କଳିଙ୍ଗନଗର,୨୧|୬(ଡି.ଏନ୍.ଏ.)- କଳିଙ୍ଗନଗର ଅଞ୍ଚଳରେ ଜଣେ ନାବାଳିକାଙ୍କୁ ବଳାତ୍କାର ହୋଇଥିବା ନେଇ ଥାନାରେ ଅଭିଯୋଗ ହୋଇଥିଲା। ଅଭିଯୋଗ ଆଧାରରେ ପୋଲିସ ମୋବାଇଲ୍ ଟ୍ରାକିଂ ଜରିଆରେ ବୁଧବାର ରାତିରେ ୨ ଜଣ ଯୁବକଙ୍କୁ ଗିରଫ କରିଛି। ଅଭିଯୁକ୍ତ ଦ୍ୱୟ ହେଲେ ରାମଠେଙ୍ଗା ଗ୍ରାମର ଜିତେନ୍ଦ୍ର ଜାମୁଦା ଓ ବାଲିଆପାଳ ଗ୍ରାମର ସୁନିଲ ଜାମୁଦା। ଗୁରୁବାର ଦାନଗଦୀ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଉଭୟ ପୀଡିତା ଏବଂ ଅଭିଯୁକ୍ତଙ୍କ ଡାକ୍ତରୀ ମାଇନା କରାଯାଇଛି। ପୀଡିତାଙ୍କୁ ପରିବାର ଲୋକଙ୍କୁ ହସ୍ତାନ୍ତର କରାଯାଇଥିବାବେଳେ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଥିବା ତଦନ୍ତକାରୀ ଅଧିକାରୀ ପ୍ରଭଞ୍ଜନ ବେହେରା କହିଛନ୍ତି।
ପ୍ରକାଶ ଯେ, ମୟୂରଭଞ୍ଜ ଜିଲା ମହୁଲିଢିଅ ଥାନା ଅଞ୍ଚଳର ଉକ୍ତ ନାବାଳିକା ରଜରେ ବୁଲିବାକୁ ଯାଜପୁର ଜିଲା ଟମକା ଥାନା ଅଞ୍ଚଳରେ ଥିବା ସମ୍ପର୍କୀୟଙ୍କ ଘରକୁ ଆସିଥିଲେ। ସେଠାରୁ ୧୬ ତାରିଖରେ ଡୁବୁରୀ ଥାନା ଅନ୍ତର୍ଗତ ଶାଳିଜଙ୍ଗା ପଞ୍ଚାୟତର ବେଙ୍ଗ ପାଟିଆକୁ ଦୋଳି ଖେଳିବା ପାଇଁ ଯାଇଥିଲେ। ସେଠାରେ ତାଙ୍କର ଜିତେନ୍ଦ୍ର ଓ ସୁନିଲଙ୍କ ସହ ପରିଚୟ ହୋଇଥିଲା। ପରେ ଜିତେନ୍ଦ୍ର ଓ ସୁନିଲ ନିକଟ ଗ୍ରାମରେ ଚାଲିଥିବା ଆଦିବାସୀ ନାଟକ ଦେଖିବାକୁ ନାବାଳିକାଙ୍କୁ ଡାକିଥିଲେ। ନାଟକ ଦେଖିସାରିବା ପରେ ତାଙ୍କୁ ତାଙ୍କ ସମ୍ପର୍କୀୟଙ୍କ ଘରେ ଛାଡି ଦେବାକୁ କହିଥିଲେ। ଏଥିରେ ନାବାଳିକା ଜଣଙ୍କ ରାଜି ହୋଇ ସେମାନଙ୍କ ସହିତ ବାଇକ୍ରେ ବସି ନାଟକ ଦେଖିବାକୁ ଯାଇଥିଲେ। ହେଲେ ଅଭିଯୁକ୍ତ ଦ୍ୱୟ ନାଟକ ଦେଖାଇବାକୁ ନେବା ପରିବର୍ତ୍ତେ ସ୍ଥାନୀୟ ରେଳବାଇ ବିଭାଗର ଏକ ପରିତ୍ୟକ୍ତ ଘରେ ତାଙ୍କୁ ବଳାତ୍କାର କରିଥିଲେ। ପର ଦିନ ସକାଳେ ନାବଳିକାଙ୍କୁ ଡୁବୁରୀ ଛକଠାରେ ଛାଡି ଫେରାର ହୋଇଯାଇଥିଲେ। ନାବାଳିକାଙ୍କଠାରୁ ସମସ୍ତ ଘଟଣା ଜାଣିବା ପରେ ୧୮ ତାରିଖରେ ସମ୍ପର୍କୀୟ ପିଉସା କଳିଙ୍ଗନଗର ଥାନାରେ ଅଭିଯୋଗ କରିଥିଲେ। ଅଭିଯୋଗ ଆଧାରରେ ପୋଲିସ ମାମଲା (ନଂ.୧୧୦/୧୯) ରୁଜୁ କରି ତଦନ୍ତ ଚଳାଇଥିଲା।
