ଭୁବନେଶ୍ୱର,୨୮।୬ (ବ୍ୟୁରୋ):ଭୁବନେଶ୍ୱର ମହାନଗର ନିଗମ (ବିଏମ୍ସି) ପକ୍ଷରୁ ସୋମବାର ଏକ ଅନ୍ତର୍ବିଭାଗୀୟ ବୈଠକ ଅନୁଷ୍ଠିତ ହୋଇଯାଇଛି। କମିଶନର ବିଜୟ ଅମୃତା କୁଲାଙ୍ଗେଙ୍କ ପୌରୋହିତ୍ୟରେ ଆୟୋଜିତ ଏହି ବୈଠକରେ ସହରର ଉନ୍ନତୀକରଣରେ ନିୟୋଜିତ ବିଭିନ୍ନ ବିଭାଗୀୟ ଅଧିକାରୀଙ୍କ ସହ ଆଲୋଚନା କରାଯାଇଥିଲା। ସହରର କୌଣସି ପ୍ରକଳ୍ପ କାର୍ଯ୍ୟ ତ୍ୱରାନ୍ବିତ କରିବା ଆଳରେ ଅନ୍ୟ ପ୍ରକଳ୍ପ ଯେପରି ବାଧାପ୍ରାପ୍ତ ନ ହୁଏ, ସେଥିପ୍ରତି କୁଲାଙ୍ଗେ ଗୁରୁତ୍ୱାରୋପ କରିଛନ୍ତି। ବିଏମ୍ସି ପକ୍ଷରୁ ହାତକୁ ନିଆଯାଇଥିବା ପ୍ରକଳ୍ପ କାର୍ଯ୍ୟ ଯେପରି ନିର୍ଦ୍ଧାରିତ ସମୟରେ ସମସ୍ତଙ୍କ ସହଯୋଗରେ ସମାପ୍ତ ହେବ, ସେନେଇ ଆଲୋଚନା ହୋଇଥିଲା। ଏହି କ୍ରମରେ ସମ୍ଭାବ୍ୟ କୃତ୍ରିମ ବନ୍ୟା ଉପରେ କିପରି ରୋକ ଲଗାଯାଇପାରିବ ସେ ନେଇ ମଧ୍ୟ ବିସ୍ତୃତ ଆଲୋଚନା କରାଯାଇଥିଲା। ଏସ୍ପ୍ଲାନାଡେ, ରଥରୋଡ୍, ଶ୍ୟାମପୁରସ୍ଥିତ ଆୟୁର୍ବେଦିକ ହସ୍ପିଟାଲ ସମ୍ମୁଖ, ଶିଶୁ ଭବନଠାରୁ ରାମମନ୍ଦିର ରାସ୍ତାରୁ ଡ୍ରେନ୍ ସମସ୍ୟାକୁ କିପରି ଲାଘବ କରାଯିବ, ସେନେଇ ବିଭାଗ ଧ୍ୟାନ ଦେବାକୁ କମିଶନର ନିର୍ଦ୍ଦେଶ ଦେଇଛନ୍ତି। ଅନ୍ୟପଟେ ପାହାଳଠାରୁ ପାତ୍ରପଡ଼ା ପର୍ଯ୍ୟନ୍ତ ଥିବା ଡ୍ରେନ୍ ସଫେଇ, କସ୍ମୋପୋଲିସ୍ଥିତ ଡ୍ରେନ୍-୯ର ପ୍ରକ୍ରିୟାକରଣ ନେଇ ଏନ୍ଏଚ୍ଆଇ ଅଧିକାରୀଙ୍କ ସହ ଆଲୋଚନା କରାଯାଇଥିଲା। ତେବେ ଜଳ ସମ୍ପଦ ବିଭାଗର ପ୍ରାଚୀ ଡିଭିଜନ୍ ପକ୍ଷରୁ ଦୟା ୱେଷ୍ଟ କେନାଲ, ପୁରୀ ମୁଖ୍ୟ କେନାଲର ପରିଷ୍କରଣ ସମ୍ପର୍କରେ ବିବରଣୀ ଦିଆଯାଇଥିଲା। ୪ ନଂ. ୱାର୍ଡ଼ ଅନ୍ତର୍ଗତ ଗଙ୍ଗୁଆ ଏବଂ ପ୍ରାଚୀଧାରା ସହ ସମ୍ପୃକ୍ତ ଉଚ୍ଛେଦ ପ୍ରକ୍ରିୟାର ମଧ୍ୟ ବିବରଣୀ ରଖାଯାଇଥିଲା। ସେହିପରି ମଞ୍ଚେଶ୍ୱର ଶିଳ୍ପାଞ୍ଚଳ ଏବଂ ଚନ୍ଦକା ଶିଳ୍ପାଞ୍ଚଳ ପ୍ରତି ବିଶେଷ ଗୁରୁତ୍ୱ ଦେବାକୁ ଇଡ୍କୋ ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଛି। ଏଥିସହ ଗୌରୀନଗରସ୍ଥିତ ଡ୍ରେନ୍ ୭ନଂ.ରୁ ହ୍ୟୁମ୍ ପାଇପ୍ କଲ୍ଭର୍ଟ ବାହାର କରାଯିବା ନେଇ କାର୍ଯ୍ୟର ବିବରଣୀ ରଖିବା ପାଇଁ ୱାଟ୍କୋ ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଥିଲା। ପମ୍ପିଂ ଷ୍ଟେଶନ୍, ଯମୁନା ଜଳାଶୟସ୍ଥ ଡ୍ରେନ୍ ୧ନଂ.ରୁ ସ୍ବେରେଜ୍ ଚାମ୍ବର ପ୍ରତ୍ୟାହୃତ କରିବା ନେଇ ନିର୍ଦ୍ଦେଶ ଦିଆଯାଇଛି। ଅନ୍ୟପଟେ ଦମକଳ, ଟ୍ରାଫିକ୍, ଜଙ୍ଗଲ ଓ ବିଦ୍ୟୁତ୍ ବିଭଗର ସହଯୋଗ କାମନା କରାଯାଇଥିଲା।
