ମନ୍ଦିର ଭିତରକୁ କୁମ୍ଭୀର ପଶିଯିବା ଏକ ଅଚାନକ ଘଟଣା ହୋଇପାରେ, କିନ୍ତୁ ଗ୍ରାମବାସୀଙ୍କ ପାଇଁ ଥିଲା ଖୁସିର ସୁଯୋଗ। ଯେଉଁଥିପାଇଁ ବନ ବିଭାଗ କର୍ମଚାରୀଙ୍କୁ କୁମ୍ଭୀର ଉଦ୍ଧାର ପାଇଁ ଗ୍ରାମବାସୀ ବାଧା ସୃଷ୍ଟି କରିଥିଲେ। ସେମାନଙ୍କ ଧାରଣା ଥିଲା ମନ୍ଦିରର ଦେବୀଙ୍କ ବାହନ ହେଉଛି କୁମ୍ଭୀର। ଏପରି ଏକ ଘଟଣା ଘଟିଛି ଗୁଜରାଟର ମହିସାଗର ଜିଲାର ଖୋଦିୟାର ମାତା ମନ୍ଦିରରେ। ସ୍ଥାନୀୟ ମହିସାଗର ନଈରୁ ରାତିରେ ପଳାଇ ଆସିଥିବା କୁମ୍ଭୀରଟି ମନ୍ଦିରରେ ଆଶ୍ରୟ ନେବାପରେ ଗ୍ରାମବାସୀ ଏହାକୁ ଶୁଭସୂଚକ ମନେ କରିଥିଲେ। ଗୁଜରାଟରେ ପଟେଲ ସମ୍ପ୍ରଦାୟର ପାରିବାରିକ ଦେବୀ ହେଉଛନ୍ତି ଖୋଦିୟାର ମାତା। ସେ କୁମ୍ଭୀର ଉପରେ ସବାର ହୋଇ ଚଳପ୍ରଚଳ କରନ୍ତି ବୋଲି ଧର୍ମଗ୍ରନ୍ଥରେ ଉଲ୍ଲେଖ ରହିଛି। ମନ୍ଦିର ଭିତରେ କୁମ୍ଭୀର ଉପସ୍ଥିତି ଜାଣିବା ପରେ ବହୁ ସଂଖ୍ୟକ ଲୋକ ସେଠାରେ ସମବେତ ହୋଇ ପ୍ରାର୍ଥନା ଓ ଆଳତି କରିବା ସହିତ ୬ଫୁଟ ବିଶିଷ୍ଟ କୁମ୍ଭୀର ଉପରେ ସିନ୍ଦୂର ସିଞ୍ଚନ କରିଥିଲେ। କୁମ୍ଭୀରଟି ଦେବୀମୂର୍ତ୍ତିଙ୍କ ନିକଟରେ ପଡି ରହିଥିଲା। ବନ ବିଭାଗ କର୍ମଚାରୀମାନେ ଏହାକୁ ଉଦ୍ଧାର ପାଇଁ ଉଦ୍ୟମ କରିବାବେଳେ ଗ୍ରାମବାସୀ ବିରୋଧ କରିଥିଲେ। ଗ୍ରାମବାସୀଙ୍କ ଧର୍ମୀୟ ଭାବାବେଗକୁ ଆଘାତ ପହଞ୍ଚାଇବାକୁ ବନ କର୍ମଚାରୀମାନେ ଚାହିଁ ନ ଥିଲେ। ଦୁଇଘଣ୍ଟା ବିତିଯିବା ପରେ କୌଣସି ପ୍ରକାରେ କୁମ୍ଭୀରକୁ ସେଠାରୁ ଉଦ୍ଧାର କରାଯାଇଥିଲା। ସ୍ଥାନୀୟ ଲୋକଙ୍କ ଧର୍ମଧାରଣା ପାଇଁ ମନ୍ଦିର ଭିତରେ କୁମ୍ଭୀରକୁ ପୂଜା କରିବା ଘଟଣା ସୋସିଆଲ ମିଡିଆରେ ଭାଇରାଲ ହୋଇଛି।
