କଟକରୋଡ୍,୧୨ା୫(ଡି.ଏନ୍.ଏ.) : ଫନୀ ବାତ୍ୟାରେ ବ୍ୟାପକ କ୍ଷତି ହୋଇଛି ରାଜଧାନୀରେ। ବିଭିନ୍ନ ଅଞ୍ଚଳର ବାସଗୃହ ଭାଙ୍ଗିବା ସହ ପାଣି ଓ ବିଦ୍ୟୁତ ସମସ୍ୟାରେ ଲୋକେ ଅତିଷ୍ଠ ହୋଇ ପଡୁଛନ୍ତି। ଯଦିଓ ଏଥିରେ କିଛି ସୁଧାର ଆସିଛି ତଥାପି ପୂରାମାତ୍ରାରେ ସମସ୍ୟା ଦୂର ହୋଇନାହିଁ। ଫନୀ ମୁହଁରୁ ବି ବାଦ୍ ପଡ଼ିନି ଲକ୍ଷ୍ମୀସାଗର ଥାନା ପୋଲିସ ବାରାକ । ବାତ୍ୟାରେ ବାରାକ୍ର ଆଜବେଷ୍ଟସ ଉଡ଼ିଯାଇଛି। ଫଳରେ କର୍ମଚାରୀମାନେ ନାନା ସମସ୍ୟାର ସମ୍ମୁଖୀନ ହେଉଛନ୍ତି। ଇତିମଧ୍ୟରେ ବାତ୍ୟାକୁ ୧୦ଦିନ ପୂରଣ ହୋଇଥିବାବେଳେ ବାରାକ ମରାମତି ଦିଗରେ ରାଜ୍ୟ ପୋଲିସ ଗୃହ ନିର୍ମାଣ ବିଭାଗ ଏ ଦିଗରେ କୌଣସି ଆନ୍ତରିକତା ପ୍ରକାଶ କରୁନାହିଁ। ଫଳରେ ଜଟିଳ ପରିସ୍ଥିତି ସୃଷ୍ଟି ହୋଇଛି। ବାତ୍ୟା ପରେ ଆଇନଶୃଙ୍ଖଳା ପରିସ୍ଥିତି, ରିଲିଫ ବଣ୍ଟନ କେନ୍ଦ୍ରରେ ଉପସ୍ଥିତ ରହୁଥିବା ପୋଲିସ କର୍ମଚାରୀଙ୍କ ପାଇଁ ସାମାନ୍ୟ ଶୌଚ ପାଇଁ ପାଣି ନ ମିଳିବା ବିଡ଼ମ୍ବନାର ବିଷୟ। ପାଣି ପାଇଁ ବାରଦୁଆର ଶୁଣ୍ଢିପିଣ୍ଡା ହେଉଥିବା ଜଣେ କନଷ୍ଟେବଳ ନାମ ଗୋପନ ରଖି ପ୍ରକାଶ କରିଛନ୍ତି। ଅନ୍ୟପକ୍ଷରେ ଥାନା ସମ୍ମୁଖରେ ଥିବା ନାମଫଳକଟି ମଧ୍ୟ ଉଡ଼ିଯାଇଛି। ସୂଚନାଥାଉ କି, ଏହି ପୋଲିସ ବାରାକରେ ୧୫ ଜଣ କନଷ୍ଟେବଳ ଏବଂ ୫ ଜଣ ଅଧିକାରୀ ରହୁଥିଲେ। ଘଟଣା ସମ୍ପର୍କରେ ଡିସିପି ଅନୁପ କୁମାର ସାହୁ କୁହନ୍ତି, ବାତ୍ୟାରେ କ୍ଷୟକ୍ଷତି ହୋଇଥିବା କେତେକ ବାରାକ ବାବଦରେ ଆକଳନ ଚାଲିଛି। ଖୁବ୍ଶୀଘ୍ର ସେଗୁଡ଼ିକର ମରାମତି କରାଯିବ।
