ଭୁବନେଶ୍ୱର,୨୯।୨(ସ୍ପୋଟର୍ସ ବ୍ୟୁରୋ): ଦେଶର ଦ୍ରୁତତମ ମହିଳା ଦୂତୀ ଚାନ୍ଦ ପୁଣିଥରେ ନିଜ ଖ୍ୟାତି ଅନୁରୂପ ପ୍ରଦର୍ଶନ କରିଛନ୍ତି। ଏଠାରେ ଚାଲିଥିବା ଖେଲୋ ଇଣ୍ଡିଆ ବିଶ୍ୱବିଦ୍ୟାଳୟ କ୍ରୀଡ଼ାରେ ସେ କିଟ୍ ବିଶ୍ୱବିଦ୍ୟାଳୟ ତରଫରୁ ପ୍ରତିନିଧିତ୍ୱ କରି ୧୦୦ମିଟର ଫାଇନାଲ ଦୌଡ଼ରେ ପ୍ରଥମ ସ୍ଥାନ ଅଧିକାର କରି ସ୍ବର୍ଣ୍ଣ ପଦକ ହାସଲ କରିଛନ୍ତି। ଶନିବାର ସ୍ଥାନୀୟ କଳିଙ୍ଗ ଷ୍ଟାଡିୟମରେ ଅନୁଷ୍ଠିତ ଏହି ଏହି ରେସ୍ରେ ସେ ୧୧.୪୯ ସେକେଣ୍ଡ ନେଇ ଏହି ସଫଳତା ପାଇଛନ୍ତି। ସେହିପରି ମାଙ୍ଗାଲୋର ବିଶ୍ୱବିଦ୍ୟାଳୟର ଏସ. ଧନଲକ୍ଷ୍ମୀ ୧୧.୯୯ ସେକେଣ୍ଡ ସମୟ ନେଇ ଦ୍ୱିତୀୟ ସ୍ଥାନରେ ରହିବା ସହ ରୌପ୍ୟ ପଦକ ହାସଲ କରିଛନ୍ତି। ଅନ୍ୟପଟେ ମହାତ୍ମା ଗାନ୍ଧୀ ବିଶ୍ୱବିଦ୍ୟାଳୟର ଏସ୍.ଏସ୍. ସ୍ନେହା ୧୨.୦୮ ସେକେଣ୍ଡ ସମୟ ନେଇ ତୃତୀୟ ସ୍ଥାନରେ ରହି ବ୍ରୋଞ୍ଜ୍ ପଦକ ଜିତିଛନ୍ତି। ଆଚାର୍ଯ୍ୟ ନାଗାର୍ଜୁନ ବିଶ୍ୱବିଦ୍ୟାଳୟର ଜ୍ୟୋତି ୟାରାଜୀ ୧୨. ୩୧ ସେକେଣ୍ଡ ସମୟ ନେଇ ଚତୁର୍ଥ, ଉତ୍କଳ ବିଶ୍ୱବିଦ୍ୟାଳର ଦୀପାଳି ମହାପାତ୍ର ୧୨. ୩୫ ସେକେଣ୍ଡ ସମୟ ନେଇ ପଞ୍ଚମ ସ୍ଥାନରେ ରହିଛନ୍ତି। ଉତ୍କଳ ତରଫରୁ ଅଂଶଗ୍ରହଣ କରିଥିବା ଅନ୍ୟତମ ଧାବିକା ବିନତି ବେହେରା ୧୩.୨୪ ସେକେଣ୍ଡ ସମୟ ନେଇ ଅଷ୍ଟମ ସ୍ଥାନରେ ରହିଛନ୍ତି।
ଏଥି ସହିତ ୨୪ ବର୍ଷୀୟା ଦୂତୀ ନୂଆ ମିଟ୍ ରେକର୍ଡ ସ୍ଥାପନ କରିଛନ୍ତି। ପୂର୍ବର ରେକର୍ଡ ୧୧. ୫୬କୁ ଦୂତୀ ଅତିକ୍ରମ କରିଛନ୍ତି। ଏହା ପୂର୍ବରୁ ସକାଳେ ସେମିଫାଇନାଲରେ ଦୂତୀ ୧୧. ୬୧ ସେକେଣ୍ଡ ସମୟ ନେଇଥିଲେ। ଫାଇନାଲରେ ସେ ପ୍ରଦର୍ଶନରେ ଉନ୍ନତି ଆଣିଛନ୍ତି। ଦୂତୀଙ୍କର ବ୍ୟକ୍ତିଗତ ଶ୍ରେଷ୍ଠ ପ୍ରଦର୍ଶନ ଥିଲା ୧୧.୨୨ ସେକେଣ୍ଡ। ଗତବର୍ଷ ଜାତୀୟ ଓପନ୍ ଆଥଲେଟିକ୍ସରେ ସେ ଏହି ସଫଳତା ହାସଲ କରି ନିଜର ପୂର୍ବର ରେକର୍ଡରେ ସୁଧାର ଆଣିଥିଲେ। ଦୂତୀ ଏବେ ଏହି ମେଗା ଇଭେଣ୍ଟର ଅନ୍ତିମ ଦିବସରେ ରବିବାର ୨୦୦ମି. ଦୌଡ଼ରେ ଅଂଶଗ୍ରହଣ କରିବେ। ଏହି ଇଭେଣ୍ଟରେ ଦୂତୀ ଅବଶ୍ୟ ଫେଭରାଇଟ ବିବେଚିତ ହେଉଛନ୍ତି। ଉଲ୍ଲେଖଥାଉ କି, ଦୂତୀ ୨୦୧୯ ଜୁଲାଇ ୧୦ ତାରିଖରେ ଇଟାଲୀର ନାପୋଲିରେ ଅନୁଷ୍ଠିତ ଓ୍ବାଲର୍ଡ ୟୁନିଭର୍ସିଟି ଗେମ୍ସରେ ୧୦୦ମିଟର ଦୌଡ଼ରେ ୧୧.୩୨ ସେକେଣ୍ଡ ସମୟ ନେଇ ସ୍ବର୍ଣ୍ଣ ପଦକ ହାସଲ କରିଥିଲେ। ସେ ପ୍ରଥମ ଭାରତୀୟ ଭାବେ ଏହି କ୍ରୀଡ଼ାରେ ୧୦୦ମି.ରେ ସ୍ବର୍ଣ୍ଣିମ ସଫଳତା ହାସଲ କରି ଇତିହାସ ସୃଷ୍ଟି କରିଥିଲେ। ପୂର୍ବରୁ କୌଣସି ଭାରତୀୟ ଓ୍ବାଲର୍ଡ ୟୁନିଭର୍ସିଟି ଗେମ୍ସ ଇତିହାସରେ ୧୦୦ମି. ଫାଇନାଲକୁ କ୍ୱାଲିଫାଏ କରିପାରି ନ ଥିଲେ।
