ଜଗତସିଂହପୁର ଅଫିସ,୨୭ା୫: ଲକ୍ଡାଉନ୍ ସମୟରେ ଘରେ ବସି ପ୍ରଶାସନ ନିକଟରେ ଅଭିଯୋଗ କରି ସମାଧାନ ପାଇଁ ଟୁଇଟର୍ ସୁଯୋଗ ସୃଷ୍ଟି କରୁଛି । କିନ୍ତୁ ଜିଲାର କୁଜଙ୍ଗ, ନାଉଗାଁ, ବିରିଡ଼ି, ବାଲିକୁଦା ଓ ଜଗତ୍ସିଂହପୁର ତହସିଲ କାର୍ଯ୍ୟାଳୟ ଟୁଇଟର୍ ଅପଡେଟ୍ ହେଉନାହିଁ। ଯେଉଁଥିପାଇଁ ଜିଲାପାଳ ସଂଗ୍ରାମ କେଶରୀ ମହାପାତ୍ର ସମ୍ପୃକ୍ତ ତହସିଲଦାରମାନଙ୍କୁ ତାଗିଦ୍ କରିଛନ୍ତି। ସେ ଏହି ତହସିଲଦାରମାନଙ୍କୁ ଚିଠି ମାଧ୍ୟମରେ ଲେଖିଛନ୍ତି, ପୂର୍ବରୁ ଏକାଧିକବାର ନିୟମିତ ଭାବରେ ତହସିଲ ଟୁଇଟର ଆକାଉଣ୍ଟ ଅପଡେଟ୍ କରିବାକୁ କୁହାଯାଇଛି। ଯେହେତୁ ଏବେ ଲକ୍ଡାଉନ ଚାଲିଛି ତେଣୁ ଲୋକଙ୍କୁ ଟୁଇଟର ମାଧ୍ୟମରେ ଅଭିଯୋଗ ଦାଖଲ କରିବାକୁ ସୁଯୋଗ ଦେଇଛି। ଅଭିଯୋଗର ସମାଧାନ ହୋଇଗଲେ ଏହା ତହସିଲକୁ ଉତ୍ତମ ଶାସନ ଯୋଗାଇବାରେ ସମର୍ଥ ହେବ। ଏଥିସହ ସାମାଜିକ ଦୂରତା, ମାସ୍କ ବାବଦରେ ଜରିମାନା ଆଦାୟ ଓ ବିଭିନ୍ନ ପ୍ରକାର ରାଜସ୍ବ ମାମଲା ଫଏସଲା ଆଦି ନିୟମିତ ଭାବରେ କରାଯିବା ସହ ତହସିଲ କାର୍ଯ୍ୟାଳୟ ଟୁଇଟ୍ର ଆକାଉଣ୍ଟରେ ଅପଡେଟ୍ ହେବା କଥା। କିନ୍ତୁ ତହସିଲଦାରମାନେ ଏଥିପ୍ରତି ଧ୍ୟାନ ଦେଉନାହାନ୍ତି ।
ସୂଚନା ଅନୁଯାୟୀ, କୁଜଙ୍ଗ ତହସିଲ କାର୍ଯ୍ୟାଳୟ ଗତ ୧୪ ତାରିଖ ପରଠାରୁ ତା’ର ଟୁଇଟର ଆକାଉଣ୍ଟ ଅପଡେଟ୍ କରିନି। ସେହିପରି ବିରିଡ଼ି ତହସିଲ ଗତ ୨୦ ତାରିଖ ପରେ, ବାଲିକୁଦା ୨୨, ଜଗତ୍ସିଂହପୁର ୧୭ ଓ ନାଉଗାଁ ତହସିଲ ଗତ ୧୩ ତାରିଖ ପରଠାରୁ ଅପଡେଟ୍ ହୋଇନାହିଁ । କେବଳ ଏତିକି ନୁହେଁ, ପ୍ରତି ତହସିଲରେ ଅତିରିକ୍ତ ତହସିଲଦାର ନିଯୁକ୍ତ ହୋଇଛନ୍ତି । ଏଥିସହ ସରକାରୀ ଗାଡ଼ି ରହିଛି । କିନ୍ତୁ ଆଶ୍ଚର୍ଯ୍ୟର କଥା ହେଲା ଏହା ଠିକ୍ ଭାବେ ବିନିଯୋଗ ହୋଇିପାରୁନାହିଁ । ଉପରୋକ୍ତ ପ୍ରସଙ୍ଗଗୁଡିକୁ ଦୃଷ୍ଟିଦେଲେ ତହସିଲ ଟୁଇଟର ଆକାଉଣ୍ଟ ନିୟମିତ ଅପଡେଟ୍ ହେବା ଜରୁରୀ। ଜିଲାପାଳଙ୍କ ଏହି ଟୁଇଟ୍ ଦେଖି ଏରସମା ବ୍ଲକ ଅନ୍ତର୍ଗତ ଗାରିଆର ରବୀନ୍ଦ୍ର ପ୍ରଧାନ ଟୁଇଟ୍ କରିଥିଲେ । ସେ ଲେଖିଥିଲେ ଅନ୍ୟ ଜାତିର ଝିଅଙ୍କୁ ବିବାହ କରିଥିବା ବାବଦ ସରକାରୀ ସହାୟତା ପାଇଁ ୨୦୧୮ରେ ଜିଲାପାଳଙ୍କ କାର୍ଯ୍ୟାଳୟରେ ଦରଖାସ୍ତ ସହ କାଗଜପତ୍ର ଦାଖଲ କରିଥିଲେ। କିନ୍ତୁ ଏହି ଦରଖାସ୍ତ ଉପରେ କି ବିଚାର କରାଯାଇଛି ଦୟାକରି ଜଣାଇପାରିବେ କି ? ସେ ଦରଖାସ୍ତ କରିବାର ଇତିମଧ୍ୟରେ ୨ ବର୍ଷ ହୋଇଯାଇଥିଲେ ସୁଦ୍ଧା ତାଙ୍କୁ ନ୍ୟାୟ ମିଳି ନ ଥିବା ଜାଣି ଆଶ୍ଚର୍ଯ୍ୟ ହୋଇଥିଲେ। ମାତ୍ର ତାଙ୍କ ଟୁଇଟର ଉତ୍ତର ଦେବାକୁ ଯାଇ ଜିଲାପାଳ ଲେଖିଥିଲେ ୨୩.୮.୧୮ରେ ଏରସମା ବିଡିଓଙ୍କୁ ତଦନ୍ତ କରିବା ପାଇଁ ଚିଠି କରାଯାଇଥିଲା। ଏଥିମଧ୍ୟରେ ବହୁ ବିଳମ୍ବ ହୋଇଯାଇଥିଲେ ସୁଦ୍ଧା ବୁଧବାର ରବୀନ୍ଦ୍ରଙ୍କ ଦରଖାସ୍ତର ବିଚାର ହେବ। ଏଥିସହ ଯେଉଁ କର୍ମଚାରୀଙ୍କ ଯୋଗୁ ବିଳମ୍ବ ହେଲା ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
