ଭୁବନେଶ୍ୱର,୯।୩(ବ୍ୟୁରୋ): ସାମାନ୍ୟ ବଚସାକୁ କେନ୍ଦ୍ରକରି ନୟାପଲ୍ଲୀ ଥାନା ଆଇଆରସି ଭିଲେଜ ସାଇମନ୍ଦିର ନିକଟରେ ଜଣେ ଛାତ୍ରଙ୍କୁ ଭୁଜାଲିରେ ମରଣାନ୍ତକ ଆକ୍ରମଣ କରିବା ଘଟଣାରେ ପୋଲିସ ମୁଖ୍ୟ ଅଭିଯୁକ୍ତଙ୍କୁ ଗିରଫ କରିଛି। ସେ ହେଲେ ଜଗତ୍ସିଂପୁର ତିରତୋଲ ଅଞ୍ଚଳର ସଞ୍ଜୟ କୁମାର ନାୟକ(୨୦)। ଏହି ଘଟଣାରେ ସଞ୍ଜୟଙ୍କ ସହଯୋଗୀ ଓ ଅନ୍ୟ ୨ ଜଣ ନାବାଳକଙ୍କୁ ଧରିବା ନେଇ ପୋଲିସ ତଦନ୍ତ ଜାରି ରଖିଛି। ସୂଚନା ମୁତାବକ, ଏହି ଥାନା ଅନ୍ତର୍ଗତ ବାଜପେୟୀ ନଗର ଅଞ୍ଚଳରେ ଆକ୍ରମଣର ଶିକାର ଛାତ୍ର ଅନନ୍ତ ମହାନ୍ତି ରୁହନ୍ତି। ଗତ ଶୁକ୍ରବାର ସନ୍ଧ୍ୟା ୮ଟାରେ ସେ ଟିଉସନ୍ ସାରି ଘରକୁ ଫେରୁଥିବାବେଳେ ସାଇ ମନ୍ଦିର ଦେଇ ବାଇକରେ ଯାଉଥିବା ୨ଜଣ ନାବାଳକ ଅଶ୍ଳୀଳ ଭାଷାରେ ଗାଳିଗୁଲଜ କରି ଯାଉଥିଲେ। ଏହାକୁ ଅନନ୍ତ ବିରୋଧ କରିବାରୁ ଉଭୟଙ୍କ ମଧ୍ୟରେ ପାଟିତୁଣ୍ଡ ହୋଇ ହାତାହାତି ହୋଇଥିଲା। ଏଥିରେ ଉତକ୍ଷିପ୍ତ ହୋଇ ଦୁଇ ନାବଳକ ଫୋନ୍ କରି ଅଭିଯୁକ୍ତ ସଞ୍ଜୟଙ୍କୁ ଡକାଇଥିଲେ। ସଞ୍ଜୟ ସହଯୋଗୀଙ୍କ ସହ ଭୁଜାଲି ଧରି ଘଟଣାସ୍ଥଳରେ ପହଞ୍ଚତ୍ ଅନନ୍ତଙ୍କୁ ଭୁଜାଲିରେ ହାଣି ଫେରାର ହୋଇଯାଇଥିଲେ। ଏ ନେଇ ଅନନ୍ତଙ୍କ ପରିବାର ଲୋକ ଅଭିଯୋଗ କରିବା ପରେ ପୋଲିସ ନଂ.୧୨୬/୨୦ରେ ମାମଲା ରୁଜୁ କରି ସଞ୍ଜୟଙ୍କୁ ଗିରଫ କରିଥିଲା। ରବିବାର କୋର୍ଟ ଚାଲାଣ ପରେ ଜାମିନ ଖାରଜ ହେବାରୁ ସଞ୍ଜୟଙ୍କୁ ଜେଲ ଯିବାକୁ ପଡିଛି। ପ୍ରକାଶ ଥାଉକି ଅଭିଯୁକ୍ତ ସଞ୍ଜୟଙ୍କ ପିତା କୃଷ୍ଣ ନାୟକଙ୍କ ନୟାପଲ୍ଲୀ ଅଞ୍ଚଳରେ ରହୁଥିବା ଜଣେ ଭେଟେରାନ କ୍ରିମିନାଲ ତାରିଣୀଙ୍କ ସହ ପୂର୍ବରୁ ଶତ୍ରୁତା ରହିଥିଲା। ୨୦୧୩ରେ ଅଭିଯୁକ୍ତ ସଞ୍ଜୟଙ୍କ ଉପର ଦୁଇ ଭାଇ ତାରିଣୀ ଗ୍ୟାଙ୍ଗର ଜଣେ ଯୁବକଙ୍କୁ ହତ୍ୟା କରିବା ମାମଲାରେ ସମ୍ପୃକ୍ତି ନେଇ ପୂର୍ବରୁ ଜେଲ ଯାଇଥିଲେ। ପରେ ପୂର୍ବ ଶତ୍ରୁତାରୁ କେନ୍ଦ୍ର କରି ତାରିଣୀ ଅଭିଯୁକ୍ତ ସଞ୍ଜୟଙ୍କ ପିତା କୃଷ୍ଣ ନାୟକଙ୍କୁ ହତ୍ୟା କରିବା ମାମଲାରେ ସଂପୃକ୍ତି ନେଇ ଜେଲ ଯାଇଥିଲେ।
