ନୂଆଦିଲ୍ଲୀ, ୩।୧୦ (ପି.ଟି.)- ବିଶ୍ୱକପ୍ ବିଜୟୀ ଭାରତୀୟ କ୍ରିକେଟ୍ ଦଳର ପୂର୍ବତନ ଅଧିନାୟକ କପିଳ ଦେବ ବୁଧବାର କ୍ରିକେଟ୍ ପରାମର୍ଶଦାତା କମିଟି (ସିଏସି)ରୁ ଇସ୍ତଫା ଦେଇଛନ୍ତି। ଦୈତ ସ୍ବାର୍ଥ ମାମଲାରେ ଭାରତୀୟ କ୍ରିକେଟ୍ କଣ୍ଟ୍ରୋଲ ବୋର୍ଡ (ବିସିସିଆଇ) ଏଥିକ୍ସ ଅଧିକାରୀ ଡି.କେ. ଜୈନଙ୍କ ନୋଟିସ୍ ମିଳିବା ପରେ କପିଳ ତୁରନ୍ତ ଏହି ନିଷ୍ପତ୍ତି ନେଇଛନ୍ତି। କପିଳଙ୍କ ପୂର୍ବରୁ ସିଏସିର ଅନ୍ୟତମ ସଦସ୍ୟା ତଥା ଭାରତୀୟ ମହିଳା କ୍ରିକେଟ୍ ଦଳର ପୂର୍ବତନ ଅଧିନାୟିକା ଶାନ୍ଥା ରଙ୍ଗାସ୍ବାମୀ ମଧ୍ୟ ଇସ୍ତଫା ଦେଇଥିଲେ। ପ୍ରଶାସକ ସମିତିର ମୁଖ୍ୟ ବିନୋଦ ରାଇ ଓ ବିସିସିଆଇ ସିଇଓ ରାହୁଲ ଜୋହରୀଙ୍କ ନିକଟକୁ କପିଳ ତାଙ୍କ ଇସ୍ତଫା ପତ୍ର ମେଲ୍ କରିଦେଇଥିଲେ। ସିଏସିର ସଦସ୍ୟ ହେବା ମୋ ପାଇଁ ଖୁସିର କଥା ଥିଲା ଏବଂ ମୁଖ୍ୟ କୋଚ୍ ଚୟନ କରିବା ସ୍ବତନ୍ତ୍ର ରହିଥିଲା ବୋଲି କପିଳ ଇସ୍ତଫା ପତ୍ରରେ ଉଲ୍ଲେଖ କରିଛନ୍ତି।
ଉଲ୍ଲେଖଯୋଗ୍ୟ, ନିକଟରେ ମଧ୍ୟପ୍ରଦେଶ କ୍ରିକେଟ୍ର ଆଜୀବନ ସଦସ୍ୟ ସଞ୍ଜୀବ ଗୁପ୍ତା ଅଭିଯୋଗ ଆଣିଥିଲେ କୋଚ୍ ଚୟନ ପାଇଁ ରହିଥିବା ସିଏସିର ସଦସ୍ୟ ରହିଥିବା ବ୍ୟକ୍ତି ଏକ ସମୟରେ ଏକାଧିକ ଭୂମିକା ନିଭାଉଛନ୍ତି। କପିଳ ଦେବ ସିଏସି ସଦସ୍ୟ ହେବା ସହ ଭାଷ୍ୟକାର, ଏକ ଫ୍ଲଡ ଲାଇଟ୍ କମ୍ପାନୀର ମାଲିକ ଓ ଭାରତୀୟ କ୍ରିକେଟ୍ ସଂଘର ସଦସ୍ୟ ରହିଛନ୍ତି। ରଙ୍ଗାସ୍ବାମୀ ଓ କପିଳଙ୍କ ପରେ ଏବେ ସିଏସିର ୩ୟ ସଦସ୍ୟ ରହିଥିବା ଅଂଶୁମାନ ଗାଏକ୍ୱାଡ ମଧ୍ୟ ନିକଟରେ ଇସ୍ତଫା ଦେବେ ବୋଲି ଚର୍ଚ୍ଚା ହେଉଛି।
