ରାୟପୁର/ମହାସମୁଦ/ସୁକ୍ମା: କରୋନା ସଂକ୍ରମଣ ରୋକିବାକୁ ଛତିଶଗଡ଼ ରାଜ୍ୟର ୩ ଗ୍ରାମର ବାସିନ୍ଦା ଟାଣିଛନ୍ତି ଲକ୍ଷ୍ମଣ ରେଖା। ୩୧ ମାର୍ଚ୍ଚ ଯାଏ ଗ୍ରାମ ଭିତରକୁ ବାହାରର କୌଣସି ବ୍ୟକ୍ତିଙ୍କ ପ୍ରବେଶ ଉପରେ ଲାଗିଛି କଟକଣା। କେବଳ ଏତିକି ନୁହେଁ, ବାହାର ରାଜ୍ୟରେ କାମ କରି ଫେରିଥିବା ୧୩ଜଣ ଯୁବକଙ୍କୁ ଗ୍ରାମଠାରୁ ଦେଢ଼ କିମି ଦୂରରେ କ୍ୱାରାଣ୍ଟାଇନ୍ରେ ରଖାଯାଇଛି।
ଛତିଶଗଡ଼ର ମହାସମୁଦ ଜିଲର ବାବନକେରା, କମାରଡେରା, ଜୋରାତରାଇ ଅଞ୍ଚଳବାସୀ କରୋନା ସଂକ୍ରମଣରୁ ରକ୍ଷା ଲାଗି ଗ୍ରାମ ବାହାରେ ବ୍ୟାନର ଟାଙ୍ଗିଛନ୍ତି। ଏଥିରେ ବାହାରୁ ଆସିଥିବା ବ୍ୟକ୍ତିଙ୍କ ଗ୍ରାମରେ ପ୍ରବେଶ ଉପରେ ପ୍ରତିବନ୍ଧକ ଲଗାଯାଇଥିବା ଦର୍ଶାଯାଇଛି। ସେହିପରି ଅଞ୍ଚଳରେ କେହି ଭିଡ଼ କିମ୍ବା ଗହଳି କରିପାରିବେ ନାହିଁ ବୋଲି ମଧ୍ୟ ଉକ୍ତ ବ୍ୟାନରରେ ଖେଳାଯାଇଛି। ବାବନକେରା ସରପଞ୍ଚ ଡୋଗେଶ ଟଣ୍ଡନ କୁହନ୍ତି, ଯାଞ୍ଚ କରିବାକୁ ଗ୍ରାମ ସୀମାନ୍ତରେ ଦୁଇଜଣଙ୍କୁ ମୁତୟନ କରାଯାଇଛି। କୌଣସି ଅଜଣା ବ୍ୟକ୍ତି ଗ୍ରାମକୁ ଆସିଲେ ପ୍ରଥମେ ସେମାନେ ପଚରାଉଚୁରା କରିବେ। ସନ୍ତୋଷଜନକ ଉତ୍ତର ଦେବା ପରେ ହିଁ ସେମାନଙ୍କୁ ଗଁାରେ ପଶିବାକୁ ଅନୁମତି ଦିଆଯାଉଛି।
ସେହିପରି ହାଇଦ୍ରାବାଦକୁ ଦାଦନ ଖଟିବାକୁ ଯାଇଥିବା ସୁକ୍ମା ଜିଲା ଛିନ୍ଦଗଡ଼ ବ୍ଲକ ପାକେଲା ଗ୍ରାମର ୧୩ ଯୁବକଙ୍କୁ ଗ୍ରାମରେ ପ୍ରବେଶ ଉପରେ କଟକଣା ଜାରି କରାଯାଇଛି। ସମସ୍ତଙ୍କ ସ୍ବାସ୍ଥ୍ୟାବସ୍ଥା ଯାଞ୍ଚ କରାଯାଇଛି। ପ୍ରାଥମିକ ରିପୋର୍ଟରେ ସେମାନେ ସୁସ୍ଥ ଥିବା ଜଣାପଡ଼ିଛି। ଏହାସତ୍ତ୍ୱେ ସେମାନଙ୍କ ସମ୍ପର୍କୀୟମାନେ ଗ୍ରାମବାସୀଙ୍କ ସହ ଆଲୋଚନା କରି ସେମାନଙ୍କୁ ଗ୍ରାମଠାରୁ ଦେଢ଼ କିମି ଦୂରରେ ରଖିଛନ୍ତି। ସେମାନଙ୍କ ଖାଇବା ପିଇବା ବନ୍ଦୋବସ୍ତ କରାଯାଇଛି। ଜରୁରୀ ରାଶନ ସାମଗ୍ରୀ ଯୋଗାଇ ଦିଆଯାଇଛି।
ଛତିଶଗଡ଼ର ରାଜଧାନୀ ରାୟପୁରର ହଜାର ହଜାର ପରିବାର ନିଜ ଘର ସାମ୍ନାରେ ଆଗନ୍ତୁକଙ୍କ ପାଇଁ ସାନିଟାଇଜର ବ୍ୟବସ୍ଥା କରିଛନ୍ତି। କେତେକ ଘରେ ଲେମ୍ବୁରେ ‘ଗୋ କରୋନା ଗୋ’ ଲେଖାଯାଇଥିବା ଦେଖିବାକୁ ମିଳିଛି। ହେଲେ ସୋସିଆଲ ମିଡିଆରେ ଏହି ଫଟୋ ଭାଇରାଲ ହେବାପରେ ମିଶ୍ରିତ ପ୍ରତିକ୍ରିୟା ପ୍ରକାଶ ପାଇଛି। କେତେଜଣ ଏହାକୁ ସ୍ବାଗତ କରିଥିବାବେଳେ ଅନ୍ୟ କେତେଜଣ ୟୁଜର ଏହାରକୁ କଟାକ୍ଷ କରିଛନ୍ତି। ସେ ଯାହା ହେଉ ନା କାହିଁକି ଏପରି କାର୍ଯ୍ୟରୁ ଲୋକମାନେ କରୋନା ପ୍ରତି ସଚେତନ ହେଉଥିବା ଅନୁମାନ କରାଯାଉଛି।
