ବ୍ରହ୍ମପୁର ଅଫିସ,୩ା୨-ବେକାର ଯୁବତୀ ଯୁବକଙ୍କୁ ଚାକିରି କରାଇଦେବା ନାଁରେ ଲକ୍ଷ ଲକ୍ଷ ଟଙ୍କା ଠକେଇ କରିଥିବା ଏକ ଠକ ଗ୍ୟାଙ୍ଗର ମାଷ୍ଟରମାଇଣ୍ଡ ଓ ଜଣେ ଦଲାଲଙ୍କୁ ବୈଦ୍ୟନାଥପୁର ପୋଲିସ ଗିରଫ କରିଛି। ଏହି ଗ୍ୟାଙ୍ଗର ମାଷ୍ଟରମାଇଣ୍ଡ ଯାଜପୁରର ରବୀନ୍ଦ୍ର କୁମାର ବେହେରା ଓ ଦଲାଲ ଦିଗପହଣ୍ଡି ଥାନା ଗୁହାଳପୁରର ଅରୁଣ କୁମାର ବେହେରାଙ୍କୁ ଜେଲ ପଠାଇଛି। ଗଞ୍ଜାମ ଜିଲାର ୫୦ ଆଶାୟୀ ଯୁବତୀ ଯୁବକଙ୍କଠାରୁ ରବୀନ୍ଦ୍ର ୫୦ ଲକ୍ଷରୁ ଅଧିକ ଟଙ୍କା ଠକେଇ କରିଥିବା ଆୟୋଜିତ ଏକ ଖବରଦାତା ସମ୍ମିଳନୀରେ ବ୍ରହ୍ମପୁର ଏସ୍ପି ପିନାକ ମିଶ୍ର ସୂଚନା ଦେଇଛନ୍ତି। ରବୀନ୍ଦ୍ର ଭୁବନେଶ୍ୱରରେ ଥିବା ଆଞ୍ଚଳିକ ଶିକ୍ଷା ନିର୍ଦ୍ଦେଶାଳୟରେ ଚତୁର୍ଥ ଶ୍ରେଣୀ କର୍ମଚାରୀ ଭାବେ କାମ କରନ୍ତି। ସେ ଗଞ୍ଜାମ ଜିଲାରେ ରହୁଥିବା ବେକାର ଯୁବତୀ ଯୁବକଙ୍କୁ ଶିକ୍ଷକ ଓ କିରାଣି ନିଯୁକ୍ତି ଦେବା ପାଇଁ ଅରୁଣଙ୍କୁ ଦଲାଲ ଭାବେ ରଖିଥିଲେ। ଅରୁଣଙ୍କ ଜରିଆରେ ୨୦୧୮ ଓ ୨୦୧୯ରେ ୯ ଜଣ ବେକାର ଆଶାୟୀ ଯୁବକଙ୍କଠାରୁ ୩୮ ଲକ୍ଷ ୨୦ ହଜାର ଟଙ୍କା ଠକେଇ କରିଥିବା ଜଣାପଡ଼ିଛି ବୋଲି ଏସ୍ପି ମିଶ୍ର କହିଛନ୍ତି। ବୈଦ୍ୟନାଥପୁର ଥାନା କୃଷ୍ଣନଗରର ଜଣେ ମହିଳା ପୂର୍ଣ୍ଣିମା ବେହେରା ଥାନାରେ ଅଭିଯୋଗ କରିଥିଲେ, ତାଙ୍କ ପୁଅ ଦୁର୍ଗା ପ୍ରସାଦ ବେହେରା ଓ ଝିଅ ଶୁଭଶ୍ରୀ ଶୁଭସ୍ମିତା ବେହେରାଙ୍କୁ ଚାକିରି କରାଇଦେବା ନଁାରେ ସେ ଦେଇଥିବା ଟଙ୍କା ରବୀନ୍ଦ୍ର ଠକି ନେଇଛନ୍ତି। ପୋଲିସ ନଂ.୨୦/୨୦ ରେ ଏକ ମାମଲା ରୁଜୁ କରିଥିଲା। ଥାନାଧିକାରୀ ସାରଦା ପ୍ରସନ୍ନ ଦାସ ଓ ବ୍ରହ୍ମପୁର ଏସ୍ଡ଼ିପିଓ ବିଷ୍ଣୁପ୍ରସାଦ ପତିଙ୍କ ନେତୃତ୍ୱରେ ଗଠିତ ଟିମ୍ ଏହି ଠକ ଗ୍ୟାଙ୍ଗକୁ କାବୁ କରିଥିଲା ବୋଲି ଏସ୍ପି କହିଛନ୍ତି। ଅଭିଯୁକ୍ତଙ୍କୁ ଜେରାବେଳେ ସେମାନେ ଅନୁଗୋଳ, ପୁରୀ ଓ ତାଳଚେର ଅଞ୍ଚଳରେ ମଧ୍ୟ ବେକାର ଯୁବତୀ ଯୁବକଙ୍କୁ ଚାକିରି ଦେବା ନଁାରେ ଠକେଇ କରିଥିବା ଜଣାପଡ଼ିଛି। ଏହାର ଏବେ ତଦନ୍ତ ଜାରି ରହିଛି ବୋଲି ଏସ୍ପି କହିଛନ୍ତି। ପୋଲିସ ରବୀନ୍ଦ୍ରଙ୍କ ଘରେ ଚଢାଉ ବେଳେ ଭୁବନେଶ୍ୱର ପଟିଆ ଅଞ୍ଚଳରେ ୨ କୋଟି ଟଙ୍କାର ଏକ ପ୍ଲଟ ପାଇଁ ଏଗ୍ରିମେଣ୍ଟ କରିଥିବା କାଗଜପତ୍ର, ୭ ମୋବାଇଲ ଫୋନ, ବିଭିନ୍ନ ବ୍ୟାଙ୍କ ଚେକ ବହି, ବ୍ୟାଙ୍କ ଜମାଖାତା, ଏଟିଏମ୍ କାର୍ଡ ଓ ବେନାମୀ ନିଯୁକ୍ତି ପରିଚୟପତ୍ର ଜବତ କରିଛି। ଅଭିଯୁକ୍ତଙ୍କୁ ରିମାଣ୍ଡରେ ଆଣି ଜେରା କରାଗଲେ ଘଟଣା ଜଣାପଡିବ ବୋଲି ଏସ୍ପି ମିଶ୍ର କହିଛନ୍ତି।
