ଲଣ୍ଡନ,୩।୬(ଏଏଫପି)- ଚଳିତ ବିଶ୍ୱକପ୍ରେ ବାଂଲାଦେଶ ପ୍ରଥମ ବିପର୍ଯ୍ୟୟ ଘଟାଇଛି। ସ୍ଥାନୀୟ କେନିଂଟନ ଓଭାଲ ଗ୍ରାଉଣ୍ଡରେ ରବିବାର ଖେଳାଯାଇଥିବା ଟୁର୍ନାମେଣ୍ଟର ପଞ୍ଚମ ମ୍ୟାଚ୍ରେ ବାଂଲାଦେଶ ୨୧ ରନରେ ଶକ୍ତିଶାଳୀ ଦକ୍ଷିଣ ଆଫ୍ରିକାକୁ ହରାଇ ଦେଇଛି। ଟସ୍ ହାରି ବ୍ୟାଟିଂ ପାଇଁ ଆମନ୍ତ୍ରଣ ପାଇଥିବା ବାଂଲାଦେଶ ୬ ଉଇକେଟ ହରାଇ ୩୩୦ ରନ ସଂଗ୍ରହ କରିଥିଲା। ଜବାବରେ ଦକ୍ଷିଣ ଆଫ୍ରିକା ୫୦ ଓଭରରେ ୮ ଉଇକେଟ ହରାଇ ୩୦୯ ରନ କରି ପରାସ୍ତ ହୋଇଛି। ଏଥିସହିତ ଦକ୍ଷିଣ ଆଫ୍ରିକା ଟୁର୍ନାମେଣ୍ଟରେ ଦ୍ୱିତୀୟ ପରାଜୟ ବରଣ କରିଛି। ପୂର୍ବରୁ ଦକ୍ଷିଣ ଆଫ୍ରିକା ଗୁରୁବାର ଉଦ୍ଘାଟନୀ ମ୍ୟାଚ୍ରେ ଆୟୋଜକ ଇଂଲଣ୍ଡଠାରୁ ୧୦୪ ରନରେ ହାରିଥିଲା। ଗୋଟିଏ ଉଇକେଟ ନେବା ସହ ୭୫ ରନର ଦମ୍ଦାର ପାଳି ଖେଳିଥିବା ବାଂଲାଦେଶ ଅଲରାଉଣ୍ଡର ସାକିବ ଅଲ ହାସନ ମ୍ୟାନ୍ ଅଫ୍ ଦି ମ୍ୟାଚ୍ ବିବେଚିତ ହୋଇଛନ୍ତି। ପରବର୍ତ୍ତୀ ମ୍ୟାଚ୍ରେ ଦକ୍ଷିଣ ଆଫ୍ରିକା ୫ ତାରିଖ ବୁଧବାର ସାଉଥାମ୍ପଟନରେ ଭାରତ ସହ ମୁକାବିଲାରେ ଅବତୀର୍ଣ୍ଣ ହେବ।
୩୩୧ ରନର କଷ୍ଟସାଧ୍ୟ ବିଜୟ ଲକ୍ଷ୍ୟର ପିଛାକରି ଦକ୍ଷିଣ ଆଫ୍ରିକା ଭଲ ଆରମ୍ଭ କରିଥିଲେ ମଧ୍ୟ ନିୟମିତ ବ୍ୟବଧାନରେ ଉଇକେଟ ହରାଇ ଆବଶ୍ୟକ ହାରରେ ରନ ସଂଗ୍ରହ କରିପାରି ନ ଥିଲା। ବାଂଲାଦେଶ ବୋଲରମାନେ ପରିସ୍ଥିତି ଅନୁଯାୟୀ ଉପଯୋଗୀ ପ୍ରଦର୍ଶନ କରିଥିଲେ। ଦକ୍ଷିଣ ଆଫ୍ରିକା ତରଫରୁ ଅଧିନାୟକ ଡୁପ୍ଲେସି ସର୍ବାଧିକ ୬୨ (୫୩ ବଲ, ୫ ଚୌକା, ୧ ଛକା), ଏଡେନ ମାରକ୍ରାମ ୪୫, ଜେପି ଡୁମିନି ୪୫ (୩୭ ବଲ, ୪ ଚୌକା), ରାସି ଭାନ ଡେର ଦୁସେନ ୪୧ (୩୮ବଲ, ୨ ଚୌକା, ୧ ଛକା), ଡେଭିଡ ମିଲର ୩୮, କ୍ୱିଣ୍ଟନ ଡିକକ୍ ୨୩ ରନ ସଂଗ୍ରହ କରିଥିଲେ। ଅନ୍ୟମାନଙ୍କ ମଧ୍ୟରେ ଆଣ୍ଡିଲ ଫେଲୁକ୍ୱାୟୋ ୮, କ୍ରିସ ମୋରିସ ୧୦ ରନ କରି ଆଉଟ ହୋଇଥିବା ବେଳେ କାଗିସୋ ରାବାଡ଼ା ୧୩ ଓ ଇମ୍ରାନ ତାହିର ୧୦ରନ କରି ଅପରାଜିତ ରହିଥିଲେ। ବୋଲିଂରେ ବାଂଲାଦେଶ ପକ୍ଷରୁ ଦ୍ରୁତ ବୋଲର ମୁସ୍ତାଫିଜୁର ରହମାନ ସର୍ବାଧିକ ୩, ମହମ୍ମଦ ସୈଫୁଦ୍ଦିନ ୨, ମେହିଦି ହାସନ ମିରାଜ ଓ ସାକିବ ଗୋଟିଏ ଲେଖାଏ ଉଇକେଟ ଅକ୍ତିଆର କରିଥିଲେ।
ପ୍ରଥମେ ବ୍ୟାଟିଂ କରିଥିବା ବାଂଲାଦେଶ ଆଶାଠାରୁ ଅଧିକ ଭଲ ପ୍ରଦର୍ଶନ କରିଥିଲା। ଦକ୍ଷିଣ ଆଫ୍ରିକା ଭଳି ଏକ ଦୃଢ ଦଳ ତଥା ଶକ୍ତିଶାଳୀ ବୋଲିଂ ଲାଇନ୍ଅପ୍ ବିପକ୍ଷରେ ବାଂଲାଦେଶ ୬ ଉଇକେଟ ହରାଇ ୩୩୦ ରନ ସଂଗ୍ରହ କରିଛି। ବିଶ୍ୱକପ୍ ତଥା ଦିନିକିଆ ଦୃଷ୍ଟିକୋଣରୁ ଦେଖିବାକୁ ଗଲେ ଏହା ବାଂଲାଦେଶ ପାଇଁ ସର୍ବାଧିକ ସ୍କୋର ସାବ୍ୟସ୍ତ ହୋଇଛି। ଏହାପୂର୍ବରୁ ୨୦୧୫ରେ ପାକିସ୍ତାନ ବିପକ୍ଷରେ ବାଂଲାଦେଶ ୬ ଉଇକେଟ ହରାଇ ସର୍ବାଧିକ ୩୨୯ ରନ ସଂଗ୍ରହ କରିଥିଲା। ଉଇକେଟକିପର ବ୍ୟାଟ୍ସମ୍ୟାନ ମୁସ୍ଫିକର ରହିମ, ସାକିବ ଅଲ ହାସନ, ମହମୁଦୁଲ୍ଲା, ସୌମ୍ୟ ସରକାର ଦମ୍ଦାର ବ୍ୟାଟିଂ କରିବା ସହ ଦକ୍ଷିଣ ଆଫ୍ରିକା ବୋଲରଙ୍କ ଉଚିତ୍ ମୁକାବିଲା କରିଥିଲେ। ତାରକା ଓପନର ତାମିମ ଇକବାଲ ୧୬ ରନ କରି ପ୍ରଥମେ ଆଉଟ ହୋଇଥିଲେ। ୮୦ ବଲର ସମ୍ମୁଖୀନ ହୋଇ ମୁସ୍ଫିକର ୮ଟି ଚୌକା ସହ ସର୍ବାଧିକ ୭୮ ରନ ସଂଗ୍ରହ କରିଥିଲେ। ସେହିପରି ୮ ଚୌକା, ୧ ଛକା ସହ ୮୪ଟି ବଲ ଖେଳି ସାକିବ ୭୫, ୩୦ ବଲରୁ ୯ ଚୌକା ସହ ସୌମ୍ୟ ୪୨ ରନ କରି ଆଉଟ ହୋଇଥିଲେ। ମହମୁଦୁଲ୍ଲା ୩୩ଟି ବଲର ସମ୍ମୁଖୀନ ହୋଇ ୩ ଚୌକା ଓ ୧ ଛକା ସହ ୪୬ ରନ କରି ଅପରାଜିତ ରହି ଦଳକୁ ବଡ଼ ସ୍କୋର ପ୍ରଦାନ କରିଥିଲେ। ଅନ୍ୟମାନଙ୍କ ମଧ୍ୟରେ ମହମ୍ମଦ ମିଥୁନ ୨୧ ରନ କରି ଆଉଟ ହୋଇଥିବା ବେଳେ ମେହିଦି ହାସନ ୫ ରନ କରି ଅପରାଜିତ ରହିଥିଲେ। ତୃତୀୟ ଉଇକେଟ ଯୋଡିରେ ମୁସ୍ଫିକର ଓ ସାକିବ ୧୪୧ ବଲରୁ ୧୪୨ ରନ ସଂଗ୍ରହ କରି ଦଳକୁ ମଜଭୁତ ସ୍ଥିତି ପ୍ରଦାନ କରିଥିଲେ। ବୋଲିଂରେ ଦକ୍ଷିଣ ଆଫ୍ରିକା ତରଫରୁ ଅଭିଜ୍ଞ ସ୍ପିନର ଇମ୍ରାନ ତାହିର, କ୍ରିସ ମୋରିସ ଓ ଆଣ୍ଡିଲ ଫେଲୁକ୍ୱାୟୋ ୨ଟି ଲେଖାଏ ଉଇକେଟ ଅକ୍ତିଆର କରିଥିଲେ।
ସଂକ୍ଷିପ୍ତ ସ୍କୋର:
ବାଂଲାଦେଶ ୫୦ ଓଭରରେ ୩୩୦/୬
(ମୁସ୍ଫିକର- ୭୮, ସାକିବ- ୭୫, ମହମୁଦୁଲ୍ଲା- ୪୬*, ସୌମ୍ୟ- ୪୨, ମୋସାଡେକ- ୨୬, ଫେଲୁକ୍ୱାୟୋ- ୨/୫୨, ମୋରିସ- ୨/୭୩, ତାହିର- ୨/ ୫୭)।
ଦକ୍ଷିଣ ଆଫ୍ରିକା ୫୦ ଓଭରରେ ୩୦୯/୮
(ଡୁପ୍ଲେସି- ୬୨, ମାରକ୍ରାମ- ୪୫, ଡୁମିନି- ୪୫, ଦୁସେନ- ୪୧, ମିଲର- ୩୮, ଡିକକ-୨୩, ମୁସ୍ତାଫିଜୁର- ୩/୬୭, ସୈଫୁଦ୍ଦିନ- ୨/୫୭ )
