ହିଞ୍ଜିଳିକାଟୁ,୨୮।୯(ଡି.ଏନ୍.ଏ.): ଚଳିତବର୍ଷ ବିଭିନ୍ନ ସମୟରେ ପ୍ରବଳ ବର୍ଷା ହୋଇଥିବା ବେଳେ ନଦୀରେ ସଠିକ୍ ଭାବରେ ଜଳ ନିଷ୍କାସନ ହୋଇ ନ ପାରିବାରୁ ଗଞ୍ଜାମ ଜିଲା ହିଞ୍ଜିଳିକାଟୁ ବ୍ଲକର ବିଭିନ୍ନ ପଞ୍ଚାୟତରେ ବନ୍ୟା ପରିସ୍ଥିତି ସୃଷ୍ଟିହୋଇଛି। ହିଞ୍ଜିଳିକାଟୁ ବ୍ଲକର ଗଣ୍ଡଳା, ବେଲଗାଁ, ଧୋବାଡ଼ି, ସାହାପୁର, ପୁଟିଆପଦର, ନନ୍ଦିକ, ରାଳବ, ଶାସନଆମ୍ବଗାଁ, ଶିକିରି,ସାରୁ ସମେତ ହିଞ୍ଜିଳିକାଟୁ ମ୍ୟୁନିସ୍ପାଲିଟି ଅଞ୍ଚଳର ବ୍ୟାପକ ଚାଷଜମି ପ୍ରଭାବିତ ହୋଇଛି। ସେହିପରି ଚାଷଜମିକୁ ମାଫିଆମାନେ କବ୍ଜା କରି ପ୍ଲଟ କରିବା ସହ ବିଭିନ୍ନ ସ୍ଥାନରେ ଜଳ ବନ୍ଦ ନେଇ ଉଦ୍ବେଗ ପ୍ରକାଶ ପାଇଛି। ଅନ୍ୟପକ୍ଷରେ ପୂର୍ତ୍ତ ବିଭାଗ ଓ ଜଳସେଚନ ବିଭାଗ ପକ୍ଷରୁ ବର୍ଷାଜଳ ନିଷ୍କାସନ ପାଇଁ ମିଳିତ ଯୋଜନା କରାଯାଉ ନାହିଁ। କେନାଲ ନିର୍ମାଣ ବେଳେ ଏହା ସଙ୍କୁଚିତ ହେବାରୁ ଜଳ ନିଷ୍କାସନ ଠିକ୍ ଭାବରେ ହେଉନାହିଁ। ଏହି ଦୁଇ ବିଭାଗରେ ସମନ୍ବୟ ଅଭାବରୁ ନିର୍ମାଣ କରାଯାଉଥିବା ରାସ୍ତା ଓ କେନାଲ ସମସ୍ୟା ସୃଷ୍ଟି କରୁଛି ବୋଲି ବ୍ଲକ କଂଗେସ ପକ୍ଷରୁ ଅଭିଯୋଗ ହୋଇଛି। ହଞ୍ଜିଳି ବ୍ଲକ ସହ ପୁରୁଷୋତ୍ତମପୁର, କବିସୂର୍ଯ୍ୟନଗର, କୁକୁଡ଼ାଖଣ୍ଡି ପ୍ରଭୃତି ବ୍ଲକର ବିଭିନ୍ନ ଅଞ୍ଚଳରେ ବର୍ଷା ଜଳ ତାରାତାରିଣୀ ଛକ ନିକଟ ଦେଇ ଋଷିକୂଲ୍ୟାରେ ପ୍ରବେଶ କରୁଛି। ଫଳରେ ପାଣି ଜମି ରହି ଅଞ୍ଚଳର ଚାଷୀ କ୍ଷତିଗ୍ରସ୍ତ ହେଉଛନ୍ତି ବୋଲି କଂଗେସ ପକ୍ଷରୁ ଅଭିଯୋଗ ହୋଇଛି। ମୁଖ୍ୟମନ୍ତ୍ରୀ ତୁରନ୍ତ ଏହାର ସମାଧାନ ପନ୍ଥା ଗ୍ରହଣ ନ କଲେ କଂଗେସ ପକ୍ଷରୁ ଚାଷୀ ଆନ୍ଦୋଳନ କରାଯିବ ବୋଲି ବ୍ଲକ କଂଗେସ ସଭାପତି ପଦ୍ମ ଚରଣ ସାହୁ କହିଛନ୍ତି। ଏନେଇ ବିଭିନ୍ନ ଅଧିକାରୀଙ୍କ ନିକଟକୁ ଦାବିପତ୍ର ପ୍ରଦାନ କରାଯାଇଥିବା ସେ କହିଛନ୍ତି।
