ଅରୁଣାଚଳପ୍ରଦେଶର ଆଇଏଏସ୍ ଅଧିକାରୀ ଦେବାଂଶ ଯାଦବ ପ୍ରଶାସନିକ କାର୍ଯ୍ୟ ବ୍ୟସ୍ତତା ମଧ୍ୟରୁ ସମୟ ବାହାର କରି ଗରିବ ଛାତ୍ରଙ୍କୁ ଶିକ୍ଷା ଦେବାର ବ୍ୟବସ୍ଥା କରୁଛନ୍ତି। ଛାଙ୍ଗଲାଙ୍ଗର ଡେପୁଟି କମିଶନର ଭାବେ ଦାୟିତ୍ୱ ତୁଲାଉଥିବା ଦେବାଂଶ ଲୋକମାନଙ୍କ ଅନୁଦାନରେ ଦ୍ୱାଦଶ ବୋର୍ଡ ପରୀକ୍ଷାରେ ୮୦%ରୁ ଅଧିକ ନମ୍ବର ରଖୁଥିବା ୩ଜଣ ଛାତ୍ରଙ୍କୁ ଉଚ୍ଚଶିକ୍ଷା ଦେବାରେ ସଫଳ ହୋଇଛନ୍ତି। ଏହି ଛାତ୍ରମାନଙ୍କ ମଧ୍ୟରେ ଜଣେ ୮୯.୪ % ନମ୍ବର ରଖିଛନ୍ତି। ଏଭଳି ପିଲାମାନଙ୍କୁ ଆର୍ଥିକ ସହାୟତା ଦେବା ଲାଗି ଅନୁରୋଧ କରାଯିବା ପରେ ଦେଶର ବିଭିନ୍ନ ଅଞ୍ଚଳରୁ ଏହା ଆସିବାରେ ଲାଗିଛି। ପ୍ରଥମ ସପ୍ତାହରେ ଲୋକମାନଙ୍କଠାରୁ ୩ ଲକ୍ଷ ଟଙ୍କା ମିଳିଛି ବୋଲି କହନ୍ତି ଦେବାଂଶ। ପରେ ଅଧିକରୁ ଅଧିକ ଆର୍ଥିକ ସାହାଯ୍ୟ ଆସୁଛି। ଅକ୍ଟୋବର ୨୬ରେ ଏହି ଅଭିଯାନ ଆରମ୍ଭ କରାଯାଇଥିଲା। ଏବେ ଯେଉଁ ଅର୍ଥ ମିଳିଛି ସେଥିରୁ ହଷ୍ଟେଲରେ ରହିବା, ଟ୍ୟୁସନ ଫି,ଯିବା ଆସିବା ଓ ଖାଇବା ଖର୍ଚ୍ଚ ବାବଦରେ ସେମାନଙ୍କୁ ପ୍ରଦାନ କରାଯିବ ବୋଲି କହନ୍ତି ଦେବାଂଶ। ଏହି ଛାତ୍ରମାନେ ଉଚ୍ଚଶିକ୍ଷା ଲାଗି ଦିଲ୍ଲୀ ବିଶ୍ୱବିଦ୍ୟାଳୟରେ ପଢ଼ିବାର ସୁଯୋଗ ପାଇପାରିଛନ୍ତି। କେବଳ ଏମାନେ ନୁହନ୍ତି ଆହୁରି ଅଧିକ ପିଲାଙ୍କୁ ସାହାଯ୍ୟ କରିବା ଲାଗି ସେ ଯୋଜନା କରିଛନ୍ତି। ଦେବାଂଶ କହନ୍ତି, ଲୋକମାନେ ଯେଉଁ ଅର୍ଥ ଦାନ କରୁଛନ୍ତି ତାହାର ରେକର୍ଡ ରଖାଯିବା ସହ ତାହାକୁ ସୋସିଆଲ ମିଡିଆରେ ବି ଶେୟାର କରାଯିବ। ଏହି ପିଲାମାନଙ୍କର ବ୍ୟାଙ୍କ୍ ଆକାଉଣ୍ଟରେ ଖୁବ୍ ଶୀଘ୍ର ଟଙ୍କା ଜମା କରାଯିବ। ଏହା ମଧ୍ୟ ଦାନ ଦେଇଥିବା ଲୋକମାନଙ୍କୁ ଜଣାଇ ଦିଆଯିବ।
