ବନ୍ତ, ୬।୭(ଡି.ଏନ୍.ଏ.)- ଭଦ୍ରକ ଜିଲା ବନ୍ତ ବ୍ଲକର ଅଧିକାଂଶ ସ୍କୁଲରେ ରୋଷେଇ ଘର ନ ଥିବାବେଳେ ଆଉ କେତେକ ସ୍କୁଲରେ ଅଧାପନ୍ତରିଆ ଅବସ୍ଥାରେ ପଡ଼ିରହିଛି। ଫଳରେ ଛାତ୍ରୀଛାତ୍ରଙ୍କ ପାଇଁ ଖାଦ୍ୟ ପ୍ରସ୍ତୁତି ବାରଣ୍ଡାରେ ହେଉଥିବା ଦେଖାଯାଇଛି। ଏଭଳି ଅବ୍ୟବସ୍ଥା ନେଇ ଅସନ୍ତୋଷ ପ୍ରକାଶ ପାଇଛି। ତୁରନ୍ତ ଏହାର ସମାଧାନ କରାଯାଉ ବୋଲି ସାଧାରଣରେ ଦାବି କରାଯାଇଛି।
ପ୍ରକାଶ ଯେ, ବନ୍ତ ବ୍ଲକରେ ମୋଟ ୨୩୫ଟି ସ୍କୁଲକୁ ମଧ୍ୟାହ୍ନଭୋଜନ ଯୋଗାଇ ଦିଆଯାଉଥିବା ବେଳେ ସେଥିମଧ୍ୟରୁ ୧୭୯ ସ୍କୁଲରେ ରୋଷେଇ ଘର ଅଛି। ୫୬ ସ୍କୁଲରେ ରୋଷେଇ ଘର ନ ଥିବା ତଥ୍ୟ ସାମ୍ନାକୁ ଆସିଛି। ସେଥିମଧ୍ୟରୁ କେତେକ ସ୍କୁଲରେ ଆଦୌ ରୋଷେଇ ଘର ନ ଥିବାବେଳେ ଆଉ କେତେକ ସ୍କୁଲରେ ଗୃହ ନିର୍ମାଣ କରାଯାଇ ଅଧାରେ ଅଟକି ରହିଛି। ପଧାନପଡ଼ା ପଞ୍ଚାୟତ ଆଦିବାସୀ ସାହି ପ୍ରକଳ୍ପ ପ୍ରାଥମିକ ବିଦ୍ୟାଳୟରେ ରୋଷେଇ ଘର ନ ଥିବାରୁ ବାରଣ୍ଡାରେ ମଧ୍ୟାହ୍ନଭୋଜନ ପ୍ରସ୍ତୁତ କରାଯାଉଥିବା ଦେଖିବାକୁ ମିଳିଛି। ୨୦୦୮ ମସିହାରେ ଏଠାରେ ବିଦ୍ୟାଳୟ ପ୍ରତିଷ୍ଠା ହୋଇଥିବା ବେଳେ ପଧାନପଡ଼ା, ଆଦିବାସୀ ସାହି ଓ ନିମପଲ୍ଲୀ ଆଦି ଗ୍ରାମରୁ ଅନୁସୂଚିତ ଜାତି ଏବଂ ଜନଜାତି ସମ୍ପ୍ରଦାୟର ପିଲା ଅଧ୍ୟୟନ କରୁଛନ୍ତି। ଖୋଲାସ୍ଥାନରେ ରୋଷେଇ ହେଉଥିବାରୁ ଝଡ଼ ବର୍ଷା ସମୟରେ ନାନା ଅସୁବିଧା ହେଉଛି। ସେହିପରି ପାଚେରି ନ ଥିବାରୁ ବିଦ୍ୟାଳୟ ଅସୁରକ୍ଷିତ ହୋଇପଡ଼ିଛି। ଏହି ସମସ୍ୟା ସମ୍ପର୍କରେ ସ୍ଥାନୀୟ ଲୋକେ ପ୍ରଶାସନର ଦୃଷ୍ଟି ଆକର୍ଷଣ କରିଆସୁଥିଲେ ମଧ୍ୟ କୌଣସି ସୁଫଳ ମିଳୁ ନ ଥିବା ଅଭିଯୋଗ ହେଉଛି। ଏ ବିଷୟରେ ବ୍ଲକ ଶିକ୍ଷାଧିକାରୀ ବାସନ୍ତୀ କୁମାରୀ ମିଶ୍ରଙ୍କୁ ପଚାରିବାରୁ ଯେଉଁଠି ରୋଷେଇ ଘର ନାହିଁ, ସେସବୁ ସ୍କୁଲର ତାଲିକା ଡିପିସି ଅଫିସ୍କୁ ପଠାଯାଇଥିବା କହିଛନ୍ତି।
