ଭୁବନେଶ୍ୱର, ୭।୧(ବ୍ୟୁରୋ):ବିନା ହେଲ୍ମେଟ୍ରେ ରାଜଧାନୀରେ ବାଇକ୍ ରାଲି କରିଥିବା ଆଉ ୪୦ଜଣ ବିଜେଡି କର୍ମୀ ଜରିମାନା ଦେଇଛନ୍ତି। ସୋମବାର ଭୁବନେଶ୍ୱର-ମଧ୍ୟ ବିଧାୟକ ଅନନ୍ତ ନାରାୟଣ ଜେନାଙ୍କ ସହ ଏହି କର୍ମୀମାନେ ଏଜି ଛକସ୍ଥିତ ଟ୍ରାଫିକ ଥାନାରେ ପହଞ୍ଚତ୍ ଜରିମାନା ଅର୍ଥ ବାଦକୁ ପ୍ରତ୍ୟେକ ୧ହଜାର ଟଙ୍କା ଲେଖାଏ ମୋଟ ୪୦ହଜାର ଟଙ୍କା ଦାଖଲ କରିଛନ୍ତି। ଏମାନଙ୍କୁ ପୋଲିସ ପକ୍ଷରୁ ନୋଟିସ ହୋଇ ନ ଥିଲେ ମଧ୍ୟ ଟ୍ରାଫିକ ନିୟମ ଉଲ୍ଲଂଘନ କରିଥିବାରୁ ନିଜ ତରଫରୁ ଜରିମାନା ଦେଉଥିବା କହିଛନ୍ତି। ଏହାପୂର୍ବରୁ କମିଶନରେଟ ପୋଲିସ ପକ୍ଷରୁ ପ୍ରଥମ ପର୍ଯ୍ୟାୟରେ ଚିହ୍ନଟ ହୋଇଥିବା ୨୫ଜଣ ନିୟମ ଉଲ୍ଲଂଘନକାରୀ ବିଜେଡି କର୍ମୀଙ୍କ ନାମରେ ଚାଲାଣ କଟାଯାଇଥିଲା। ସେମାନେ ଏବାବଦ ଜରିମାନା ଦାଖଲ କରିଥିବା ଜଣାପଡ଼ିଛି।
ସୂଚନାଯୋଗ୍ୟ, ଡିସେମ୍ବର ୨୬ ବିଜେଡିର ପ୍ରତିଷ୍ଠା ଦିବସରେ ଦଳୀୟ କର୍ମୀମାନେ ବିନା ହେଲ୍ମେଟ୍ରେ ସହରରେ ବାଇକ୍ ରାଲି କରି ଟ୍ରାଫିକ ନିୟମ ଉଲ୍ଲଂଘନ କରିଥିଲେ। ଏହାକୁ ନେଇ ସୋସିଆଲ ମିଡିଆ ସମେତ ବିଭିନ୍ନ ମହଲରେ ତୀବ୍ର ପ୍ରତିକ୍ରିୟା ପ୍ରକାଶ ପାଇବା ସହ କାହିଁକି ନିୟମ ଉଲ୍ଲଂଘନକାରୀ ବିଜେଡି କର୍ମୀଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରା ନ ଯିବ ସେନେଇ କମିଶନରେଟ ପୋଲିସକୁ ପ୍ରଶ୍ନ ପ୍ରଚାରିଥିଲେ। କିଛି ଯୁବବର୍ଗ ଏନେଇ ପୋଲିସ କମିଶନର ସୁଧାଂଶୁ ଷଡ଼ଙ୍ଗୀ ଓ ଟ୍ରାଫିକ ଡିସିପି ସାଗରିକା ନାଥଙ୍କୁ ଟୁଇଟ୍ କରି ଜଣାଇଥିଲେ। ପ୍ରତିଶ୍ରୁତି ମୁତାବକ କମିଶନ ଷଡ଼ଙ୍ଗୀ ତୁରନ୍ତ କାର୍ଯ୍ୟାନୁଷ୍ଠାନ ସ୍ବରୂପ ପ୍ରଥମ ପର୍ଯ୍ୟାୟରେ ୨୫ଜଣଙ୍କ ନାଁରେ ଚାଲାଣ କଟାଯାଇଥିଲା। ଅନ୍ୟ ନିୟମ ଉଲ୍ଲଂଘନକାରୀଙ୍କୁ ଚିହ୍ନଟ ପ୍ରକ୍ରିୟା ଜାରି ରହିଥିବାବେଳେ ସେମାନଙ୍କ ମଧ୍ୟରେ ଛନକା ପଶିଥିଲା। ଏନେଇ ବିଧାୟକ ଜେନା କହିଛନ୍ତି, ନେତା ହୁଅନ୍ତୁ କି ଦଳୀୟ କର୍ମୀ ଅବା ସାଧାରଣ ଜନତା, ଆଇନ ସମସ୍ତଙ୍କ ପାଇଁ ସମାନ। ଦଳର ପ୍ରତିଷ୍ଠା ଦିବସରେ କର୍ମୀମାନେ ବିନା ହେଲ୍ମେଟ୍ରେ ବାଇକ୍ ରାଲି କରିଥିଲେ। ନିୟମ ଉଲ୍ଲଂଘନ କରିଥିବାରୁ ସେମାନେ ଆପଣାଛାଏଁ ଜରିମାନା ଦେଲେ ବୋଲି ସେ କହିଛନ୍ତି।
ସୂଚନାଯୋଗ୍ୟ, ପୂର୍ବରୁ ବାଲେଶ୍ୱରରେ ଏକ ନିର୍ଦ୍ଦିଷ୍ଟ ରାଜନୈତିକ ଦଳର ପ୍ରଚାରରେ କର୍ମୀମାନେ ହେଲ୍ମେଟ ନ ପିନ୍ଧି ବାଇକ୍ ରାଲି କରିଥିଲେ। ଏହାକୁ ନେଇ ଜାତୀୟ ମାନବିକ ଅଧିକାର କମିଶନ (ଏନ୍ଏଚ୍ଆର୍ସି) ପୋଲିସ ଡିଜିଙ୍କୁ ନୋଟିସ କରିଥିଲେ। ଏବେ ରାଜଧୀନରେ ବିଜେଡିର ପ୍ରତିଷ୍ଠା ଦିବସରେ ସମାନ ଘଟଣା ଘଟିବା ପରେ ପୋଲିସ କମିଶନର ତୁରନ୍ତ କାର୍ଯ୍ୟାନୁଷ୍ଠାନ ନେଇ ସୂଚନା ଦେଇଥିଲେ।
