ଭୁବନେଶ୍ୱର,୨୩।୫(ବ୍ୟୁରୋ): ଗେଲ୍ ଇଣ୍ଡିଆ ଲିମିଟେଡ୍ ପକ୍ଷରୁ ଏହାର ଫ୍ଲାଗ୍ସିପ୍ କର୍ପୋରେଟ୍ ସୋସିଆଲ ରେସ୍ପନ୍ସିବିଲିଟି(ସିଏସ୍ଆର୍) କାର୍ଯ୍ୟକ୍ରମ ଅଧୀନରେ କାନପୁର ସେଣ୍ଟରଠାରେ ଜେଇଇ ମେନ୍ ୨୦୧୯ ପରୀକ୍ଷା ପାଇଁ କୋଚିଂ ନେଉଥିବା ସମସ୍ତ ଛାତ୍ରୀଛାତ୍ର ସଫଳତାର ସହ ଉତ୍ତୀର୍ଣ୍ଣ ହୋଇଛନ୍ତି। ଆର୍ଥିକ ସ୍ତରରେ ପଛୁଆବର୍ଗ ପିଲାମାନଙ୍କୁ ଉଚ୍ଚଶିକ୍ଷା ପ୍ରଦାନ ନିମନ୍ତେ ଗେଲ୍ ପକ୍ଷରୁ ‘ଗେଲ୍ ଉତ୍କର୍ଷ’ ନାମକ କାର୍ଯ୍ୟକ୍ରମ କାର୍ଯ୍ୟକାରୀ ହୋଇଥାଏ। ଚଳିତବର୍ଷ ଏଥିରେ ୧୦୦ଜଣ ଛାତ୍ରୀଛାତ୍ରଙ୍କୁ ଜେଇଇ ମେନ୍ ପାଇଁ ପ୍ରଶିକ୍ଷଣ ଦିଆଯାଉଥିବା ବେଳେ ପ୍ରଥମଥର ପାଇଁ ସମସ୍ତ ଛାତ୍ରୀଛାତ୍ର ଏହି ପ୍ରବେଶିକା ପରୀକ୍ଷା କ୍ଲିୟର କରିଛନ୍ତି, ଯାହା ମଧ୍ୟରେ ୧୪ଜଣ ଝିଅ ରହିଛନ୍ତି। ଗତବର୍ଷ ୧୦୦ଜଣ ଛାତ୍ରୀଛାତ୍ରଙ୍କ ମଧ୍ୟରୁ ୯୯ଜଣ ଜେଇଇ ମେନ୍ କ୍ଲିୟର୍ କରିଥିଲେ। ଅନ୍ୟପକ୍ଷରେ ଉତ୍ତରାଖଣ୍ଡରେ ପ୍ରତିଷ୍ଠା ହୋଇଥିବା ନୂଆ ସେଣ୍ଟରରେ ଚଳିତବର୍ଷ ୬୦ ଛାତ୍ରୀଛାତ୍ର ଜେଇଇ ମେନ୍ ପାଇଁ ପ୍ରଶିକ୍ଷଣ ନେଉଥିବା ବେଳେ ସେମାନଙ୍କ ମଧ୍ୟରୁ ୫୦ଜଣ ସଫଳତା ପାଇଛନ୍ତି। ଏ ନେଇ ଗେଲ୍ ନିର୍ଦ୍ଦେଶକ(ଏଚ୍ଆର୍) ପି.କେ. ଗୁପ୍ତା ବୁଧବାର ସୂଚନା ଦେଇଛନ୍ତି। ଏହି ଅବସରରେ ସଫଳତା ପାଇଥିବା ସମସ୍ତ ଛାତ୍ରୀଛାତ୍ରଙ୍କୁ ଗେଲ୍ ପକ୍ଷରୁ ସମ୍ବର୍ଦ୍ଧିତ କରାଯାଇଥିଲା। ସମ୍ବର୍ଦ୍ଧନା କାର୍ଯ୍ୟକ୍ରମରେ ଗେଲ୍ କାର୍ଯ୍ୟନିର୍ବାହୀ ନିର୍ଦ୍ଦେଶକ(ଏଚ୍ଆର୍, ସିଏସ୍ଆର୍) ପ୍ରାସୁନ୍ କୁମାର, ଗେଲ୍ର ଚିଫ୍ ଜେନେରାଲ ମ୍ୟାନେଜର(ସିଏସ୍ଆର୍) ଅନୁପ ଗୁପ୍ତା, ସିଏସ୍ଆର୍ଏଲ୍ ଡାଇରେକ୍ଟର ଏସ୍.କେ. ସାହି ପ୍ରମୁଖ ଉପସ୍ଥିତ ଥିଲେ।
ଗେଲ୍ ଉତ୍କର୍ଷ ଚଳିତବର୍ଷ ଏହାର ଦଶମ ବ୍ୟାଚ୍କୁ ରେସିଡେନ୍ସିଆଲ କୋଚିଂ ଯୋଗାଇଦେଇଥିବା ବେଳେ ଏକବର୍ଷ ପାଇଁ ଛାତ୍ରୀଛାତ୍ରଙ୍କୁ ମାଗଣା କୋଚିଂ ସହ ସମସ୍ତ ପ୍ରକାର ସୁବିଧା ସୁଯୋଗ ପ୍ରଦାନ କରାଯାଇଥିଲା। ସିଏସ୍ଆର୍ଏଲ୍ ସହ ମିଳିତ ଭାବେ ଗେଲ୍ ୨୦୦୯-୧୦ ଶିକ୍ଷାବର୍ଷରୁ ଏଭଳି କାର୍ଯ୍ୟକ୍ରମର ଆୟୋଜନ କରିଆସୁଛି। ପ୍ରଥମେ କାନପୁରରୁ ଆରମ୍ଭ ହୋଇଥିବା ଏହି କାର୍ଯ୍ୟକ୍ରମ ଏବେ ଦ୍ୱାରହାଟ, ଶ୍ରୀନଗର ଓ ଉତ୍ତରାଖଣ୍ଡରେ ମଧ୍ୟ ଅନୁଷ୍ଠିତ ହେଉଛି। ୨୦୦୯ରେ ମାତ୍ର ୨୩ଜଣ ଛାତ୍ରୀଛାତ୍ରଙ୍କୁ ନେଇ ଆରମ୍ଭ ହୋଇଥିବା ଏହି କାର୍ଯ୍ୟକ୍ରମ ଇତିମଧ୍ୟରେ ୬୮୩ଜଣ ଗରିବ ମେଧାବୀ ଛାତ୍ରୀଛାତ୍ରଙ୍କ ଭବିଷ୍ୟତ ସଜାଡ଼ିଛି। ୮୯% ସଫଳତା ସହ ପିଲାମାନେ ଆଇଆଇଟି, ଏନ୍ଆଇଟି ଭଳି ଶିକ୍ଷାନୁଷ୍ଠାନରେ ଶିକ୍ଷାଗ୍ରହଣ କରିବାର ସୁଯୋଗ ପାଇଛନ୍ତି।
