କଟକ ଅଫିସ,୧୯ା୧୨- ଆସନ୍ତା ରବିବାର ଦିନ ବାରବାଟୀରେ ହେବାକୁ ଥିବା ଭାରତ-ୱେଷ୍ଟଇଣ୍ଡିଜ ୩ୟ ଏକଦିବସୀୟ କ୍ରିକେଟ ମ୍ୟାଚ୍ ପାଇଁ ଉଭୟ ଦଳ ଗୁରୁବାର ମଧ୍ୟାହ୍ନରେ ଭୁବନେଶ୍ୱରରେ ପହଞ୍ଚିବେ। ଗୁରୁବାର ଦିନ ୧୨.୧୦ରୁ ୧.୧୦ ମଧ୍ୟରେ ଉଭୟ ଦଳ ଭୁବନେଶ୍ୱର ବିମାନବନ୍ଦରରେ ପହଞ୍ଚିବା ପରେ ସେମାନଙ୍କୁ ଭୁବନେଶ୍ୱରର ଏକ ତାରକା ହୋଟେଲକୁ ନିଆଯିବ। ଓଡ଼ିଶା କ୍ରିକେଟ ଆସୋସିଏଶନ(ଓସିଏ) ପକ୍ଷରୁ ଉଭୟ ଦଳକୁ ଭବ୍ୟ ସ୍ବାଗତ ସମ୍ବର୍ଦ୍ଧନା ଦେବା ନିମନ୍ତେ ବ୍ୟବସ୍ଥା କରାଯାଇଛି। ପରେ ଉଭୟ ଦଳ ପର୍ଯ୍ୟାୟକ୍ରମେ ଶୁକ୍ରବାର ଓ ଶନିବାର ଅଭ୍ୟାସ ପାଇଁ ବାରବାଟୀ ଷ୍ଟାଡିୟମ ଆସିବେ। ଅନ୍ୟପକ୍ଷରେ ଗୁରୁବାରଠାରୁ ଦୁଇ ଦିନ ଧରି ଉକ୍ତ ମ୍ୟାଚ୍ ନିମନ୍ତେ କାଉଣ୍ଟରରେ ଟିକେଟ ବିକ୍ରି ଆରମ୍ଭ ହେବ।
ଦର୍ଶକମାନଙ୍କ ନିମନ୍ତେ କାଉଣ୍ଟରରେ ମୋଟ୍ ୧୦,୦୩୯ଟି ଟିକେଟ ବିକ୍ରି ପାଇଁ ରଖାଯାଇଛି। ଏହା ମଧ୍ୟରେ ଗ୍ୟାଲେରି ନଂ-୧ର ୩୪୯୮ଟି ଟିକେଟ, ଗ୍ୟାଲେରି ନଂ-୨ର ୪୭୭ଟି ଟିକେଟ, ଗ୍ୟାଲେରି ନଂ-୩ର ୩୭୩୬ଟି ଟିକେଟ, ଗ୍ୟାଲେରି ନଂ-୪ର ୯୮୨ଟି ଟିକେଟ୍, ଗ୍ୟାଲେରି ନଂ-୬ର ୧୫ଟି ଟିକେଟ୍, ସ୍ପେସାଲ ଏନକ୍ଲୋଜରର ୧୧୮୦ଟି ଟିକେଟ୍, ନ୍ୟୁ ପ୍ୟାଭିଲିୟନର ୮୬ଟି ଟିକେଟ ଓ କର୍ପୋରେଟ ବକ୍ସର ୬୫ଟି ଟିକେଟ ରହିଛି। ମୋଟ ୧୨ଟି କାଉଣ୍ଟର ଦର୍ଶକମାନଙ୍କ ନିମନ୍ତେ ଖୋଲାଯିବ। ସମସ୍ତ ଗ୍ୟାଲେରି ଟିକେଟ କାଉଣ୍ଟର ୧ରୁ ୧୦ ମଧ୍ୟରେ ବିକ୍ରି କରାଯିବ। କାଉଣ୍ଟର ନଂ-୧୧ ଓ ୧୨ରେ ସ୍ପେସାଲ ଏନକ୍ଲୋଜର, ନ୍ୟୁ ପ୍ୟାଭିଲିୟନ ଓ କର୍ପୋରେଟ ବକ୍ସର ଟିକେଟ ମିଳିବ।
