ଜମ୍ମୁ,୨୮।୨: ବରିଷ୍ଠ କଂଗ୍ରେସ ନେତା ଗୁଲାମ ନବୀ ଆଜାଦଙ୍କ ପୁତୁରା ମୁବାଶିର ଆଜାଦ ଭାଜପାରେ ସାମିଲ ହୋଇଛନ୍ତି। ତୃଣମୂଳସ୍ତରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବିକାଶମୂଳକ କାର୍ଯ୍ୟରେ ସେ ପ୍ରଭାବିତ ହୋଇଥିବା କହିଛନ୍ତି। ଗୁଲାମ ନବୀଙ୍କ ସାନଭାଇ ଲିଆକତ୍ ଅଲିଙ୍କ ପୁଅ ମୁବାଶିର। ଦାଦା ଗୁଲାମ ନବୀଙ୍କୁ କଂଗ୍ରେସ ନେତୃତ୍ୱ ଅସମ୍ମାନିତ କରୁଛି, ଯାହା ତାଙ୍କୁ ଆଘାତ ଦେଇଛି। ସେହି କାରଣରୁ ସେ ପୁରାତନ ଦଳ ଛାଡ଼ିବାକୁ ନିଷ୍ପତ୍ତି ନେଲେ ବୋଲି ମୁବାଶିର କହିଛନ୍ତି। ତେବେ ଭାଜପାରେ ସାମିଲ ହେବା ଯୋଜନା ସମ୍ପର୍କରେ ସେ ତାଙ୍କ ଦାଦାଙ୍କ ସହ ଆଲୋଚନା କରି ନ ଥିବା କହିଛନ୍ତି।
ଜମ୍ମୁ-କଶ୍ମୀରର ଭାଜପା ସଭାପତି ରବୀନ୍ଦ୍ର ରାଇନା ଏବଂ ଅନ୍ୟ ବରିଷ୍ଠ ନେତା ମୁବାଶିର ଓ ତାଙ୍କ ସମର୍ଥକମାନଙ୍କୁ ସ୍ବାଗତ କରିଛନ୍ତି। ଗୈରିକ ଦଳରେ ମୁବାଶିରଙ୍କ ଯୋଗଦାନ ଏକ ଟର୍ନିଂ ପଏଣ୍ଟ। ଡୋଡା, କିସ୍ତଓ୍ବାର ଏବଂ ରାମ୍ବାନ ଜିଲାରୁ ଅଧିକ ଯୁବ କର୍ମୀ ଦଳରେ ସାମିଲ ହେବାରେ ଏହା ସହାୟକ ହେବ ବୋଲି ରାଇନା କହିଛନ୍ତି। ୨୦୦୯ରେ ଗୁଲାମ ନବୀଙ୍କ ଭାଇ ଗୁଲାମ ଅଲି ଭାଜପାରେ ଯୋଗ ଦେଇଥିଲେ।
