ଦାରିଙ୍ଗବାଡି,୧୯ା୧୨(ଡି.ଏନ୍.ଏ.)-କନ୍ଧମାଳ ଜିଲାର ବିଭିନ୍ନ ବ୍ଲକରେ ପଞ୍ଚାୟତିରାଜ, ପାନୀୟଜଳ, ଗୃହ ନିର୍ମାଣ ଓ ନଗର ଉନ୍ନୟନ ମନ୍ତ୍ରୀ ପ୍ରତାପ ଜେନାଙ୍କ ଦ୍ୱାରା ବହୁ ପ୍ରକଳ୍ପ ଉଦ୍ଘାଟିତ ହୋଇଯାଇଛି। ବୁଧବାର ଦାରିଙ୍ଗବାଡି ବ୍ଲକ ପ୍ଲିହେରୀ ପଞ୍ଚାୟତର ୩୫ଲକ୍ଷ ଟଙ୍କା ବ୍ୟୟରେ ନିର୍ମିତ ନୂତନ କୋଠା ଉଦ୍ଘାଟନ କରିଥିଲେ। ସେଠାରେ ଆବଶ୍ୟକ ଭିତ୍ତିଭୂମି ପୂରଣ କରି ଏହାର ବିକାଶ କରିବାକୁ ଜନସାଧାରଣ ଦାବି କରିଥିଲେ। ଏଥିପାଇଁ ମନ୍ତ୍ରୀ ସ୍ଥାନୀୟ ବିଡିଓ ଭକ୍ତବନ୍ଧୁ ଜନାର୍ଦ୍ଦନ ଦଳେଇ ଏବଂ ପିଡି ବିଶ୍ୱନାଥ ବାରିକଙ୍କୁ ନିର୍ଦ୍ଦେଶ ଦେଇଛନ୍ତି। ଦାରିଙ୍ଗବାଡି ପଞ୍ଚାୟତ ସମିତି ଅଧୀନରେ ୨୫ ପଞ୍ଚାୟତ ରହିଥିବାବେଳେ ମାତ୍ର ୮ଜଣ ଯନ୍ତ୍ରୀ ରହିଛନ୍ତି। ତେଣୁ ଉନ୍ନୟନ କାର୍ଯ୍ୟରେ ବାଧା ସୃଷ୍ଟି ହେଉଥିବା ଅଭିଯୋଗରେ ଶୀଘ୍ର ପଦକ୍ଷେପ ନେବେ ବୋଲି କହିଥିଲେ। ପରେ ବାଡାବାଙ୍ଗା ପଞ୍ଚାୟତ ସିକକେତାକୁ ପାଇପ ଯୋଗେ ଜଳ ଯୋଗାଣ କରାଯିବାକୁ ଥିବା ନୂତନ ପ୍ରକଳ୍ପର ଉଦ୍ଘାଟନ କରିଛନ୍ତି। ଉଦ୍ଘାଟନ ସମୟରେ ଜି.ଉଦୟଗିରି ବିଧାୟକ ସାଲୁଗା ପ୍ରଧାନ, ଡିଆର୍ଡିଏ ପ୍ରକଳ୍ପ ନିର୍ଦ୍ଦେଶକ ବିଶ୍ୱନାଥ ବାରିକ, ବ୍ଲକ ଅଧ୍ୟକ୍ଷା ସୁବେନ୍ତୀ ପ୍ରଧାନ, ବିଡିଓ ଭକ୍ତବନ୍ଧୁ ଜନାର୍ଦ୍ଦନ ଦଳେଇ, ସମିତିର ସହକାରୀ ନିର୍ବାହୀ ଯନ୍ତ୍ରୀ ବବ୍ରୁବାହନ ବେହେରା, ପ୍ଲିହେରୀ ସରପଞ୍ଚ ତିମତି ପ୍ରଧାନ, ଜଳ ଓ ପରିମଳ ବିଭାଗର ନିର୍ବାହୀ ଯନ୍ତ୍ରୀ ସୁରେଶ ଚନ୍ଦ୍ର ମହନ୍ତ, ସହକାରୀ ନିର୍ବାହୀ ଯନ୍ତ୍ରୀ ଅମିତ କୁମାର ସେଠୀ, ଯନ୍ତ୍ରୀ ଜ୍ୟୋତି ରଞ୍ଜନ ଦାସ, ଜୀବନେଶ୍ୱର ପ୍ରଧାନ ପ୍ରମୁଖ ଉପସ୍ଥିତ ଥିଲେ। ମନ୍ତ୍ରୀ ଦାରିଙ୍ଗବାଡି ପରେ କ.ନୂଆଗଁା ବ୍ଲକ ଅଞ୍ଚଳ ଗସ୍ତ କରିଥିଲେ।
