ପୁରୁଷୋତ୍ତମପୁର, ୧୦।୧୧ (ଡି.ଏନ.ଏ.): ଜାତୀୟ ମାନବାଧିକାର କମିଶନ ପୋଲିସ ମାଡରେ ଆହତ ୭ ଜଣଙ୍କୁ ୨୫ହଜାର ଲେଖାଏ କ୍ଷତିପୂରଣ ଦେବାକୁ ନିର୍ଦ୍ଦେଶ ଦେଇଛନ୍ତି। କ୍ଷତିପୂରଣ ପାଇବାକୁ ଥିବା ବ୍ୟକ୍ତିହେଲେ କୁମାରୀର ଅଧିକାରୀ ବେହେରା, ପୁରୁଷୋତ୍ତମପୁର ମେନ୍ରୋଡ୍ର ଗଣପତି ସାହୁ, ମହେଶ୍ୱର ମହାନ୍ତି, ହନୁମାନ ବଜାରର ବଳରାମ ବେହେରା, ନଦୀତଟ ସାହିର ଶୁକୁଟା ବେହେରା, ଚାଙ୍ଗୁଡିଆପଦର ସାହିର ମୁରଲୀ ଗୌଡ, ବଡଧୋବା ସାହିର ପଞ୍ଚୁ ବେହେରା। ପଞ୍ଚୁଙ୍କ ଗତ କିଛିମାସ ତଳେ ମୃତ୍ୟୁ ଘଟିଛି। ଗଞ୍ଜାମ ଏସ୍ପି ଆହତଙ୍କୁ ଟଙ୍କା ପ୍ରଦାନ ପାଇଁ ସେମାନଙ୍କ ବ୍ୟାଙ୍କ ଆକାଉଣ୍ଟ ଓ ଆବଶ୍ୟକ କାଗଜପତ୍ର ଦାଖଲ କରିବାକୁ କହିଛନ୍ତି। କେତେଜଣ ଛତ୍ରପୁର ଯାଇ ଏସ୍ପିଙ୍କ କାର୍ଯ୍ୟାଳୟରେ ଦାଖଲ ମଧ୍ୟ କରିଛନ୍ତି। ମହେଶ୍ୱର ଗରିବ ଶ୍ରେଣୀର ହୋଇଥିବାବେଳେ ତାଙ୍କର ବ୍ୟାଙ୍କ ଆକାଉଣ୍ଟ ନ ଥିବାରୁ ସେ ଦାଖଲ କରି ପାରିନାହାନ୍ତି।
ସୂଚନାଯୋଗ୍ୟ ଯେ, ୨୦୧୪ ଅଗଷ୍ଟ ୨୫ରେ ଭୋରରୁ ପୁରୁଷୋତ୍ତମପୁର ସହରର ଲୋକେ ନିତ୍ୟକର୍ମ ପାଇଁ ବାହାରକୁ ଆସିଥିବାବେଳେ ପାଟ୍ରୋଲିଂରେ ଥିବା ପୁରୁଷୋତ୍ତମପୁର ଥାନାର ପୂର୍ବତନ ଏସ୍ଆଇ ତଥା ବର୍ତ୍ତମାନ ପୋଲିସ ଚାକିରି ଛାଡ଼ି କନ୍ଧମାଳ ଜିଲା ଚକାପାଦ ବ୍ଲକରେ କାର୍ଯ୍ୟ କରୁଥିବା ମୁକ୍ତିପ୍ରକାଶ କୁଲୁ ଓ କର୍ମଚାରୀ ପ୍ରାୟ ୧୫ ଜଣ ନିରୀହ ଲୋକଙ୍କୁ ମାଡମାରି ଲହୁଲୁହାଣ କରିଥିଲେ। ପ୍ରତିବାଦରେ ଲୋକେ ସହରର ବିଭିନ୍ନ ସ୍ଥାନରେ ରାସ୍ତାରୋକୋ କରିଥିଲେ। ୨୦୧୪ ଅଗଷ୍ଟ ୨୬ରେ ଏନେଇ ଧରିତ୍ରୀରେ ଖବର ପ୍ରକାଶ ପାଇଥିଲା। ଏହି ଖବରକୁ ଭିତ୍ତିକରି ପୁରୀର ସୂଚନା ଅଧିକାର କର୍ମୀ ଜୟନ୍ତ କୁମାର ଦାଶ ଜାତୀୟ ମାନବାଧିକାର କମିଶନରଙ୍କଠାରେ ନଂ.୪୦୯୨/୧୮/୫/୨୦୧୪ ପ୍ରକାରେ ମାମଲା ଦାୟର କରି ମାଡ ଖାଇଥିବା ଲୋକଙ୍କୁ କ୍ଷତିପୂରଣ, ନ୍ୟାୟ ପ୍ରଦାନ ଲାଗି ନିବେଦନ କରିଥିଲେ। ଜାତୀୟ ମାନବାଧିକାର କମିଶନ ଅଧ୍ୟକ୍ଷ ରାଜ୍ୟ ମୁଖ୍ୟ ଶାସନ ସଚିବ, ପୋଲିସ ଡିଜି ଓ ଗଞ୍ଜାମ ଏସ୍ପିଙ୍କୁ ରିପୋର୍ଟ ମାଗିଥିଲେ। ତଥ୍ୟକୁ ଭିତ୍ତିକରି ଜାତୀୟ ମାନବାଧିକାର କମିଶନ ଏହି ରାୟ ଶୁଣାଇଛନ୍ତି।
