ଲଣ୍ଡନ, ୨୮।୭ (ଏଏଫ୍ପି)-ଆୟର୍ଲାଣ୍ଡ ବିପକ୍ଷ ଟେଷ୍ଟ ପରାଜୟରୁ ବର୍ତ୍ତିଯିବା ପରେ ଇଂଲଣ୍ଡ କୋଚ୍ ଟ୍ରେଭର ବେଲିସ ଟେଷ୍ଟ ଖେଳାଳିଙ୍କ ସହ ‘ଗମ୍ଭୀର ଆଲୋଚନା’ କରିଥିବା ସ୍ବୀକାର କରିଛନ୍ତି। ୪ ଦିବସୀୟ ଏହି ଟେଷ୍ଟ ମ୍ୟାଚ୍ର ପ୍ରଥମ ଇନିଂସରେ ବିଶ୍ୱ ଚାମ୍ପିୟନ ଇଂଲଣ୍ଡ ମାତ୍ର ୮୫ ରନରେ ଅଲ୍ଆଉଟ୍ ହୋଇଯାଇଥିଲା। କିନ୍ତୁ ଆୟର୍ଲାଣ୍ଡକୁ ୨ୟ ଇନିଂସରେ ମାତ୍ର ୩୮ ରନରେ ଅଲ୍ଆଉଟ୍ କରିବା ସହ ମ୍ୟାଚ୍କୁ ୧୪୩ ରନରେ ଇଂଲଣ୍ଡ ଜିତି ନେଇଥିଲା। ବାମହାତୀ ସ୍ପିନର ତଥା ନାଇଟ୍ ଓ୍ବାଚ୍ମ୍ୟାନ ଜ୍ୟାକ୍ ଲିଚ୍ ଏହି ମ୍ୟାଚ୍ରେ ମୋଟ୍ ୯୨ ରନ ସଂଗ୍ରହ କରିଥିଲେ ମଧ୍ୟ ଐତିହାସିକ ଆଶେସ ସିରିଜର ପ୍ରଥମ ମ୍ୟାଚ୍ ଲାଗି ଘୋଷିତ ୧୪ ଜଣିଆ ଦଳରେ ତାଙ୍କୁ ସ୍ଥାନ ମିଳିନାହିଁ।
ରେଡିଓକୁ ଏକ ସାକ୍ଷାତ୍କାର ଅବସରରେ ବେଲିସ୍ କହିଛନ୍ତି, ‘ଆମେ ଏହି ମ୍ୟାଚ୍ ବିଷୟରେ ଗମ୍ଭୀର ଭାବେ ଆଲୋଚନା କରିଥିଲୁ। ଯେତେବେଳେ ଆମେ ମ୍ୟାଚ୍ ଜିତିସାରିଛୁ ତେଣୁ ଏହି ବାର୍ତ୍ତା ଦେବାକୁ ସକ୍ଷମ ହୋଇଛୁ। ମୁଁ ଏଠାରେ ଜ୍ୟାକ୍ ଲିଚ୍ଙ୍କ ଉଦାହରଣ ଦେବାକୁ ଚାହୁଁଛି। ଲିଚ୍ କେଉଁଭଳି ଭାବେ ଖେଳିବାକୁ ଚାହୁଁଥିଲେ ସେଥିପ୍ରତି ସେ ପୁରା ଫୋକସ୍ କରିଥିଲେ। ଅନ୍ୟ ବ୍ୟାଟ୍ସମ୍ୟାନମାନେ ତାଙ୍କଠାରୁ ଏହା ଶିଖିବା ଦରକାର’। ଅଗଷ୍ଟ ୧ରୁ ଏଜ୍ବାଷ୍ଟନଠାରେ ଅଷ୍ଟ୍ରେଲିଆ ଓ ଇଂଲଣ୍ଡ ମଧ୍ୟରେ ଆଶେସ ସିରିଜର ପ୍ରଥମ ମ୍ୟାଚ୍ ଆରମ୍ଭ ହେବ। ଏଥିଲାଗି ସୋମବାରଠାରୁ ଇଂଲଣ୍ଡ ଦଳର ଟ୍ରେନିଂସ ସେସନ ଆରମ୍ଭ ହେବ। ଯେଉଁଠାରେ ଜୋଫ୍ରା ଆର୍ଚରଙ୍କ ଫିଟ୍ନେଶ ଉପରେ ଆଲୋଚନା ହେବ ବୋଲି ବେଲିସ୍ କହିଛନ୍ତି।
