ଅଗରତାଲା,୧୧।୬: ତ୍ରିପୁରା ସରକାରରେ ସାମିଲ ହୋଇଥିବା ଦଳ ଆଇପିଏଫଟି(ଇଣ୍ଡିଜିନିୟସ୍ ପିପୁଲ୍ସ୍ ଫ୍ରଣ୍ଟ ଅଫ୍ ତ୍ରିପୁରା)ର ଜଣେ ବିଧାୟକ ସେହି ଯୁବତୀଙ୍କୁ ବିବାହ କରିଛନ୍ତି, ଯିଏ ତାଙ୍କ ଉପରେ ବଳାତ୍କାର ଅଭିଯୋଗ ଆଣିଥିଲେ। ସୂଚନାଯୋଗ୍ୟ,ଯୁବତୀ ଜଣଙ୍କ ମେ୨୦ରେ ବିଧାୟକଙ୍କ ବିରୋଧରେ ବଳାତ୍କାର ଅଭିଯୋଗ ନେଇ ଅଗରତାଲା ଥାନାରେ ଏକ ମାମଲା ରୁଜୁ କରିଥିଲେ। ବିଧାୟକ ତାଙ୍କୁ ବିବାହ ପ୍ରଲୋଭନ ଦେଖାଇ ଶାରୀରିକ ସମ୍ପର୍କ ରଖିବା ପରେ ଧୋକା ଦେଇଥିଲେ ବୋଲି ଯୁବତୀ ଜଣଙ୍କ ଅଭିଯୋଗ ଆଣିଥିଲେ। ଅପରପକ୍ଷରେ ଆଗୁଆ ଜାମିନ ପାଇଁ ବିଧାୟକ ତ୍ରିପୁରା ହାଇକୋର୍ଟରେ ଆବେଦନ କରିଥିବା ବେଳେ ଜୁନ ୧ରେ ଏହି ଆବେଦନକୁ ଖାରଜ କରିଦେଇଥିଲେ କୋର୍ଟ। ଏହାପରେ ଜୁନ୯ ତଥା ରବିବାର ବିଧାୟକ ଉକ୍ତ ଯୁବତୀଙ୍କ ସହ ଅଗରତାଲା ଚର୍ତ୍ତୃଦାସ ମନ୍ଦିରରେ ବିବାହ କରିଥିଲେ। ଏହି ବିବାହରେ ୨ ପକ୍ଷର ପରିବାର ସାମିଲ ହୋଇଥିବା ଜଣାପଡ଼ିଛି। ତେବେ ଭାରତୀୟ ଆଇନ ଆନୁସାରେ ବିବାହ ପରେ ବଳାତ୍କାର ଅପରାଧ ନୁହେଁ। ତେଣୁ ବିଧାୟକଙ୍କ ଉପରେ ଆଉ କୌଣସି ମାମଲା ରହିବ ନାହିଁ ବୋଲି ସୂଚନା ମିଳିଛି।
