ବାଡ଼ିପାଙ୍ଗାବାସୀଙ୍କ ଭରସା ପରିତ୍ୟକ୍ତ କୂଅ
8:00 amJune 15, 2019 / 21

ତୁମୁଡ଼ିବନ୍ଧ,୧୫ା୬(ଡି.ଏନ୍‌.ଏ.)-ତୁମୁଡ଼ିବନ୍ଧ ବ୍ଲକ ଅଞ୍ଚଳରେ ଉତ୍କଟ ହେଉଛି ପାନୀୟ ଜଳ ସମସ୍ୟା। ଭୂପୃଷ୍ଠ ଜଳସ୍ତର କମିବା ସହ ନଦୀ ନାଳ ପୋଖରୀ ଶୁଖିଯାଇଛି। କୂଅର ଗୋଳିଆ ପାଣି ଉପରେ ଭରସା କରୁଛନ୍ତି ଲୋକେ। ଏପରି ସମସ୍ୟା ଦେଖିବାକୁ ମିଳିଛି କରୁକୁଡୁପା ପଞ୍ଚାୟତ ବାଡ଼ିପାଙ୍ଗା ଗ୍ରାମରେ। ଗ୍ରାମର ମହିଳା ଓ ପୁରୁଷ ଖୋଲାକୂଅର ଗୋଳିଆ ପାଣି ପିଉଛନ୍ତି। ବାଡ଼ିପାଙ୍ଗା ଗ୍ରାମରେ ୪୨ ପରିବାରର ପ୍ରାୟ ୩୦୦ ଲୋକ ବସବାସ କରନ୍ତି। ଗ୍ରାମରେ ୨ଟି ନଳକୂପ ଅଚଳ ହୋଇ ୨ବର୍ଷ ହେବ ପଡିରହିଛି। ତାହା ମରାମତି କଲେ ମଧ୍ୟ ଭଲ ପାଣି ବାହାରୁ ନାହିଁ। ଚୁଆକୁ ଭରସା କରିଥିବାବେଳେ ତାହା ମଧ୍ୟ ଶୁଖିଗଲାଣି। ଗାଁ ପାଖ ତମ୍ବାକେତାଠାରେ ୪୦ବର୍ଷ ପୂବେ ଖୋଳାଯାଇଥିବା ଏକ କୂଅ ଏବେ ଗ୍ରାମବାସୀଙ୍କ ଭରସା। ଉକ୍ତ ପରିତ୍ୟକ୍ତ କୂଅରୁ ଗ୍ରାମର ମହିଳାମାନେ ହାଣ୍ଡି ବାଲ୍‌ଟି ଧରି ପାଣି ସଂଗ୍ରହ କରୁଛନ୍ତି। ଗୋଳିଆ ପାଣି ବାହାରୁ ଥିବାରୁ ଘରକୁ ନେଇ କିଛି ସମୟ ରଖିବା ପରେ ଉକ୍ତ ପାଣିକୁ ପିଇବା ଓ ରୋଷେଇରେ ବ୍ୟବହାର କରୁଛନ୍ତି। ଏନେଇ ପୂର୍ବତନ ଓ୍ବାର୍ଡ ମେମ୍ବର ପ୍ରଜେନ୍ଦ୍ର ମାଝୀ କହିଛନ୍ତି ଯେ, ନୂତନ ଭାବେ ୨ଟି ନଳକୂପ ଖୋଳାଯାଇ ସୌରଚାଳିତ ପମ୍ପ ସଂଯୋଗ କରି ପାନୀୟ ଜଳର ବ୍ୟବସ୍ଥା କରାଯାଉ। ଏନେଇ ତୁମୁଡ଼ିବନ୍ଧ ଗୋଷ୍ଠୀ ଉନ୍ନୟନ ଅଧିକାରୀ ଜୟଦେବ ଦାସଙ୍କୁ ପଚାରିବାରୁ ସେ ତୁରନ୍ତ ଅଚଳ ହୋଇ ପଡ଼ିରହିଥିବା ନଳକୂପ ମରାମତି କରାଯିବା ସହ ପରିତ୍ୟକ୍ତ କୂଅର ପୁନରୁଦ୍ଧାର ବ୍ୟବସ୍ଥା କରାଯିବ ବୋଲି କହିଛନ୍ତି।