ମୁମ୍ବାଇ,୨୪ା୩(ଆଇଏନ୍ଏସ୍): କୋଭିଡ-୧୯ ଭୂତାଣୁ ଭାରତରେ ଯେଉଁଭଳି ବ୍ୟାପିବାରେ ଲାଗିଛି, ଏହା ମାସକ ମଧ୍ୟରେ ଦେଶରେ ବଡ଼ଧରଣର ମେଡିକାଲ ବିପର୍ଯ୍ୟୟ ସୃଷ୍ଟି ହୋଇପାରେ। ଏଥିପାଇଁ ଅନ୍ତତଃ ଦୁଇସପ୍ତାହ ଜନତା କର୍ଫ୍ୟୁ କାର୍ଯ୍ୟକାରୀ ହେବା ଜରୁରୀ ବୋଲି ଜଣେ ମାଇକ୍ରୋବାୟୋଲୋଜିଷ୍ଟ ସତର୍କ କରାଇଦେଇଛନ୍ତି। ସାମାଜିକ ଦୂରତ୍ୱକୁ ଯଦି ଗୁରୁତର ଭାବେ କାର୍ଯ୍ୟକାରୀ କରା ନ ଯାଏ, ତେବେ ଏପ୍ରିଲ ଶେଷ ସୁଦ୍ଧା ହସ୍ପିଟାଲଗୁଡ଼ିକ ରୋଗୀରେ ଭର୍ତ୍ତି ହୋଇଯାଇପାରେ। ଭାରତରେ ଇଟାଲି ଓ ଇରାନ ଭଳି ସ୍ଥିତି ସୃଷ୍ଟି ହୋଇପାରେ ବୋଲି ଭାରତର ମାଇକ୍ରୋବାୟୋଲୋଜିଷ୍ଟ ସୋସାଇଟି (ଏମ୍ଏସ୍ଆଇ)ର ଅଧ୍ୟକ୍ଷ ଏ.ଏମ୍. ଦେଶମୁଖ ଆଶଙ୍କା ବ୍ୟକ୍ତ କରିଛନ୍ତି। ସେତେବେଳକୁ ସ୍ଥିତି ନିୟନ୍ତ୍ରଣ ବାହାରକୁ ଚାଲିଯିବ ବୋଲି ସେ କହିଛନ୍ତି। କରୋନା ସଂକ୍ରମଣ ରୋକିବା ଲାଗି ସରକାରଙ୍କ ନିର୍ଦ୍ଦେଶନାମା ଠିକ୍ ଭାବେ କାର୍ଯ୍ୟକାରୀ ହେଉ ନ ଥିବାରୁ ଦେଶମୁଖ ଉଦ୍ବେଗ ପ୍ରକାଶ କରିଛନ୍ତି। ଅନ୍ୟମାନଙ୍କ ସଂସ୍ପର୍ଶରେ ଆସିବା ଭୂତାଣୁ ସଂକ୍ରମଣର ସବୁଠୁ ବଡ଼ ବିପଦ ବୋଲି କୁହାଯାଉଛି। ସେଥିପାଇଁ ଅନୂ୍ୟନ ୧୪ ଦିନ ଦେଶରେ ଜନତା କର୍ଫ୍ୟୁ କାର୍ଯ୍ୟକାରୀ କରିବା ଲାଗି ଏମ୍ଏସ୍ଆଇ ପକ୍ଷରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଏକ ସ୍ମାରକପତ୍ର ପ୍ରଦାନ କରାଯାଇଛି।
ଦେଶମୁଖଙ୍କ କହିବା ଅନୁଯାୟୀ, କୋଭିଡ-୧୯ ଭୂତାଣୁ ସକ୍ରିୟ ହେବା ସମୟ ୧୪ ଦିନ। ଏହା ପରେ ଯଦି ରୋଗୀଠାରେ କରୋନା ପଜିଟିଭ୍ ଆସେ ତେବେ ସେମାନଙ୍କୁ ଚାଇନା, ଇଟାଲି ଭଳି ହସ୍ପିଟାଲରେ ଭର୍ତ୍ତି କରିବାକୁ ପଡିବ। ତେଣୁ ୧୪ ଦିନ ସମ୍ପୂର୍ଣ୍ଣ ଘରେ ରହିବା ଦ୍ୱାରା ସଂକ୍ରମଣକୁ ରୋକାଯାଇପାରିବ ବୋଲି ଏମ୍ଏସ୍ଆଇ ପକ୍ଷରୁ କୁହାଯାଇଛି।
