ଭୁବନେଶ୍ୱର,୧ା୧୨(ବ୍ୟୁରୋ): ରବିବାରଠାରୁ ରାଜ୍ୟରେ କଡ଼ାକଡ଼ି ଲାଗୁହେବ ନୂଆ ମୋଟର ଯାନ ଆଇନ। କେବଳ ଗାଡ଼ି କାଗଜପତ୍ର ଯାଞ୍ଚକୁ ୩ ମାସ କୋହଳ କରାଯାଇଥିବାବେଳେ ଅନ୍ୟ ୧୦ ଟ୍ରାଫିକ ନିୟମ ଉଲ୍ଲଂଘନକାରୀଙ୍କଠାରୁ ବହୁଗୁଣା ଜରିମାନା ଆଦାୟ ହେବ। ଏ ନେଇ ପରିବହନ ବିଭାଗ ପକ୍ଷରୁ ସମସ୍ତ ଏସ୍ପି ଓ ଜିଲାପାଳଙ୍କୁ ନିର୍ଦ୍ଦେଶ ଦିଆଯାଇଛି। ଅନ୍ୟପକ୍ଷରେ ଜରିମାନାବେଳେ ଉପୁଜୁଥିବା ଆଇନଶୃଙ୍ଖଳା ପରିସ୍ଥିତି ଏଡ଼ାଇବା ପାଇଁ ଭୁବନେଶ୍ୱର ସମେତ ସମ୍ପୂର୍ଣ୍ଣ କମିଶନରେଟ ପୋଲିସ ଇଲାକାରେ ନୂଆ ବ୍ୟବସ୍ଥା ଆପଣାଯାଇଛି। ନିୟମ ଉଲ୍ଲଂଘନକାରୀଙ୍କ ସହ ପୋଲିସ ରାସ୍ତା ଉପରେ ଯୁକ୍ତିତର୍କ ନ କରିବାକୁ କମିଶନର ସୁଧାଂଶୁ ଷଡ଼ଙ୍ଗୀ ପରାମର୍ଶ ଦେଇଛନ୍ତି। ଯେଉଁ ଉଲ୍ଲଂଘନକାରୀ ଘଟଣାସ୍ଥଳରେ ଜରିମାନା କାଟିବାକୁ ମନା କରିବେ, ସେମାନଙ୍କୁ ଜବରଦସ୍ତ ନ କରି ତାଙ୍କ ଗାଡ଼ି ନମ୍ବରରେ ଘରକୁ ଡାକରେ ଚାଲାଣ ପଠାଯିବ ବୋଲି କମିଶନର କହିଛନ୍ତି।
କମିଶନରେଟ ପୋଲିସ ମୁଖ୍ୟାଳୟଠାରେ କମିଶନର ଷଡ଼ଙ୍ଗୀ ଏ ସମ୍ପର୍କରେ ସୂଚନା ଦେଇ କହିଲେ, ଏଣିକି ନିୟମ ଉଲ୍ଲଂଘନକାରୀ ଆଉ ଖସି ପାରିବେ ନାହିଁ। ତେଣୁ ରାଜ୍ୟରେ ପ୍ରଥମଥର ଭୁବନେଶ୍ୱରର ରୁପାଲି ଛକରେ ଟିଭିଡିଏସ୍ ମେଶିନ (ଟ୍ରାଫିକ ଭାଓଲେଟ୍ର ଡିଟେକ୍ସନ ସିଷ୍ଟମ ବା ଟ୍ରାଫିକ ନିୟମ ଉଲ୍ଲଂଘନକାରୀଙ୍କୁ ଧରିପାରୁଥିବା ସ୍ବୟଂଚାଳିତ ମେଶିନ) ଲଗାଯାଇଛି। ପୋଲିସ ଉଲ୍ଲଂଘନକାରୀଙ୍କୁ ନ ଧରି ପାରିଲେ ଏହି ମେଶିନ ସିସିଟିଭି କ୍ୟାମେରା ମାଧ୍ୟମରେ ଚିହ୍ନଟ କରିବା ପରେ ଉକ୍ତ ଗାଡ଼ି ନମ୍ବର ଅନୁଯାୟୀ ଘରେ ଚାଲାଣ ପହଞ୍ଚତ୍ୟିବ। ସେହିଭଳି ଅନ୍ୟ କୌଣସି ସ୍ଥାନରେ ଯଦି ଉଲ୍ଲଂଘନକାରୀ ଜରିମାନା ନ ଦେଇ ଖସି ଯିବାକୁ ଚେଷ୍ଟା କରିବେ, ଟ୍ରାଫିକ ପୋଲିସ ପୋଷାକରେ ଲାଗୁଥିବା ବଡ଼ି କ୍ୟାମେରା ସେମାନଙ୍କୁ ଧରିବ। ପୋଲିସ କଣ୍ଟ୍ରୋଲ ରୁମ୍ରୁ ସିସିଟିଭି ମାଧ୍ୟମରେ ମଧ୍ୟ ଉଲ୍ଲଂଘନକାରୀଙ୍କୁ ଚିହ୍ନଟ କରାଯିବ। ଇ-ମେଶିନ ସାହାଯ୍ୟରେ ସମସ୍ତ ଚାଲାଣ କଟାଯିବ। ଘରେ ଚାଲାଣ ପହଞ୍ଚତ୍ବା ପରେ ଗାଡ଼ି ମାଲିକ କମିଶନରେଟ ପୋଲିସ ମୁଖ୍ୟାଳୟରେ ଜରିମାନା ପୈଠ କରିବେ। ଏଥିଲାଗି ସେଠାରେ ଏକ କାଉଣ୍ଟର ଖୋଲାଯିବ। ଯଦି ବି ନିର୍ଦ୍ଧାରିତ ସମୟ ମଧ୍ୟରେ ଜରିମାନା ରାଶି ପୈଠ ନ କଲେ, ତେବେ ଚାଲାଣ ଯାଇଥିବା ଗାଡି ନମ୍ବରରେ ତାହା ଯୋଡ଼ି ହୋଇଯିବ। ଯେତେ ବିଳମ୍ବ କରିବେ ଓ ପରବର୍ତ୍ତୀ ସମୟରେ ବି ଯେତେଥର ଜରିମାନା ନ ଦେବାକୁ ଚେଷ୍ଟା କରିବେ ତାହା ବଢି ବଢି ଯିବ। ଯେତେବେଳେ ଗାଡ଼ି କାଗଜପତ୍ର କରିବାକୁ ଆର୍ଟିଓ ଅଫିସ୍କୁ ଯିବେ, ସେତେବେଳେ ଜରିମାନା ସୁଧମୂଳ ସହ ଦେବାକୁ ପଡିବ। ନଚେତ ଗାଡ଼ି କାଗଜପତ୍ର ହୋଇପାରିବ ନାହିଁ ବୋଲି କମିଶନର ଷଡ଼ଙ୍ଗୀ ସତର୍କ କରାଇଦେଇଛନ୍ତି।
୩ ବର୍ଷରେ ଟ୍ରାଫିକ ପୋଷ୍ଟରୁ ପୋଲିସ ପ୍ରତ୍ୟାହାର ଲକ୍ଷ୍ୟ
ପୋଲିସ କମିଶନର ସୁଧାଂଶୁ ଷଡ଼ଙ୍ଗୀ କହିଛନ୍ତି, ରବିବାରଠାରୁ ଟ୍ରାଫିକ ନିୟମ ଉଲ୍ଲଂଘନକାରୀଙ୍କୁ ଚିହ୍ନଟ ପାଇଁ ଭୁବନେଶ୍ୱର ରୁପାଲି ଛକରେ ଟିଭିଡିଏସ୍ ବ୍ୟବସ୍ଥା କାର୍ଯ୍ୟକାରୀ ହେବ। ପରେ ଏହା ରାଜଧାନୀର ଆଉ ୮ ପ୍ରମୁଖ ଛକରେ ଲଗାଯିବ। ଏହାସହ ଆଗାମୀ ୩ବର୍ଷ ମଧ୍ୟରେ ଟ୍ରାଫିକ ପୋଷ୍ଟରୁ ପୋଲିସ ପ୍ରତ୍ୟାହାର କରାଯିବାର ଲକ୍ଷ୍ୟ ରଖାଯାଇଛି। ଲୋକଙ୍କୁ ଭୟଭୀତ ହେବାର ନାହିଁ। ଟ୍ରାଫିକ ନିୟମ ମାନି ଗାଡି ଚଳାନ୍ତୁ। ପୋଲିସ ପକ୍ଷରୁ ଧୀରେ ଧୀରେ କାର୍ଯ୍ୟାନୁଷ୍ଠାନ ବଢିବ ବୋଲି କମିଶନର ଷଡ଼ଙ୍ଗୀ କହିଛନ୍ତି।
