ଭୁବନେଶ୍ୱର, ୧୫।୩(ବ୍ୟୁରୋ): ରାଜଧାନୀରେ ଯୋଜନାବଦ୍ଧ ଭାବେ ଚାଲିଛି ସରକାରୀ ଜମି ଜବରଦଖଲ। ଶହ ଶହ ଏକର ଅନାବାଦୀ, ଗୋଚର, ଜଙ୍ଗଲ ଜମିକୁ କବ୍ଜା କରି ସେଥିରେ ଗଢ଼ିଉଠୁଛି କଂକ୍ରିଟ ଘର। ଏପରି କି ସହରର ବିଭିନ୍ନ ସ୍ଥାନରେ ରହିଥିବା ସାଧାରଣ ପ୍ରଶାସନ ବିଭାଗ (ଜିଏ ଡିପାର୍ଟମେଣ୍ଟ)ର ମୂଲ୍ୟବାନ ଜମି ମଧ୍ୟ ପ୍ରଭାବଶାଳୀଙ୍କ କବ୍ଜାରେ ରହିଥିବାବେଳେ ସେଠାରେ ଆଜ୍ବେଷ୍ଟସ ଘରଠାରୁ ଆରମ୍ଭ କରି ବହୁତଳ କୋଠା ଭଡ଼ାରେ ଲାଗିଥିବା ଦେଖିବାକୁ ମିଳୁଛି। ଭଡ଼ା ବାବଦକୁ ଆସୁଥିବା କୋଟି କୋଟି ଟଙ୍କାରେ ଦାୟିତ୍ୱରେ ରହୁଥିବା କେତେଜଣ ଅସାଧୁ ଅଧିକାରୀଙ୍କ ଭାଗ ମଧ୍ୟ ରହୁଛି। ଫଳରେ ସେମାନେ ପରୋକ୍ଷରେ ଜବରଦଖଲକାରୀଙ୍କୁ ସବୁକିଛି ସହଯୋଗ ଓ ସୁରକ୍ଷା ଯୋଗାଇ ଦେଉଛନ୍ତି। ଅଭିଯୋଗ ଅବା ଚାପ ପଡ଼ିଲେ କିପରି ଉଚ୍ଛେଦକୁ ଏଡ଼ାଇ ହେବ ତାହାର ଗଳାବାଟ ମଧ୍ୟ ବତାଇ ଦେଉଛନ୍ତି। ଫଳରେ ଅଧିକାଂଶ ଉଚ୍ଛେଦ ନାମକୁ ମାତ୍ର କରାଯାଇ ବାହାବା ନିଆଯାଉଛି। କ୍ୟାବିନ, ଜରିପାଲ ଘର, ଗାଈ ଗୁହାଳ ଭଙ୍ଗା ଉପରେ ଅଧିକ ଗୁରୁତ୍ୱ ଦିଆଯାଉଥିବାବେଳେ ସରକାରୀ ଜମି କବ୍ଜା କରି ଗଢ଼ି ଉଠିଥିବା ବହୁତଳ କଂକ୍ରିଟ କୋଠାକୁ ସୁରକ୍ଷା ଯୋଗାଇ ଦିଆଯାଉଥିବା ଅନେକ ନଜିର ରହିଛି। ଘଟଣାକ୍ରମରେ ଚନ୍ଦ୍ରଶେଖରପୁର ଥାନା ଅନ୍ତର୍ଗତ ଡମଣା ହାଟ ନିକଟରେ ଥିବା ସାଧାରଣ ପ୍ରଶାସନ ବିଭାଗର ପ୍ଲଟ ନଂ.୩୫୯ରେ ଏଭଳି ବେଆଇନ ନିର୍ମାଣ ଦେଖିବାକୁ ମିଳିଛି। ଭୁବନେଶ୍ୱର ସହର ୟୁନିଟ୍ ନଂ.୪୧ ଚନ୍ଦ୍ରଶେଖରପୁର ମୌଜା ଅନ୍ତର୍ଗତ ଉକ୍ତ ୭୮୦ ଡିସିମିଲ୍ର ପ୍ଲଟ୍ଟି ଉନ୍ନତ ଯୋଜନା ଯୋଗ୍ୟ କିସମ ଅଟେ। ତାହାକୁ ଜବରଦଖଲ କରାଯାଇ ସେଥିରେ ତିଆରି ହୋଇଥିବା ୬୦ରୁ ଊର୍ଦ୍ଧ୍ୱ ଆଜବେଷ୍ଟସ୍ ଘର ଓ ଏକ ୩ ମହଲା କୋଠାର ୩୨ ବଖରା ଭଡ଼ା ସୂତ୍ରରେ ଦିଆଯାଇଛି। ଏପରି କି ବାକି ରହିଥିବା ଆଉ କିଛି ଜାଗାରେ ଆଗାମୀ ଦିନରେ ଆପାର୍ଟମେଣ୍ଟ ତିଆରି କରିବାକୁ ମଧ୍ୟ ଯୋଜନା ଚାଲିଥିବା ସୂଚନା ମିଳିଛି।
ଗତ କିଛିମାସ ତଳେ ବିଡିଏ, ବିଏମ୍ସି ଅଧିକାରୀମାନେ ଘଟଣାସ୍ଥଳରେ ପହଞ୍ଚତ୍ କିଛି ସମୟ ରହି ଜବରଦଖଲକାରୀଙ୍କୁ ପଚରାଉଚରା କରି ସେଠାରୁ ଫରିଯାଇଥିଲେ। ସେବେଠାରୁ ସେଠାରେ ଆଉ ଅଧିକାରୀଙ୍କ ପାଦ ପଡ଼ି ନ ଥିବା ଜଣାପଡିଛି।
ଏନେି ବିଡିଏ ଉଚ୍ଛେଦ ଅଧିକାରୀ ପ୍ରମୋଦ ପାତ୍ରଙ୍କୁ ପଚାରିବାରୁ ପଚାରିବାରୁ ସେ କହିଛନ୍ତି, ଉକ୍ତ ସରକାରୀ ଜମିକୁ ଜବରଦଖଲ କରାଯାଇ ସ୍ଥାୟୀ ନିର୍ମାଣ ହୋଇଥିବା ନେଇ କିଛିଦିନ ତଳେ ଅଭିଯୋଗ ହୋଇଥିଲା। ସେତେବେଳେ ଏହାର ତଦନ୍ତ ମଧ୍ୟ କରାଯାଇଥିଲା। ଅଧିକାର ଜାହିର କରୁଥିବା ଜବରଦଖଲକାରୀଙ୍କୁ ଆବଶ୍ୟକ ବୈଧ କାଗଜପତ୍ର ଦାଖଲ କରିବାକୁ କୁହାଯାଇଥିଲେ ମଧ୍ୟ ସେ ଏଯାଏ ତାହା ପ୍ରଦାନ କରିନାହାନ୍ତି। ସାଧାରଣ ପ୍ରଶାସନ ବିଭାଗର ରାଜସ୍ବ ପର୍ଯ୍ୟବେକ୍ଷକ ଅମିୟ ଦାସଙ୍କ କହିବା କଥା ହେଲା, ଉକ୍ତ ପ୍ଲଟ ନଂ.୩୫୯କୁ ଜବରଦଖଲ କରାଯିବା ନେଇ ଯାଞ୍ଚ ଓ ତଦନ୍ତ ଚାଲିଛି। ରିପୋର୍ଟ ଆସିଲେ ଶୀଘ୍ର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଆବଶ୍ୟକ ପଡ଼ିଲେ ବେଆଇନ ନିର୍ମାଣକୁ ଭଙ୍ଗାଯିବ।
