ନୂଆଦିଲ୍ଲୀ,୧୩।୧୨:ଦଳବଦଳ ନିରୋଧୀ ଆଇନକୁ ପୂର୍ବତନ ଏମ୍ପି ତଥାଗତ ସତପଥୀ କଡ଼ା ସମାଲୋଚନା କରିଛନ୍ତି। ଗୁରୁବାର ପିଆର୍ଏସ୍ ଲେଜିସ୍ଲେଟିଭ୍ ପକ୍ଷରୁ ଏଠାରେ ଆୟୋଜିତ ଦଳବଦଳ ନିରୋଧୀ ଆଇନ ଓ ହୁଇପ୍ ବ୍ୟବସ୍ଥା ସମ୍ପର୍କିତ ଆଲୋଚନାରେ ଭାଗନେଇ ତଥାଗତ କହିଛନ୍ତି, କୌଣସି ପ୍ରସଙ୍ଗରେ ଜଣେ ଏମ୍ପି କିମ୍ବା ବିଧାୟକ ନିଜର ମତାମତ ରଖିବା ଉପରେ ଏହି ଆଇନ ପ୍ରତିବନ୍ଧକ ସୃଷ୍ଟି କରୁଥିବାରୁ ଏହା ଗଣତନ୍ତ୍ର ବିରୋଧୀ। ଅର୍ଥାତ୍ ଏଭଳି ଆଇନ ଗଣତନ୍ତ୍ରକୁ ଭିତରୁ ଫମ୍ପା କରିଦେଇଛି। ସଦସ୍ୟମାନେ ନିର୍ଦ୍ଦିଷ୍ଟ ଶୈଳୀରେ ପ୍ରତିକ୍ରିୟା ରଖିବାକୁ ବାଧ୍ୟ ହେଉଛନ୍ତି, ଯାହା ଭାରତ ଭଳି ଏକ ପରିପକ୍ୱ ଗଣତନ୍ତ୍ରରେ ଘଟିବା ଉଚିତ ନୁହେଁ ବୋଲି ତଥାଗତ ମତ ରଖିଥିଲେ।
ଦଳୀୟ ନେତୃତ୍ୱ ଏବଂ ଏମ୍ପି ବା ବିଧାୟକମାନଙ୍କ ମଧ୍ୟରେ ଅବିଶ୍ୱାସରୁ ଦଳବଦଳ ନିରୋଧୀ ଆଇନ ଅଣାଯାଇଥିଲା। ଅବିଶ୍ୱାସ କାରଣରୁ ଦଳୀୟ ନେତୃତ୍ୱ ହୁଇପ୍ ଜାରି କରୁଛି। ରାଜନୈତିକ ଦଳଗୁଡ଼ିକ ମଧ୍ୟରେ ଆଭ୍ୟନ୍ତରୀଣ ଗଣତନ୍ତ୍ର ଥିଲେ ଏଭଳି ଘଟନ୍ତା ନାହିଁ। ତାଙ୍କୁ ଭୋଟ ଦେଇଥିବା ବିଭିନ୍ନ ମତଦାତାଙ୍କ ପ୍ରତିନିଧିତ୍ୱ କରିବା ଜଣେ ଏମ୍ପି ବା ବିଧାୟକଙ୍କ ଦାୟିତ୍ୱ। ଦଳର ନେତାମାନେ ସେମାନଙ୍କ ସଦସ୍ୟମାନଙ୍କୁ ବିଶ୍ୱାସ କରୁନାହାନ୍ତି ଓ ହୁଇପ୍ ମାଧ୍ୟମରେ ସେମାନଙ୍କୁ ଗୃହରେ ନିୟନ୍ତ୍ରଣ କରିବାକୁ ଉଦ୍ୟମ କରୁଛନ୍ତି ବୋଲି ତଥାଗତ କହିଛନ୍ତି। ଏହାସହ ଅନ୍ୟମାନଙ୍କ ଅପେକ୍ଷା ଜଣେ ବିଧାୟକ ବା ଏମ୍ପି ଜନସାଧାରଣଙ୍କ ନିକଟରେ ଉତ୍ତରଦାୟୀ ରହିବା ଆବଶ୍ୟକ ବୋଲି ସେ ମତ ଦେଇଛନ୍ତି।
ଆମକୁ ଏଭଳି ବ୍ୟବସ୍ଥା ପ୍ରସ୍ତୁତ କରିବାକୁ ହେବ, ଯେଉଁଠି ଆମର ବିଧାୟକ ବା ଏମ୍ପିମାନଙ୍କ ଉପରେ ବିଶ୍ୱାସ ରହିଥିବ, ପ୍ରଥମତଃ ସେମାନେ ଜନସାଧାରଣଙ୍କ ପାଖରେ ଉତ୍ତରଦାୟୀ ହେଉଥିବେ। ତା’ପରେ ରାଷ୍ଟ୍ର, ଦଳ ଓ ଶେଷରେ ନେତୃତ୍ୱ ନିକଟରେ ଉତ୍ତରଦାୟୀ ବୋଲି ତଥାଗତ କହିଥିଲେ। ଏହି ଆଲୋଚନାରେ ଅନ୍ୟମାନଙ୍କ ମଧ୍ୟରେ ଲୋକ ସଭା ସଦସ୍ୟ ମନୀଷ୍ ତିଓ୍ବାରୀ, କଂଗ୍ରେସ ଏମ୍ପି ଶଶୀ ଥରୁର, ଏଆଇଏମ୍ଆଇଏମ୍ ଅଧ୍ୟକ୍ଷ ତଥା ଏମ୍ପି ଆସାଦୁଦ୍ଦିନ ଓଓ୍ବାଇସି ଏବଂ ବିହାର ବିଧାନସଭା ବାଚସ୍ପତି ବିଜୟ କୁମାର ଚୌଧ୍ରୀ ଅଂଶଗ୍ରହଣ କରିଥିଲେ। ସୂଚନାଯୋଗ୍ୟ, ଦଳବଦଳ ଆଇନ ଏଭଳି ପ୍ରକ୍ରିୟା ସୃଷ୍ଟି କରିଛି, ଯେଉଁଥିରେ ଜଣେ ସଦସ୍ୟ ସ୍ବେଚ୍ଛାକୃତ ଭାବେ ନିଜ ଦଳର ସଦସ୍ୟତା ତ୍ୟାଗକଲେ କିମ୍ବା ଭୋଟ ବେଳେ ଦଳୀୟ ନେତୃତ୍ୱଙ୍କ ନିର୍ଦ୍ଦେଶର ଅବମାନନା କଲେ ସେ ଅଯୋଗ୍ୟ ଘୋଷିତ ହେବାର ବ୍ୟବସ୍ଥା ରହିଛି।
