ଗାନ୍ଧିନଗର,୧୦।୯: ଗୁଜରାଟର ବନସକାଣ୍ଠା ଜିଲାରେ ଘଟିଛି ଏକ ଆଶ୍ଚର୍ଯ୍ୟ କରିବା ଭଳି ଘଟଣା। ଏଠାରେ ଥିବା ପାଲନପୁରରେ ଜଣେ ଯୁବକ ୪ ମହଲା ଘରୁ ଡେଇଁ ଆତ୍ମହତ୍ୟା ଉଦ୍ୟମ କରିବାର ଏକ ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ସୂଚନା ମୁତାବକ, ବାସଣା ଗାଁ ବାସିନ୍ଦା ରାହୁଲ ବାଲ୍ମିକିଙ୍କର ବିବାହ ସ୍ଥିର ହୋଇଥିଲା। ହେଲେ ଶେଷରେ କନ୍ୟା ଏହି ବିବାହରେ ରାଜି ହୋଇ ନ ଥିଲେ। ଆଉ ଏହା ଜାଣିବା ପରେ ରାହୁଲ ଦୁଃଖରେ ଭାଙ୍ଗି ପଡିବା ସହ ଆତ୍ମହତ୍ୟା କରିବାକୁ ନିଷ୍ପତ୍ତି ନେଇଥିଲେ। ଏହା ଜଣାପଡିବା ପରେ ସ୍ଥାନୀୟ ଲୋକେ ତାଙ୍କୁ ବହୁ ବୁଝାସୁଝା କରିଥିଲେ। ହେଲେ ସେ କିଛି ଶୁଣି ନ ଥିଲେ । ଇତିମଧ୍ୟରେ ପୋଲିସକୁ ଖବର ଦିଆଯାଇଥିବା ବେଳେ ପୋଲିସ ଘଟଣାକୁ ଗୁରୁତ୍ୱ ଦେଇ ରାହୁଲ ଚଢିଥିବା ୪ ମହଲା ତଳେ ବଡ ଚାଦର ଲଗାଇ ତାଙ୍କୁ ବଞ୍ଚାଇବାକୁ ଚେଷ୍ଟା କରିଥିଲେ। ଏହାପରେ କେତେଜଣ ପୋଲିସକର୍ମୀ ଛାତ ଉପରକୁ ଯାଇ ତାଙ୍କୁ ଫେରାଇ ଆଣିବାକୁ ଚେଷ୍ଟା କରିବା ସମୟରେ ସେ ତଳକୁ ଡେଇଁପଡିଥିଲେ। ହେଲେ ଚାଦର ବନ୍ଧା ଯାଇଥିବାରୁ ସେ ତା’ ଉପରେ ପଡିଥିଲେ। ସାମାନ୍ୟ ଆହତ ହୋଇଥିବା ରାହୁଲଙ୍କୁ ପୋଲିସ ଉଦ୍ଧାର କରି ତାଙ୍କ ମାତାପିତାଙ୍କ ଜିମା ଦେଇଥିବା ଜଣାପଡିଛି।
