ପାପଡାହାଣ୍ଡି,୨୦। ୬(ଡି.ଏନ.ଏ.): ଦୀର୍ଘ ଦିନ ହେଲା ଗ୍ରାମରେ ଲାଗି ରହିଛି ବିଭିନ୍ନ ସମସ୍ୟା । ପାନୀୟ ଜଳ, ବିଦ୍ୟୁତ୍, ଶିକ୍ଷା, ଆବାସ ଯୋଜନା ଆଦି ପହଞ୍ଚିିପାରିନି। ଗ୍ରାମର ବିକାଶରେ ବାଧକ ସାଜିଛି ରାସ୍ତା। ଜଙ୍ଗଲ ମୂଳକରେ ଭଗବାନ ଭରସାରେ ଜୀବନ ବିତାଉଛନ୍ତି ନବରଙ୍ଗପୁର ଜିଲା ପାପଡାହାଣ୍ଡି ବ୍ଲକ ମଇଦଲପୁର ପଞ୍ଚାୟତ ଅନ୍ତର୍ଗତ କୁସୁମଖୁଣ୍ଟା ଗ୍ରାମବାସୀ । ଲୋକଙ୍କ ସମସ୍ୟା ବୁଝିବା ଲାଗି ବୁଧବାର ଘଞ୍ଚ ଜଙ୍ଗଲ ରାସ୍ତାରେ ୫ କିମି ଦୂର ଚାଲି ଚାଲି ଯାଇଥିଲେ ପାପଡାହାଣ୍ଡି ବିଡିଓ ରଞ୍ଜିତା ମଲିକ । ଜଙ୍ଗଲ ମୂଲକରେ ବସବାସ କରନ୍ତି କୁସୁମଖୁଣ୍ଟା ଗ୍ରାମବାସୀ। ୨୦୧୫ ମସିହା ପରେ ଏଠାରେ ଗାଁ ଥିବା ଜଣାପଡିବାରୁ ପଞ୍ଚାୟତରେ ସାମିଲ କରାଯାଇ ଲୋକଙ୍କୁ ପରିଚୟ ପତ୍ର ପ୍ରଦାନ କରାଯାଇଥିଲା । ଗାଁର ଜନସଂଖ୍ୟା ପ୍ରାୟ ୧୨୦ ରୁ ଊର୍ଦ୍ଧ୍ୱ । ଗ୍ରାମରେ ରହିଛି ତଳ ସାହି ଓ ଉପର ସାହି । ମୁଖ୍ୟତଃ ସାନ୍ତା ଓ ପାଇକ ଶ୍ରେଣୀର ଲୋକେ ଏଠାରେ ବସବାସ କରନ୍ତି। ସାନ୍ତାମାନେ ରାୟଗଡା ଓ କାଶୀପୁର ଅଞ୍ଚଳରୁ ଏବଂ ପାଇକମାନେ ନିକଟସ୍ଥ ଗୁମିଦୋରା ଅଞ୍ଚଳରୁ ଆସି ଏଠାରେ ଦୀର୍ଘ ବର୍ଷ ହେଲା ବସବାସ କରୁଛନ୍ତି । ଚାଷ ସହ ବନଜାତ ଦ୍ରବ୍ୟ ସଂଗ୍ରହ କରି ବିକ୍ରି କରିବା ଲୋକଙ୍କ ମୁଖ୍ୟ ଜୀବିକା। ଗ୍ରାମର ମୁଖ୍ୟ ସମସ୍ୟା ହେଉଛି ପାନୀୟ ଜଳ । ଉପର ସାହି ଲୋକେ ଝରଣା ପାଣି ଓ ତଳ ସାହି ଲୋକେ କୂଅ କରି ପାଣି ପିଅନ୍ତି । ଗ୍ରାମରେ ଆବାସ ଯୋଜନାରେ କେହି ସାମିଲ ହୋଇ ପାରି ନାହାନ୍ତି । ଶିକ୍ଷା କହିଲେ ଗ୍ରାମର ପିଲାମାନେ ନିକଟସ୍ଥ କତରା ଗ୍ରାମର ହଷ୍ଟେଲରେ ରହିକି ପାଠ ପଢ଼ନ୍ତି । ବିଦ୍ୟୁତ ସେବା ବି ଅପହଞ୍ଚ । ଡିବିରି ଆଲୁଅ ହିଁ ଲୋକଙ୍କ ଭରସା। ଆଶା ଓ ଅଙ୍ଗନଓ୍ବାଡି କର୍ମୀ ଗାଁ କୁ ଯାଇ ସେବା ଯୋଗାଇଥାନ୍ତି। ଲୋକେ ମଇଦଲପୁର ଆସି ପଞ୍ଚାୟତରୁ ଚାଉଳ ନେଇଥାନ୍ତି । ଗ୍ରାମର ୪ ଜଣଙ୍କୁ ଭତ୍ତା ପ୍ରଦାନ କରାଯାଉଛି । ହେଲେ ଗ୍ରାମର ବିକାଶରେ ବାଧକ ସାଜିଛି ରାସ୍ତା । ଜଙ୍ଗଲ ସହ ପଥୁରିଆ ଖାଲ ଢିପ ରାସ୍ତା ଯୋଗୁଁ ଗ୍ରାମକୁ କୌଣସି ଗାଡି ଯାତାୟାତ କରେ ନାହିଁ। କରଲାକୋଟା ଗ୍ରାମରୁ କୁସୁମଖୁଣ୍ଟା ଯିବାକୁ ହେଲେ ୫ କିମି ଘଞ୍ଚ ଅରଣ୍ୟ ରାସ୍ତା ରହିଛ। ବୁଧବାର ବିଡିଓ ରଞ୍ଜିତା ଦୀର୍ଘ ୫ କ.ିମ.ି ରାସ୍ତା ଚାଲି ଚାଲି ଗ୍ରାମରେ ପହଞ୍ଚି ଥିଲେ । ସେଠାରେ ଲୋକଙ୍କ ସହ ବିଭିନ୍ନ ସମସ୍ୟା ସମ୍ପର୍କରେ ଆଲୋଚନ କରିଥିଲେ। ଲୋକମାନେ କିପରି ସରକାର ଯୋଜନାରୁ ବଞ୍ଚିତ ନ ହେବେ ସେ ନେଇ ପ୍ରତିଶ୍ରୁତି ଦେବା ସହ ସମସ୍ୟା ସମ୍ପର୍କରେ ଜିଲାପାଳଙ୍କୁ ଅବଗତ କରାଇବି ବୋଲି କହିଥିଲେ। ଝରଣା ପାଣି ବ୍ୟବହାର କରିବାକୁ ବାରଣ କରିବା ସହ ବର୍ଷା ଜଳକୁ ଗଚ୍ଛିତ କରି ବ୍ୟବହାର କଲେ ଭଲ ହେବ ବୋଲି ଗ୍ରାମବାସୀଙ୍କୁ କହିଥିଲେ । ସ୍ବାସ୍ଥ୍ୟ ସମସ୍ୟା ହେଲେ ଆଶା ଓ ଅଙ୍ଗନଓ୍ବାଡି କର୍ମୀଙ୍କ ପରାମର୍ଶ ନେବାକୁ କହିଥିଲେ । ବିଡିଓଙ୍କ ଗସ୍ତ ସମୟରେ ମଇଦଲପୁର ପଞ୍ଚାୟତ ନିର୍ବାହୀ ଅଧିକାରୀ ରମେଶ ଚନ୍ଦ୍ର ହରିଜନ, ଜିଆରଏସ ଦିଲୀପ କୁମାର ପଟ୍ଟନାୟକ, ଗାଦବା କୋତରା ପଞ୍ଚାୟତ ନିର୍ବାହୀ ଅଧିକାରୀ ନୀଳକଣ୍ଠ ଭତରା, ପଦଲାମ ଯାନୀ, ସହଦେବ ମୁଦୁଲି ପ୍ରମୁଖ ଉପସ୍ଥିତ ଥିଲେ ।
