ଗୁଣପୁର,୩ା୪ (ପ୍ରଦୀପ କୁମାର ପାଢ଼ୀ):କଂଗ୍ରେସ ଏବଂ ଭାଜପା ପକ୍ଷରୁ ରାୟଗଡା ଜିଲା ଗୁଣପୁର ବିଧାନସଭା ନିର୍ବାଚନମଣ୍ଡଳୀ ପାଇଁ ପ୍ରାର୍ଥୀ ଘୋଷଣା ହୋଇଛି। ୩ ପ୍ରମୁଖ ରାଜନୈତିକ ଦଳ ପକ୍ଷରୁ ପ୍ରାର୍ଥୀ ଘୋଷଣା ହେବା ପରେ ପୂର୍ବତନ ମୁଖ୍ୟମନ୍ତ୍ରୀ ଗିରିଧର ଗମାଙ୍ଗଙ୍କ ପରିବାରର ରାଜନୈତିକ ଭବିଷ୍ୟତ ନେଇ ପ୍ରଶ୍ନ ଉଠଛି। କାରଣ ଏହି ତାଲିକାରୁ ଗମାଙ୍ଗ ପରିବାରରୁ କେହି ସ୍ଥାନ ପାଇନାହାନ୍ତି। ଶିଶିର ଗମାଙ୍ଗ ନବରଙ୍ଗପୁରରୁ ଲୋକ ସଭା ପ୍ରାର୍ଥୀ ଏବଂ ଗୁଣପୁରରୁ ହେମା ଗମାଙ୍ଗ ବିଧାୟକ ପ୍ରାର୍ଥୀ ପାଇଁ ଆଶାୟୀ ଥିଲେ। ହେଲେ କଂଗ୍ରେସ ପକ୍ଷରୁ ଉଭୟ ସ୍ଥାନରେ ପ୍ରାର୍ଥୀ ଘୋଷଣା ହେବା ପରେ ସେମାନଙ୍କର ଆଶା ମଉଳି ଯାଇଛି। ବର୍ତ୍ତମାନ ସେମାନେ କ’ଣ କରିବେ ତାକୁ ନେଇ ଉଠିଛି ପ୍ରଶ୍ନ ା ପୂର୍ବତନ ମୁଖ୍ୟମନ୍ତ୍ରୀ ଗିରିଧର ଗମାଙ୍ଗଙ୍କ ପରିବାର କଂଗ୍ରେସ ଛାଡି ବିଭିନ୍ନ ରାଜନୈତିକ ଦଳକୁ ଯାଇ ଶେଷରେ ଗତ କିଛି ମାସ ପୂର୍ବରୁ କଂଗ୍ରେସକୁ ଫେରିଥିଲେ। ତାଙ୍କ ପରିବାର ପକ୍ଷରୁ ଟିକେଟ ପାଇଁ ଜୋରଦାର ଲବି କରାଯାଇଥିଲା, ଯାହାକୁ ନେଇ ହେମା ଏବଂ ତାଙ୍କ ପୁଅ ଶିଶିର ପ୍ରାର୍ଥୀ ହେବା ନେଇ ନାନା କଳ୍ପନା ଜଳ୍ପନା ଲାଗି ରହିଥିଲା। ହେଲେ ସେମାନଙ୍କର କୌଣସି ରଣକୌଶଳ କାମ ଦେଇ ନ ଥିଲା ା ଏମ୍ପି ସପ୍ତଗିରିଙ୍କ ପସନ୍ଦର ପ୍ରାର୍ଥୀ ସତ୍ୟଜିତ ଗମାଙ୍ଗ ଗୁଣପୁର ନିର୍ବାଚନ ମଣ୍ଡଳୀର ପ୍ରାର୍ଥୀ ହୋଇଛନ୍ତି।
କଂଗ୍ରେସ ଗୁଣପୁରରେ ଯୁବନେତା ସତ୍ୟଜିତ୍ ଗମାଙ୍ଗଙ୍କୁ ପ୍ରାର୍ଥୀ କରଛି। ସେହିପରି ଭାଜପା ପୂର୍ବତନ ବିଧାୟକ ତଥା ଦଳଡିଅଁା କରିଥିବା ବିଜେଡିର ତ୍ରିନାଥ ଗମାଙ୍ଗଙ୍କୁ ପ୍ରାର୍ଥୀ କରିଛି। କଂଗ୍ରେସରେ ପ୍ରାର୍ଥୀ ଘୋଷଣା ହେବା ପରେ ଆଶାୟୀଙ୍କ ମଧ୍ୟରେ ତୀବ୍ର ପ୍ର୍ରତିକ୍ରିୟା ପ୍ରକାଶ ପାଇଛି। ଦିନେ ଦୁଇ ଦିନ ମଧ୍ୟରେ ସେମାନଙ୍କର ପଦକ୍ଷେପ କ’ଣ ହେବ ସେ ଉପରେ ସୂଚନା ଦିଆଯିବ ବୋଲି ଜିଲା ସଭାପତି ବିଜୟ କୁମାର ଗମାଙ୍ଗ କହିଛନ୍ତି। ସେପଟେ ଏଥର ମଧ୍ୟ ଭାଜପା ଦଳଡିଆଁଙ୍କୁ ଗୁରୁତ୍ବ ଦେଇଛି ା ଏଥରକୁ ମିଶାଇ ୩ ଥର ଦଳଡିଅଁାଙ୍କୁ ପ୍ରାର୍ଥୀ କରିଛି ଭାଜପା। ୨୦୧୯ରେ ବିଜେଡିରୁ ଆସିଥିବା ଅଶ୍ୱିନୀ ଗମାଙ୍ଗ, ୨୦୧୪ରେ ବିଜେଡିରୁ ଆସିଥିବା ପୂର୍ବତନ ବିଧାୟକ ରାମମୂର୍ତ୍ତି ଗମାଙ୍ଗ ଏବଂ ୨୦୨୪ ନିର୍ବାଚନ ପାଇଁ ବିଜେଡିରୁ ଆସିଥିବା ତ୍ରିନାଥ ଗମାଙ୍ଗ ଭାଜପାରୁ ପ୍ରାର୍ଥୀ ହୋଇଛନ୍ତି। ଦଳ ନେତୃବୃନ୍ଦଙ୍କ ପକ୍ଷରୁ ଦଳରେ ଥିବା ନେତାଙ୍କୁ ପ୍ରାର୍ଥୀ କରାଯିବ ବୋଲି ଦମ୍ଭୋକ୍ତି କରାଯାଉଥିଲା, କିନ୍ତୁ ସେପରି ହେଲା ନାହିଁ। ଅନେକ ଆଶାୟୀ ଥିଲେ ମଧ୍ୟ ଦଳ ତ୍ରିନାଥଙ୍କ ଉପରେ ଆସ୍ଥା ପ୍ରକଟ କରିବାରୁ ଆଶାୟୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି।
କଂଗ୍ର୍ରେସରେ ଜିଲା ସଭାପତି ବିଜୟ ଗମାଙ୍ଗଙ୍କ ସମେତ ତାଙ୍କ ପୁଅ ଅଭିନାଶ ଗମାଙ୍ଗ ଓ ଭାସ୍କର ଜାଗରେଙ୍ଗା ପ୍ରମୁଖ ଆଶାୟୀ ଥିଲେ, କିନ୍ତୁ ସତ୍ୟଜିତଙ୍କୁ ପ୍ରାର୍ଥୀ କରିବା ପରେ ସେମାନଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଛି। ବିଜେଡି ପକ୍ଷରୁ ପୂର୍ବରୁ ଗତ ଦୁଇଥରର ପରମ୍ପରାକୁ ଭଙ୍ଗକରି ରିପିଟ ହୋଇଛନ୍ତି ବିଧାୟକ ରଘୁନାଥ ଗମାଙ୍ଗ। ସିପିଆଇଏମଏଲ ଲିବରେଶନ ପକ୍ଷରୁ ଗୁଣପୁର ବିଧାନସଭା ଦାବି କରାଯାଉଥିଲା, କିନ୍ତୁ ସେପରି ହେଲା ନାହିଁ। ତେଣୁ ସେମାନେ ମଧ୍ୟ ତାଙ୍କର ପ୍ରାର୍ଥୀ ଭାବେ ଅନାସିମ ଶବରଙ୍କ ନଁାକୁ ଜିଲା ସମ୍ପାଦକ ତ୍ରିପତି ଗମାଙ୍ଗ ଘୋଷଣା କରିଛନ୍ତି। ଏପରି ୪ ରାଜନୈତିକ ଦଳ ପକ୍ଷରୁ ଗୁଣପୁର ବିଧାନସଭା ନିର୍ବାଚନମଣ୍ଡଳୀ ପାଇଁ ପ୍ରାର୍ଥୀ ଘୋଷଣା କରାଯାଇଛି। ବିଜେଡି ପକ୍ଷରୁ ପ୍ରାର୍ଥିୀ ଘୋଷଣା ହେବା ପରେ ଭୋଜିଭାତ ସହ କର୍ମୀ ସମ୍ମିଳନୀ କରି ରଘୁନାଥ ଗମାଙ୍ଗ ପ୍ରଚାର ଆରମ୍ଭ କରିଛନ୍ତି ।
