ ମଧ୍ୟ ବିଜ୍ଞାପନ ଲଗାଇବାକୁ ପୌରପାଳିକା ପକ୍ଷରୁ ଅନୁମତି ପ୍ରଦାନ କରାଯାଇଛି। ଏ ନେଇ ବାର୍ଷିକ ୯ଲକ୍ଷ ୭୪ ହଜାର ଟଙ୍କାରେ ଟେଣ୍ଡର ପ୍ରଦାନ କରାଯାଇଛି। କିନ୍ତୁ ଏହି ସ୍ଥାନ ଗୁଡ଼ିକ ବ୍ୟତୀତ ଉକ୍ତ ଠିକା ସଂସ୍ଥା ଓ କିଛି ଘରୋଇ ସଂସ୍ଥା ସହରର ବିଭିନ୍ନ ସ୍ଥାନରେ ହୋର୍ଡିଂ ଲଗାଇଥିଲେ। ଏ ନେଇ ଅଭିଯୋଗ ଆସିବା ପରେ ଉଚ୍ଛେଦ କରିବାକୁ ପୌର ନିର୍ବାହୀ ଅଧିକାରୀ ବିନୋଦ ଚନ୍ଦ୍ର ପଣ୍ଡା ଓ ଚିତ୍ତରଞ୍ଜନ ପଧାନଙ୍କ ସହ ଅନ୍ୟ ବରିଷ୍ଠ ଅଧିକାରୀମାନେ ଶନିବାର ସକାଳୁ କାର୍ଯ୍ୟ ଆରମ୍ଭ କରିଥିଲେ। ସହରର ଥାନା ଛକ, ବ୍ଲକ ସମ୍ମୁଖ, ବୁଢ଼ୀ ଠାକୁରାଣୀ ଛକ, ଅନୁଗୋଳ ହାଇସ୍କୁଲ ସମ୍ମୁଖରେ ହୋର୍ଡିଂ କାଟିଥିଲେ। ଏହି ସମୟରେ ଟେଣ୍ଡର ନେଇଥିବା ସଂସ୍ଥା ପକ୍ଷରୁ ବିରୋଧ କରାଯାଇଥିଲା। ତେବେ ବେଆଇନ୍ ଭାବେ ହୋର୍ଡିଂ ଲଗାଯାଇଥିବାରୁ କଟାଯାଉଥିବା ନିର୍ବାହୀ ଅଧିକାରୀ ପଣ୍ଡା ଟେଣ୍ଡର ନେଇଥିବା ସଂସ୍ଥାକୁ କହିଥିଲେ।
ଏ ନେଇ ନିର୍ବାହୀ ଅଧିକାରୀ ପଣ୍ଡା କହିଛନ୍ତି, ବେଆଇନ୍ ହୋର୍ଡିଂ କଟାଯିବା ଅଭିଯାନ ଆରମ୍ଭ ହୋଇଛି। ସହରର ଯେଉଁ ସ୍ଥାନିଗୁଡ଼ିକ ହୋର୍ଡିଂ ପାଇଁ ଚିହ୍ନଟ କରାଯାଇଛି, ସେଠାରେ ହୋର୍ଡିଂ ଲଗାଯିବ। ଯେଉଁଗୁଡ଼ିକ ଚିହ୍ନଟ ହୋଇନାହିଁ ସେଠାରେ ହୋର୍ଡିଂ ଲାଗିଲେ କଟାଯିବା ସହ ଜରିମାନା ଆଦାୟ ହେବ ବୋଲି ପଣ୍ଡା ପ୍ରକାଶ କରିଛନ୍ତି।
