କରୋନା ସମଗ୍ର ବିଶ୍ୱବାସୀଙ୍କୁ ଆତଙ୍କିତ କରିରଖିଛି। କରୋନା ଆକ୍ରାନ୍ତଙ୍କ ସଂଖ୍ୟା ଦିନକୁ ଦିନ ବଢ଼ି ଚାଲିଥିବା ବେଳେ ମୃତ୍ୟୁ ସଂଖ୍ୟା ମଧ୍ୟ ବଢ଼ୁଛି। ଚାଇନାର ଉହାନ ସହରରୁ ଆରମ୍ଭ ହୋଇଥିବା ଏହି ସଂକ୍ରମଣ ବର୍ତ୍ତମାନ ସାରା ଦେଶକୁ ବ୍ୟାପିସାରିଛି। ଏ ଭଳି ପରିସ୍ଥିତିରେ ସଚେତନ ରହିବାକୁ କୁହାଯାଉଥିବା ବେଳେ ବାରମ୍ବାର ହାତ ସଫା କରିବାକୁ କୁହାଯାଉଛି। କାରଣ ଅଧିକ ସଂକ୍ରମଣ ଆଶଙ୍କା ପାପୁଲିରେ ହିଁ ହୋଇଥାଏ। ଏ ନେଇ ସାବୁନ, ହ୍ୟାଣ୍ଡଓ୍ବାଶ ଓ ସାନିଟାଇଜର ବହୁଳ ବ୍ୟବହାର କରାଯାଉଛି। ତେବେ ଅନେକ ସମୟରେ କର୍ମକ୍ଷତ୍ର ହେଉ କିମ୍ବା ଯାତ୍ରା ସମୟରେ ହାତ ଧୋଇବା ସମ୍ଭବ ହୋଇ ନ ଥାଏ। ଏଭଳି ସ୍ଥଳେ ଲୋକେ ସାନିଟାଇଜର ବ୍ୟବହାର କରିଥାନ୍ତି। ବର୍ତ୍ତମାନ ପରିସ୍ଥିତିରେ ସାନିଟାଇଜର ଚାହିଦା ବଢ଼ିବା ସହ ବଜାରରେ ଏହା କମ୍ ଉପଲବ୍ଧ ହେଉଛି। ସାନିଟାଇଜର ଗତ ୫୪ ବର୍ଷ ଧରି ବ୍ୟବହାର କରାଯାଉଛି। ତେବେ ଆପଣ କ’ଣ ଏହା ଜାଣନ୍ତି ସାନିଟାଇଜର କିଏ ପ୍ରଥମେ ତିଆରି କରିଥିଲେ। ଏହା କିପରି ବ୍ୟବହାର କରାଯାଏ ତାହା ବିଶ୍ୱବାସୀଙ୍କୁ ଶିଖାଇଛନ୍ତି।
ଏକ ରିପୋର୍ଟ ଅନୁଯାୟୀ, ଏହାକୁ ୧୯୬୬ ମସିହାରେ ଆମେରିକାର କାଲିଫର୍ନିଆର ବକର୍ସଫିଲ୍ଡ ସହରରେ ରହୁଥିବା ଜଣେ ମହିଳା ଲୁପ ଫର୍ଣ୍ଣାଡିଜ୍ ତିଆରି କରିଥିଲେ। ଲୁପ୍ ଜଣେ ନର୍ସିଂ ଛାତ୍ରୀ ଥିଲେ ହଠାତ୍ ଦିନେ ତାଙ୍କ ମନକୁ ଆସିଲା ଯେ, ସେ କୌଣସି ରୋଗୀ ପାଖକୁ ଯିବା ପୂର୍ବରୁ କିମ୍ବା ତାଙ୍କ ପାଖରୁ ଆସିବା ପୂର୍ବରୁ ପାଣି କିମ୍ବା ସାବୁନ ନ ଥିଲେ ହାତ କିପରି ସଫା କରିବେ। ପରେ ସେ ସାବୁନଠାରୁ ଭିନ୍ନ ଏବଂ ପାଣି ବିନା କାମ କରୁଥିବା ଏକ ଜିନିଷ ତିଆରି କରିବା ପାଇଁ ଭାବିଲେ। ଯେଉଁଥିରେ ଜୀବାଣୁ ମଧ୍ୟ ମରିଯିବେ। ଏଭଳି ପରିସ୍ଥିତିରେ ସେ ଏକ ମଦ ଯୁକ୍ତ ଜେଲ୍ ତିଆରି କରି ତାକୁୁ ହାତରେ ଘଷିଲେ। ଏହି ଜେଲ୍ ଜେଲ ଜୀବାଣୁ ମାରିବାରେ ସାହାଯ୍ୟ କଲା। ଏହିପରି ତାଙ୍କର ଉଦ୍ଭାବନ ଧୀରେ ଧୀରେ ସମଗ୍ର ବିଶ୍ୱରେ ବ୍ୟାପିଗଲା ଏବଂ ବହୁ ସଂଖ୍ୟାରେ ବ୍ୟବହାର ହେବାକୁ ଲାଗିଲା। ଅନେକ ଲୋକେ ବର୍ତ୍ତମାନ ଲୁପ୍ଙ୍କୁ ଜାଣନ୍ତି ନାହିଁ। ସେ ଜୀବିତ କି ମୃତ ଏହା ମଧ୍ୟ ଜାଣନ୍ତି ନାହିଁ। ମାତ୍ର ତାଙ୍କର ‘ଉଦ୍ଭାବନ’ ସମସ୍ତଙ୍କ ଲାଗି ଆଜି ବରଦାନ ପାଲଟିଛି। ହ୍ୟାଣ୍ଡ ସାନିଟାଇଜରର ‘ଉଦ୍ଭାବକ’ ଭାବରେ ଲୁପ୍ ଫର୍ଣ୍ଣାଡିଜଙ୍କ ନାମ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଏ ନେଇ ଅନେକ ତାଙ୍କୁ ଧନ୍ୟବାଦ ଜଣାଇଛନ୍ତି। ଯାହାର ଆବିଷ୍କାର ବର୍ତ୍ତମାନ ଲକ୍ଷଲକ୍ଷ ଲୋକଙ୍କ ଲାଗି ଜୀବନ ବଞ୍ଚାଇବାରେ ସହାୟକ ହେଉଛି।
