ଭୁବନେଶ୍ୱର, ୨ା୬(ବ୍ୟୁରୋ)-ଗୁଜରାଟର ସୁରଟରେ କୋଚିଂ ସେଣ୍ଟର ଅଗ୍ନିକାଣ୍ଡ ପରେ ଏବେ ଓଡ଼ିଶା ଅଗ୍ନିଶମ ବିଭାଗ ତତ୍ପର ହୋଇଉଠିଛି। ଗୃହ ବିଭାଗର ନିର୍ଦ୍ଦେଶ ପରେ ରାଜ୍ୟରେ ଥିବା ବିଭିନ୍ନ କୋଚିଂ ସେଣ୍ଟରରେ ଚଢାଉ ଆରମ୍ଭ ହୋଇଛି। ଶନିବାର ରାଉରକେଲାରେ ୧୩ଟି, ବାଲେଶ୍ୱର, ସମ୍ବଲପୁର ଓ ବ୍ରହ୍ମପୁରରେ ୧୦ଟି ଲେଖାଏ କୋଚିଂ ସେଣ୍ଟରରେ ଚଢାଉ କରାଯାଇ ଅଗ୍ନି ନିରାପତ୍ତା ଯାଞ୍ଚ କରାଯାଇଥିଲା। ହେଲେ କୌଣସି କୋଚିଂ ସେଣ୍ଟରରେ ସମ୍ପୂର୍ଣ୍ଣ ଆଗ୍ନି ନିରୋଧକ ଓ ନିରାପତ୍ତା ବ୍ୟବସ୍ଥା ନ ଥିଲା। ସବୁଠି ବିପଜ୍ଜନକ ସ୍ଥିତି ଦେଖିବାକୁ ମିଳିଥିଲା।
ଅଧିକାଂଶ କୋଚିଂ ସେଣ୍ଟରରେ ଅଗ୍ନି ନିରାପତ୍ତା ବ୍ୟବସ୍ଥା ନ ଥିବାବେଳେ କେତେକ ହାତଗଣତି ପ୍ରତିଷ୍ଠାନରେ ଫାୟାର ଏଷ୍ଟିଂଗୁଇସର କେବଳ କାନ୍ଥରେ ଝୁଲାଇ ରଖାଯାଇଥିଲା। ତାହାର ବ୍ୟବହାର ବି କାହାକୁ ଜଣା ନ ଥିଲା। ଏପରି କି ଅନେକ କୋଚିଂ ସେଣ୍ଟରରେ ଥିବା ବିଦ୍ୟୁତ୍ ମେନ୍ ସୁଇଚ୍ ନିକଟରେ କାଗଜ, କାଟୁନ, କାଠ ଓ ପ୍ଲାଷ୍ଟିକ୍ ଆଦି ଦହନଶୀଳ ପ୍ରଦାର୍ଥ ଜମା ହୋଇ ରହିଥିଲା। ସେହିପରି ଛାତ ଉପରେ ପାଣି ଟାଙ୍କି ରଖିବା, ବାଲି ଭର୍ତ୍ତି ବାଲ୍ତି ରଖିବା, କୋଚିଂ ସେଣ୍ଟର ଚାରିପଟେ ଅଗ୍ନିଶମ ଗାଡି ଯିବା ପାଇଁ ସ୍ଥାନ ଛାଡିବା, ଘରର ମୁଖ୍ୟ ଦ୍ୱାରକୁ ବଡ଼ ରଖିବା ଓ ଜରୁରୀ କାଳୀନ ବାଟ ସଂକ୍ରାନ୍ତରେ ସୂଚନା ଫଳକ ଲଗାଇବାର ନିୟମ ରହିଛି। କିନ୍ତୁ ଏକାଧିକ କୋଚିଂ ସେଣ୍ଟରର ଏସବୁ ଅଗ୍ନି ନିରାପତ୍ତା ବ୍ୟବସ୍ଥା ନ ଥିଲା। ସବୁଠୁ ବଡ଼କଥା ହେଲା ଅନେକ କୋଚିଂ ସେଣ୍ଟରରେ ଫାୟାର ଆଲାର୍ମ ନ ଥିବା ଦେଖିବାକୁ ମିଳିଥିଲା। ସେହିପରି ବହୁ ସ୍ଥାନରେ ଶିଡି, ଅଗଣା ଓ ଯିବାଆସିବା ରାସ୍ତା ଅବରୋଧ ଅବସ୍ଥାରେ ରହିଥିଲା। ଅଗ୍ନି ନିରାପତ୍ତା ପାଇଁ ମୁଖ୍ୟ ଭୂମିକା ଗ୍ରହଣ କରୁଥିବା ଉତ୍ତମ ଗୃହ ପରିଚାଳନା ଯାଞ୍ଚ ସମୟରେ ଦେଖିବାକୁ ମିଳି ନ ଥିଲା। ଏପରିସ୍ଥଳେ ବିଦ୍ୟୁତ୍ ଶର୍ଟସର୍କିଟ କିମ୍ବା ଅନ୍ୟ କୌଣସି କାରଣରୁ ନିଆଁ ଲାଗିଲେ କୋଚିଂ ସେଣ୍ଟର ଓ ପିଲାଙ୍କ ଜୀବନ ପ୍ରତି ବିପଦ ଆଶଙ୍କା ରହିଥିବା ଅଗ୍ନିଶମ ଅଧିକାରୀ ଓ କର୍ମଚାରୀମାନେ ଅନୁଭବ କରିଥିଲେ। ତେଣୁ ପ୍ରାଥମିକତା ଦୃଷ୍ଟିରୁ ସେମାନେ କୋଚିଂ ସେଣ୍ଟରର କର୍ମଚାରୀ ଏବଂ ଛାତ୍ରୀଛାତ୍ରଙ୍କୁ ନିଅଁା ଲିଭାଇବା କୌଶଳ ଶିଖାଇଥିଲେ। ଏପରି କି ଉଚ୍ଚ ଅଟ୍ଟାଳିକାରେ ପାଠପଢା ଚାଲିଥିବାବେଳେ ନିଅଁା ଲାଗିଲେ କିଭଳି ନିଜ ଜୀବନ ବଞ୍ଚାଇବା ସହ ଅନ୍ୟର ଜୀବନ ବଞ୍ଚାଇ ହେବ ସେନେଇ ମଧ୍ୟ କେତେକ ସ୍ଥାନରେ ମକ୍ଡ୍ରିଲ୍ ମାଧ୍ୟମରେ ଶିକ୍ଷା ଦିଆଯାଇଥିଲା।
ଏନେଇ ଅଗ୍ନିଶମ ଡିଜି ବି.କେ ଶର୍ମା କୁହନ୍ତି, ଯେଉଁସବୁ କୋଚିଂ ସେଣ୍ଟରରେ ଅଗ୍ନି ନିରାପିତ୍ତା ବ୍ୟବସ୍ଥା ନାହିଁ ଉକ୍ତ ସେଣ୍ଟରଗୁଡିକୁ ନୋଟିସ କରାଯିବ। ସେମାନଙ୍କୁ ୩ ସପ୍ତାହ ସମୟ ଦିଆଯିବ। ନିର୍ଦ୍ଧାରିତ ସମୟ ପରେ ପୁଣି ଉକ୍ତ କୋଚିଂ ସେଣ୍ଟରରେ ଚଢାଉ କରାଯାଇ ପୁନର୍ବାର ଯାଞ୍ଚ କରାଯିବ। ନିୟମ ପାଳନ କରାଯାଇ ନ ଥିଲେ ଊକ୍ତ କୋଚିଂ ସେଣ୍ଟର ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଆଗାମୀ ଦିନରେ ବିଭିନ୍ନ ସହରରେ ଥିବା କୋଚିଂ ସେଣ୍ଟରଗୁଡିକରେ ଚଢ଼ାଉ କରାଯାଇ ଯାଞ୍ଚ କରାଯିବ ବୋଲି ଶର୍ମା କହିଛନ୍ତି।
ସୂଚନାଯୋଗ୍ୟ, ଗତ ୨୭ ତାରିଖରେ ଭୁବନେଶ୍ୱରରେ ୧୫ଟି କୋଚିଂ ସେଣ୍ଟର ଓ କଟକରେ ୯ଟି କୋଚିଂ ସେଣ୍ଟର ଯାଞ୍ଚ କରାଯାଇଥିଲା। ଏକାଧିକ କୋଚିଂ ସେଣ୍ଟରରେ ଅଗ୍ନି ନିରାପତ୍ତା ବ୍ୟବସ୍ଥା ନ ଥିବା ଦେଖିବା ପରେ ଏଥିପାଇଁ ୩ ସପ୍ତାହ ସମୟ ଦିଆଯାଇଛି।
