ମୁନିଗୁଡା,୨୩।୧୦(ଡି.ଏନ୍.ଏ.): ସରକାର ଆଦିବାସୀ ଛାତ୍ରୀଛାତ୍ର ମାନଙ୍କୁ ଶିକ୍ଷା ପ୍ରତି ଆକୃଷ୍ଟ କରିବା ପାଇଁ ଅନେକ ଯୋଜନା କରୁଛନ୍ତି। ଛାତ୍ରୀଛାତ୍ର ମାନଙ୍କୁ ରହିବା ଓ ଖାଇବା ସହ ସମସ୍ତ ପ୍ରକାରର ସୁବିଧା ଦେଇ ପାଠ ପଢ଼ିବା ନିମନ୍ତେ ବିଭିନ୍ନ ହଷ୍ଟେଲ ଖୋଲାଯାଇଛି। ହେଲେ ସେଠାରେ ସାଧାରଣ ସମସ୍ୟାଗୁଡ଼ିକର ନିରାକରଣ କରାଯାଇପାରୁନାହିଁ। ଫଳରେ ଦୁଇ ମାସରୁ ଊର୍ଦ୍ଧ୍ୱ ସମୟ ଧରି ବିଦ୍ୟୁତ ସଂଯୋଗ ହୋଇ ନ ପାରିବା ଯୋଗୁ ଛାତ୍ରମାନେ ରାତିରେ ଲଣ୍ଠନ ଉପରେ ହିଁ ଭରସା କରି ରହିବା ସହ ପାଠ ପଢ଼ୁଛନ୍ତି। ଏଭଳି ଦୃଶ୍ୟ ଦେଖିବାକୁ ମିଳିଛି ରାୟଗଡା ଜିଲା ମୁନିଗୁଡା ବ୍ଲକ ଅନ୍ତର୍ଗତ କୁମୁଡାବାଲି ସ୍ଥିତ ୪୦ ଶଯ୍ୟା ବିଶିଷ୍ଟ ହଷ୍ଟେଲରେ l
ଆଦିବାସୀ ଉର୍ଣ୍ଣୟନ ବିଭାଗ ତରଫରୁ ଚାଲିଥିବା ଏହି ହଷ୍ଟେଲରେ ୪୦ ଜଣ ଛାତ୍ର ରହି କୁମୁଡାବାଲି ସରକାରୀ ପ୍ରାଥମିକ ବିଦ୍ୟାଳୟରେ ଅଧ୍ୟୟନ କରୁଛନ୍ତି। ଏହି ୪୦ ଶଯ୍ୟା ବିଶିଷ୍ଟ ହଷ୍ଟେଲରେ ସ୍ଥାଇ ବିଦ୍ୟୁତ ସଂଯୋଗ ହୋଇପାରିନାହିଁ। ପୂର୍ବରୁ ଏହି ହଷ୍ଟେଲକୁ ଅସ୍ଥାୟୀ ଭାବେ ବିଦ୍ୟୁତ ଯୋଗାଇ ଦିଆ ଯାଇଥିଲା। କିନ୍ତୁ ଗତ ଦୁଇ ମାସରୁ ଉର୍ଦ୍ଧ୍ୱ ଦିନ ହେବ ବିଦ୍ୟୁତ କାଟି ଦିଆଯାଇଛି। ବିଭାଗ ତରଫରୁ ହଷ୍ଟେଲରେ ଲାଇଟ୍ ଓ ଫ୍ୟାନ୍ ଲଗାଯାଇଥିଲେ ସୁଦ୍ଧା ତାହା ଚାଲୁନାହିଁ। ଫଳରେ ଛାତ୍ରମାନେ ଦିନରେ ଗରମରେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଥିବା ବେଳେ ରାତ୍ର ସମୟରେ ବାଧ୍ୟ ହୋଇ ଲଣ୍ଠନ କିମ୍ବା ବ୍ୟାଟେରୀ ଚାଳିତ ଲାଇଟ୍ ଲଗାଇ ପାଠ ପଢ଼ୁଛନ୍ତି। ଏପରିକି ସନ୍ଧ୍ୟା ପରଠାରୁ ସମସ୍ତ କାର୍ଯ୍ୟ ସେହି ଲାଇଟ୍ରେ କରିବାକୁ ପଡ଼ୁଛି। ଏହାକୁ ନେଇ ଛାତ୍ରଙ୍କଠାରୁ ଆରମ୍ଭ କରି ଅଭିଭାବକମାନଙ୍କ ମନରେ ଅସନ୍ତୋଷ ଦେଖା ଦେଇଛି। ଶୀଘ୍ର ଘଟଣାର ସ୍ଥାୟୀ ସମାଧାନ କରା ନ ଗଲେ ପିଲାମାନଙ୍କୁ ଘରକୁ ନେଇଯିବା ଲାଗି ଅଭିଭାବକମାନେ କ୍ଷୋଭର ସହ ପ୍ରକାଶ କରିଛନ୍ତି। ଏଥିସହ ଯଥାଶୀଘ୍ର ଏହି ହଷ୍ଟେଲର ବିଦ୍ୟୁତ ସଂଯୋଗୀକରଣର ସ୍ଥାୟୀ ସମାଧାନ କରିବାକୁ ଦାବି କରିଛନ୍ତି।
ଏନେଇ ହଷ୍ଟେଲ ଦାୟିତ୍ୱରେ ଥିବା ତଥା ପ୍ରଧାନ ଶିକ୍ଷକ ବୃନ୍ଦାବନ ମାଣ୍ଡିକାଙ୍କୁ ପଚାରି ବୁଝିବାରୁ ହଷ୍ଟେଲରେ ଦୁଇ ମାସରୁ ଊର୍ଦ୍ଧ୍ୱ ଦିନ ଧରି ବିଦ୍ୟୁତ ନ ଥିବାରୁ ନିଶ୍ଚିତ ଭାବେ ଛାତ୍ର ମାନେ ବହୁ ଅସୁବିଧାରେ ରହୁଛନ୍ତି। ଏହି ସମସ୍ୟାକୁ ନେଇ ଉଚ୍ଚପଦସ୍ଥ ଅଧିକାରୀଙ୍କୁ ବହୁବାର ଜଣାଇ ଥିଲେ ମଧ୍ୟ ଏପର୍ଯ୍ୟନ୍ତ କୌଣସି ସୁଫଳ ମିଳିନାହିଁ କି ବିଦ୍ୟୁତ ସଂଯୋଗ ମଧ୍ୟ ହୋଇପାରିନାହିଁ ବୋଲି କହିଛନ୍ତି l ଏନେଇ ମୁନିଗୁଡା ଡବ୍ଲୁଇଓ(ମଙ୍ଗଳ ସମ୍ପ୍ରସାରଣ ଅଧିକାରୀ ) ଭାଗିରଥି ସାହୁଙ୍କୁ ପଚାରିବାରୁ ସେ ବିଷୟରେ ଅବଗତ ଗତ ଥିବା ସହ ଶୀଘ୍ର ଏହାର ସ୍ଥାୟୀ ସମାଧାନ କରାଯାଇ ହଷ୍ଟେଲରେ ବିଦ୍ୟୁତ ସଂଯୋଗ କରାଯିବ ବୋଲି ପ୍ରକାଶ କରିଛନ୍ତି।
