ଭୁବନେଶ୍ୱର,୨୦ା୧(ବ୍ୟୁରୋ):ଲିଙ୍ଗରାଜ ଥାନା ଅନ୍ତର୍ଗତ ପୁରୁଣା ଭୁବନେଶ୍ୱର ଅଞ୍ଚଳରେ ରହୁଥିବା ଜଣେ ଯୁବକ ତାଙ୍କ ପ୍ରେମିକାଙ୍କୁ ଭିଡିଓ କଲ୍ କରି ଫ୍ୟାନରେ ଦଉଡ଼ି ଦେଇ ଆତ୍ମହତ୍ୟା କରିଛନ୍ତି। ସେ ହେଲେ ନୟାଗଡ଼ ଜିଲା ଖଣ୍ଡପଡ଼ା ଥାନା ଅଞ୍ଚଳର ସର୍ବେଶ୍ୱର ପରିଡ଼ା ଓରଫ ପିଙ୍କୁ (୧୯)। ବୁଧବାର ସାରେ ଏହି ଘଟଣା ଘଟିଥିବା ବେଳେ ଗୁରୁବାର କ୍ୟାପିଟାଲ ହସ୍ପିଟାଲରେ ବ୍ୟବଚ୍ଛେଦ ପରେ ମୃତଦେହକୁ ପୋଲିସ ପରିବାର ଲୋକଙ୍କୁ ହସ୍ତାନ୍ତର କରିଛି। ଏ ନେଇ ପୋଲିସ ଏକ ଅପମୃତ୍ୟୁ ମାମଲା (ନଂ. ୩/୨୦୨୩) ରୁଜୁ କରି ଘଟଣା ସମ୍ପର୍କରେ ପଚରାଉଚରା କରିବା ସହ ତଦନ୍ତ ଜାରି ରଖିଛି। ପ୍ରାଥମିକ ତଦନ୍ତରୁ ସର୍ବେଶ୍ୱର ଆତ୍ମହତ୍ୟା କରିଥିବା ଜଣାପଡ଼ିଥିବା ବେଳେ ଏନେଇ ସ୍ପଷ୍ଟ ହେବାକୁ ପୋଲିସ ବ୍ୟବଚ୍ଛେଦ ରିପୋର୍ଟକୁ ଅପେକ୍ଷା କରିଛି। ସର୍ବେଶ୍ୱର ଭିଡିଓ କଲ୍ କରି ଆତ୍ମହତ୍ୟା କରିଥିବା ସ୍ଥାନୀୟ ଲୋକେ କହୁଥିଲେ ମଧ୍ୟ ପୋଲିସ ଏନେଇ ସ୍ପଷ୍ଟ ହୋଇପାରିନାହିଁ। ସିଡିଆର୍ ରିପୋର୍ଟ ଏବଂ ଅନ୍ୟ ଦିଗକୁ ତଦନ୍ତ ହେବା ପରେ ଏନେଇ ସ୍ପଷ୍ଟ ସୂଚନା ମିଳିପାରିବ ବୋଲି ତଦନ୍ତକାରୀ ଅଧିକାରୀ କହିଛନ୍ତି।
ସ୍ଥାନୀୟ ବାସିନ୍ଦାଙ୍କ କହିବା ଅନୁଯାୟୀ, ସର୍ବେଶ୍ୱର କିଛି ମାସ ହେବ ପୁରୁଣା ଭୁବନେଶ୍ୱରରେ ଥିବା ଏକ ଗାଡ଼ି ସର୍ଭିସ୍ ସେଣ୍ଟରରେ କାମ କରୁଥିଲେ। ନିକଟରେ ରହୁଥିବା ଜଣେ ଯୁବତୀଙ୍କ ସହ ତାଙ୍କର ପ୍ରେମ ହୋଇଥିଲା। ତେବେ କିଛିଦିନ ହେବ ପ୍ରେମିକାଙ୍କ ସହ ତାଙ୍କର ବିଚ୍ଛେଦ ହୋଇଥିଲା। ଏପରିକି ପ୍ରେମିକାଙ୍କ ସହିତ ଅନ୍ୟ ଜଣେ ଯୁବକଙ୍କ ବିବାହ ସ୍ଥିର ହୋଇଯିବା ପରେ ସର୍ବେଶ୍ୱର ଭାଙ୍ଗିପଡ଼ିଥିଲେ। ବୁଧବାର ସେ କାମ ସାରି ସାରେ ଘରକୁ ଫେରିବା ପରେ ପ୍ରେମିକାଙ୍କୁ ଭିଡିଓ କଲ୍ କରି ଆତ୍ମହତ୍ୟା କରିବେ ବୋଲି କହିଥିଲେ। ଏନେଇ ଯୁବତୀ ଜଣଙ୍କ ତାଙ୍କ ରୁମ୍ ପାଖକୁ ଆସି ଘର ମାଲିକଙ୍କୁ ଜଣାଇଥିଲେ। ଘର ମାଲିକ ଓ ସ୍ଥାନୀୟ ଲୋକେ କବାଟ ତାଲା ଭାଙ୍ଗି ଦେଖିବାବେଳକୁ ସର୍ବେଶ୍ୱର ଆତ୍ମହତ୍ୟା କରିଥିଲେ। ଏନେଇ ସେମାନେ ପୋଲିସକୁ ଖବର ଦେବା ସହ ତାଙ୍କୁ ମେଡିିକାଲ ନେଇଯାଇଥିଲେ। ପରେ ପୋଲିସ ପହଞ୍ଚି ମୃତଦେହ ଜବତ କରିଥିଲା।
