ଶିଶୁକନ୍ୟାଙ୍କ ସୁରକ୍ଷା, ଭବିଷ୍ୟତ ସକାଶେ ରାଜ୍ୟ, କେନ୍ଦ୍ର ସରକାର ବହୁବିଧ ଯୋଜନା ହାତକୁ ନେଇଛନ୍ତି। ଏଥିପାଇଁ ସରକାର ବିଭିନ୍ନ ଆଇନ ମଧ୍ୟ ପ୍ରଣୟନ କରିଛନ୍ତି। ବର୍ଷର ବିଭିନ୍ନ ସମୟରେ ଚାଲିଛି ସଚେତନତା କାର୍ଯ୍ୟକ୍ରମ। ହେଲେ ସେଭଳି କିଛି ଆଶାନୁରୂପ ସୁଫଳ ମିଳୁନାହିଁ। ଗୋଟିଏ ପଟେ କିଛି ଲୋକଙ୍କ ମାନବିକତା ହଜିଯାଇଛି। ଆଉ କିଛି ମଣିଷଙ୍କ ବିକୃତ ମାନସିକତା ଯୋଗୁ ଶିଶୁକନ୍ୟାଟିଏ ଆଜି ଅନ୍ଧକାର ଭବିଷ୍ୟତ ନେଇ ଗତି କରୁଛି। ବରଗଡ଼ ଜିଲାରେ ଗତ କିଛିଦିନ ତଳେ ଘଟିଥିବା ୩ ଅଭାବନୀୟ ଘଟଣାରୁ ଏହା ସହଜରେ ଅନୁମେୟ। ଗତ ଡିସେମ୍ବର ମାସରେ ଜିଲାର ବିଭିନ୍ନ ସ୍ଥାନରୁ ୩ ନବଜାତ ଶିଶୁକନ୍ୟାଙ୍କୁ ଉଦ୍ଧାର କରାଯାଇଥିଲା। ଜିଲାର ପଦ୍ମପୁର ଅଞ୍ଚଳରେ ଏକ ଡ୍ରେନରୁ ଅଖାରେ ଭର୍ତ୍ତି ଶିଶୁକନ୍ୟା ଉଦ୍ଧାର କରାଯାଇଥିବା ବେଳେ ବରପାଲି ନିକଟ ରେଳଧାରଣା ପାଖରୁ ବ୍ୟାଗରୁ ଅନ୍ୟଜଣେ ଶିଶୁକନ୍ୟା ମିଳିଥିଲା। ସେହିପରି ଭଟଲି ଅଞ୍ଚଳର ଏକ ନାଳାରୁ ଆଉ ଏକ ଶିଶୁକନ୍ୟାକୁ ଉଦ୍ଧାର କରାଯାଇଥିଲା। ମାସକ ମଧ୍ୟରେ ୩ ଶିଶୁକନ୍ୟା ମା’ କୋଳ ବଦଳରେ ଡ୍ରେନ, ରେଳଧାରଣା ଏବଂ ନାଳା ଭିତରକୁ ଅଖା,ବ୍ୟାଗରେ ଭର୍ତ୍ତି ଅବସ୍ଥାରେ ମିଳିବା କେବଳ ଚିନ୍ତାଜନକ କିମ୍ବା ଆଲୋଡ଼ନର ବିଷୟ ନୁହେଁ, ଏଥିରୁ ସରକାରଙ୍କ ଶିଶୁ ସୁରକ୍ଷା, ଅଧିକାର ଆଇନ କିଭଳି ଫଳବତୀ ହୋଇଛି, ତାହା ସ୍ପଷ୍ଟ ହୋଇଛି। ଏତେ ସଚେତନତା ସତ୍ତ୍ବେ ଶିଶୁକନ୍ୟାକୁ ଜନ୍ମ ଦେଇଥିବା ମା, ବାପାଙ୍କ ମାନସିକତା କେଉଁସ୍ତରକୁ ପହଞ୍ଚି ସାରିଛି, ତାହା ଅନୁମେୟ। ତେବେ ଏଭଳି ସ୍ଥଳେ ଯେଉଁ ଶିଶୁକନ୍ୟା ସହୃଦୟ ଲୋକଙ୍କ ଦୃଷ୍ଟିରେ ପଡ଼ୁଛି, ସେ ନିଜ ମା, ବାପାଙ୍କ ପରିଚୟ ପାଇ ନ ପାରିଲେ ସୁଦ୍ଧା ଅନ୍ୟ କାହାକୋଳରେ ରହି ଦୁନିଆ ଦେଖି ପାରୁଛି। କିନ୍ତୁ ଯେଉଁଠି ସେଭଳି ଡ୍ରେନ, ନାଳା କିମ୍ବା ପରିତ୍ୟକ୍ତ ସ୍ଥାନରେ ପଡ଼ିଥିବା ଶିଶୁକନ୍ୟା ଲୋକଙ୍କ ଦୃଷ୍ଟି ଆଢୁଆଳେ ରହି ଯାଉଛନ୍ତି, ସେମାନଙ୍କ ଭବିଷ୍ୟତ ସେଠାରେ ହିଁ ଦୁନିଆ ଚିହ୍ନିବା ପୂର୍ବରୁ ସରିଯାଉଛି। ତେବେ ଆଶ୍ଚର୍ଯ୍ୟର ବିଷୟ, ଏଭଳି ଶିଶୁକନ୍ୟାଙ୍କୁ ଜନ୍ମ ପରେ ଫିଙ୍ଗା ଫୋପଡ଼ା କରିଥିବା ମା, ବାପାଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବା ତ ଦୂରର କଥା, ସେମାନଙ୍କୁ ଚିହ୍ନଟ କରିବାରେ ମଧ୍ୟ କେହି ସକ୍ଷମ ହେଉନାହାନ୍ତି। ଆଜିର ସମାଜରେ ଏପରି ମାନସିକତା ଏକ ଭୁଲ ଦିଗ ପ୍ରତି ଅଙ୍ଗୁଳି ନିର୍ଦ୍ଦେଶ କରୁଛି।
– ପ୍ରେମାନନ୍ଦ ଖମାରୀ
