କଟକ, ୨୨।୧୨(କ୍ରୀଡ଼ା ପ୍ରତିନିଧି)- ବାରବାଟୀ ଷ୍ଟାଡିୟମରେ ରବିବାର ଭାରତ ଓ ଓ୍ବେଷ୍ଟଇଣ୍ଡିଜ ମଧ୍ୟରେ ସିରିଜ ନିର୍ଣ୍ଣାୟକ ମ୍ୟାଚ ଅନୁଷ୍ଠିତ ହେବ। ଏହା ଉଭୟ ଦଳ ପାଇଁ କର ଅବା ମର ପରିସ୍ଥିତି ସୃଷ୍ଟି କରିଛି। ଭାରତୀୟ ଦଳର ପ୍ରତି ସଦସ୍ୟ ମଧ୍ୟ ଏହାର ଗୁରୁତ୍ୱ ଉପଲବ୍ଧି କରିଛନ୍ତି। ଶନିବାର ଓଡ଼ିଶା କ୍ରିକେଟ ଆସୋସିଏଶନ(ଓସିଏ) ସମ୍ମିଳନୀ କକ୍ଷରେ ଅନୁଷ୍ଠିତ ଖବରଦାତା ସମ୍ମିଳନୀରେ ଶ୍ରେୟାସ ଆୟାରଙ୍କ ପ୍ରତିକ୍ରିୟାରୁ ଏହା ସୂଚନା ମିଳିଛି। କ୍ୟାରିୟର ଆରମ୍ଭରେ ମୋ ଉପରେ ଏତେଟା ଦାୟିତ୍ୱ ନ ଥିଲା। ମାତ୍ର ଅଭିଜ୍ଞ ହେବା ସହ ଦାୟିତ୍ୱ ବଢ଼ିଛି। ୪ ନମ୍ବରରେ ବ୍ୟାଟିଂ କରୁଥିବାରୁ ଦାୟିତ୍ୱସମ୍ପନ୍ନଭାବେ ଖେଳିବାକୁ ପଡ଼ୁଛି ବୋଲି କହିଛନ୍ତି ଏହି ୨୫ ବର୍ଷୀୟ ଖେଳାଳି। ଚଳିତ ସିରିଜର ପ୍ରଥମ ୨ଟି ମ୍ୟାଚରେ ଅର୍ଦ୍ଧଶତକ ହାସଲ କରିଥିବା ଆୟାର ଆଗାମୀ ମ୍ୟାଚରେ ମଧ୍ୟ ସମାନ ପ୍ରଦର୍ଶନ ଆଶା ରଖିଛନ୍ତି। ପ୍ରଥମଶ୍ରେଣୀ କ୍ରିକେଟ ଏବଂ ଅନ୍ତର୍ଜାତୀୟ କ୍ରିକେଟ ମଧ୍ୟରେ ଅନେକ ପ୍ରଭେଦ ରହିଛି। ଉଚ୍ଚସ୍ତରରେ ଖେଳିବାବେଳେ ଅଧିକ ଦାୟିତ୍ୱ ଥାଏ। ମୁଁ ଏବେ ମୋ ଗେମ୍କୁ ଭଲଭାବେ ବୁଝି ପାରିଛି ଏବଂ ସେହି ଅନୁସାରେ ଖେଳୁଛି। କେତେବେଳେ ସିଙ୍ଗଲ୍ ରନ ନେଇ ଷ୍ଟ୍ରାଇକ୍ ରୋଟେଟ କରିବାକୁ ପଡ଼ିବ ଏବଂ କେତେବେଳେ ଆକ୍ରମଣାତ୍ମକ ଖେଳିବାକୁ ହେବ ତାହା ମୁଁ ବୁଝି ସାରିଛି ବୋଲି ଆୟାର କହିଛନ୍ତି।
ସିରିଜର ପ୍ରଥମ ଦିନିକିଆରେ ଆୟାର ୮୮ ବଲ୍ରୁ ୭୦ ରନ କରିଥିଲେ। ଏ ସମ୍ପର୍କିତ ପ୍ରଶ୍ନର ଉତ୍ତରରେ ସେ କହିଲେ ଯେ, ଗେମ୍ର ସ୍ଥିତି ନେଇ ଖେଳିବାକୁ ହୋଇଥାଏ। ସେହିଦିନ ସେପରି କିଛି ଆବଶ୍ୟକ ଥିଲା ବୋଲି ମୁଁ ଭାବିଥିଲି। ସେତେବେଳେ ଦଳ ମୋ ଠାରୁ ବଡ଼ ଶଟ୍ ଚାହୁଁ ନ ଥିଲା। ବଡ଼ ପାର୍ଟନରଶିପ୍ ଆବଶ୍ୟକ ଥିଲା। ତେଣୁ ମୁଁ ସ୍କୋର କିପରି ଆଗକୁ ବଢ଼ିବ ତା’ ଉପରେ ଧ୍ୟାନ ଦେଇଥିଲି। ସେହି ମ୍ୟାଚରେ ପ୍ରଦର୍ଶନକୁ ନେଇ ମୁଁ ଖୁସି ଅଛି ବୋଲି ସେ ପ୍ରକାଶ କରିଛନ୍ତି। ୩ ଦିନପରେ ବିଶାଖାପାଟଣାରେ ଅନୁଷ୍ଠିତ ମ୍ୟାଚରେ ସେ ୩୨ ବଲ୍ରୁ ୫୩ ରନ କରିଥିଲେ। ପିଚ୍ ଓ ଦଳର ସ୍ଥିତିକୁ ନେଇ ସେ ଆକ୍ରମଣାତ୍ମକ ଖେଳିଥିଲେ ବୋଲି କହିଛନ୍ତି। ପୂର୍ବରୁ ମୁଁ ୫ ନମ୍ବର ସ୍ଥାନରେ ବ୍ୟାଟିଂ କରିବାକୁ ଆସୁଥିଲି। ଏବେ ୪ ନମ୍ବରରେ ଖେଳୁଛି। ଯେଉଁ ସ୍ଥାନରେ ଖେଳିଲେ ମଧ୍ୟ ମୁଁ ସହଜ ମନେ କରୁଛି ଏବଂ ଦଳର ଆବଶ୍ୟକତାକୁ ନେଇ ବ୍ୟାଟିଂ କରୁଛି ବୋଲି କହିଛନ୍ତି। ଇଣ୍ଡିଆନ ପ୍ରିମିୟର ଲିଗ୍ରେ ଆୟାର ଦିଲ୍ଲୀ କ୍ୟାପିଟାଲ୍ସ ପକ୍ଷରୁ ପ୍ରତିନିଧିତ୍ୱ କରୁଛନ୍ତି। ଦଳର ମେଣ୍ଟର ରିକି ପଣ୍ଟିଂଙ୍କ ଉପସ୍ଥିତିରୁ ତାଙ୍କ ପ୍ରଦର୍ଶନରେ ଉନ୍ନତି ଆସିଛି କି ବୋଲି ପ୍ରଶ୍ନର ଉତ୍ତରରେ ଆୟାର କହିଥିଲେ ଯେ, ପଣ୍ଟିଂ ହେଉଛନ୍ତି ଜଣେ ସକାରାତ୍ମକ ମନୋଭାବ ସମ୍ପନ୍ନ ଖେଳାଳି। ସେ ପ୍ରତି ଖେଳାଳିଙ୍କୁ ସମର୍ଥନ କରିଥାନ୍ତି। ସେ ପ୍ରତି ଖେଳାଳିଙ୍କ ପ୍ରତି ସମାନ ବ୍ୟବହାର ଆପଣେଇଥାନ୍ତି। ଜଣେ କୋଚ୍ ଭାବେ ତାଙ୍କ ମ୍ୟାନ ମ୍ୟାନେଜମେଣ୍ଟ ଦକ୍ଷତା ଅଦ୍ୱିତୀୟ। ବାରବାଟୀରେ ହେବାକୁଥିବା ନିର୍ଣ୍ଣାୟକ ମୁକାବିଲା ଦଳ ପାଇଁ କର ଅବା ମର ସ୍ଥିତି ଆଣିଛି। ଆମେ ଦୃଢ଼ ମନୋବଳ ସହ ପଡ଼ିଆକୁ ଓହ୍ଲାଇବୁ। ବିଜୟ ହାସଲ ଆମର ଏକମାତ୍ର ଲକ୍ଷ୍ୟ ରହିବ ବୋଲି ଆୟାର ପ୍ରକାଶ କରିଛନ୍ତି।
