ଦାରିଙ୍ଗବାଡ଼ି/ବ୍ରାହ୍ମଣୀଗାଁ,୨୧।୬(ଡି.ଏନ.ଏ.)- କନ୍ଧମାଳ ଜିଲା ଦୁର୍ଗମ ପଞ୍ଚାୟତ କାଟିଙ୍ଗିଅ ମହର୍ଷି ଦୟାନନ୍ଦ ଉଚ୍ଚ ବିଦ୍ୟାଳୟର ଜମିରେ ଗତ ୧୦ବର୍ଷ ହେଲା ଜବରଦଖଲ କରି ଜଣେ ବ୍ୟକ୍ତି ଘର କରି ରହିଛନ୍ତି। ଏନେଇ ଗ୍ରାମବାସୀ ବହୁବାର ପ୍ରଶାସନର ଦ୍ୱାରସ୍ଥ ହୋଇଥିଲେ ମଧ୍ୟ କିଛି ସୁଫଳ ମିଳୁନାହିଁ। ଫଳରେ ଶୁକ୍ରବାର କାଟିଙ୍ଗିଆ ବନ୍ଦ ସହ ପଞ୍ଚାୟତରେ ଥିବା ସ୍କୁଲ, ଅଙ୍ଗନଓ୍ବାଡି କେନ୍ଦ୍ର ଓ ସରକାରୀ କାର୍ଯ୍ୟାଳୟରେ ତାଲାପକାଇ ଦେଇଛନ୍ତି ଅଞ୍ଚଳବାସୀ। ଦାବି ପୂରଣ ନହେବା ପର୍ଯ୍ୟନ୍ତ ତାଲା ଖୋଲିବ ନାହିଁ ବୋଲି ଚେତାବନୀ ଦେଇଛନ୍ତି।
ସରକାରଙ୍କ ପକ୍ଷରୁ ଗ୍ରୀଷ୍ମ ଛୁଟି ପରେ ଶୁକ୍ରବାର ବିଦ୍ୟାଳୟ ଖୋଲିବାକୁ ଘୋଷଣା ହୋଇଥିଲା। କିନ୍ତୁ ଅଞ୍ଚଳର ଶତାଧିକ ଲୋକ ପଞ୍ଚାୟତରେ ଥିବା ୧୮ ବିଦ୍ୟାଳୟ, ୨୧ ଅଙ୍ଗନାୱାଡ଼କେନ୍ଦ୍ର ସହ ଉପସ୍ବାସ୍ଥ୍ୟକେନ୍ଦ୍ର, ରାଜସ୍ବ ନିରୀକ୍ଷକ, ପ୍ରାଣୀଧନ ନିରୀକ୍ଷକଙ୍କ କାର୍ଯ୍ୟାଳୟ ସମେତ ସମସ୍ତ ସରକାରୀ କାର୍ଯ୍ୟାଳୟରେ ତାଲା ପକାଇ ବିକ୍ଷୋଭ ପ୍ରଦର୍ଶନ କରିଥିଲେ। ଜବରଦଖଲ ଉଚ୍ଛେଦ ସହ ଜବରଦଖଲକାରୀଙ୍କ ଉପରେ ପ୍ରଶାସନ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରିଥିଲେ। ଦାବି ପୂରଣ ନହେବା ପର୍ଯ୍ୟନ୍ତ ସାଧାରଣ ବଣ୍ଟନ ସାମଗ୍ରୀ ଏବଂ ସରକାରୀ ଭତ୍ତାକୁ ଲୋକେ ଗ୍ରହଣ ନକରିବା ସହ ପଞ୍ଚାୟତ କାର୍ଯ୍ୟାଳୟକୁ ମଧ୍ୟ ଅନିର୍ଦ୍ଦିଷ୍ଟକାଳ ପର୍ଯ୍ୟନ୍ତ ବନ୍ଦ ରଖାଯିବାକୁ ଅଞ୍ଚଳବାସୀ ନିଷ୍ପତି ନେଇଛନ୍ତି। ଜବରଦଖଲ ନ ହଟିବା ପର୍ଯ୍ୟନ୍ତ ବିକ୍ଷୋଭ କରାଯିବା ସହ ଆଗାମୀଦିନରେ ଦାରିଙ୍ଗବାଡ଼ି ତହସିଲ ଅଫିସ ସମେତ ବ୍ଲକ କାର୍ଯ୍ୟାଳୟକୁ ଅଚଳ କରିଦିଆଯିବ ବୋଲି ଆଞ୍ଚଳିକ ମହର୍ଷୀ ଦୟାନନ୍ଦ ସୁରକ୍ଷା କମିଟି ସଭାପତି ତଥା କାଟିଙ୍ଗିଆ ସରପଞ୍ଚ କପିଳାଶ ମଲ୍ଲିକ, ସମ୍ପାଦକ ପ୍ରେମାନନ୍ଦ ବସ୍ତରାୟ ଚେତାବନୀ ଦେଇଛନ୍ତି। ବିକ୍ଷୋଭ ବେଳେ ତିଆରିଗାଁ ପ୍ରକଳ୍ପ ଉଚ୍ଚ ପ୍ରାଥମିକ ବିଦ୍ୟାଳୟ ଖୋଲିଥିବାରୁ ଭାରପ୍ରାପ୍ତ ପ୍ରଧାନ ଶିକ୍ଷକଙ୍କ ସହ ଆନ୍ଦୋଳନକାରୀ ଯୁକ୍ତିତର୍କ କରିଥିଲେ ଓ ପରେ ବିଦ୍ୟାଳୟରେ ତାଲା ପକାଇଥିଲେ।
ପ୍ରକାଶ ଯେ, ବିକ୍ଷୋଭକାରୀ ଜବର ଦଖଲଉଚ୍ଛେଦ ପାଇଁ କିଛିବର୍ଷ ହେଲା ପ୍ରଶାସନର ଦ୍ୱାରସ୍ଥ ହୋଇଥିଲେ ସୁଦ୍ଧା କୌଣସି ସୁଫଳ ମିଳୁନଥିବା ସୁରକ୍ଷା କମିଟି ଅଭିଯୋଗ କରିଛି। ଜବରଦଖଲ ଯୋଗୁ ଉକ୍ତ ବିଦ୍ୟାଳୟରେ ଉନ୍ନୟନମୂଳକ କାମ ହୋଇପାରୁନାହିଁ। ଚଳିତମାସ ୧୦ରେ ଅଞ୍ଚଳବାସୀ ଫୁଳବାଣୀ ଯାଇ ଜିଲାପାଳଙ୍କୁ ଫେରାଦ ହୋଇଥିଲେ ସୁଦ୍ଧା କୌଣସି ସୁଫଳ ନମିଳିବାରୁ ରାଜରାସ୍ତାକୁ ଓହ୍ଲାଇଲୁ ବୋଲି ବିକ୍ଷୋଭକାରୀମାନେ କହିଛନ୍ତି। ସେମାନେ ଏନେଇ କନ୍ଧମାଳ ଜିଲାପାଳଙ୍କ ସମେତ କନ୍ଧମାଳ ଏସପି, ବାଲିଗୁଡ଼ା ଉପଜିଲାପାଳ, ଜିଲା ଶିକ୍ଷା ଅଧିକାରୀ, ଦକ୍ଷିଣାଞ୍ଚ ରାଜସ୍ବ କମିଶନର, ସ୍ଥାନୀୟ ବିଧାୟକ. କନ୍ଧମାଳ ଏମପି, ମୁଖ୍ୟ ଶାସନ ସଚିବ, ତହସିଲଦାର ଏବଂ ବିଡିଓଙ୍କୁ ଲିଖିତ ଭାବେ ଜଣାଇଛନ୍ତି। ଘଟଣା ସ୍ଥଳରେ କୌଣସି ଅଧିକାରୀ କିମ୍ବା ପୋଲିସ ପହଞ୍ଚତ୍ ନଥିବା ଜଣାପଡିଛି।
