ଗଞ୍ଜାମ,୧୬।୧(ଡି.ଏନ୍.ଏ.): ଗଞ୍ଜାମସ୍ଥିତ ଋଷିକୂଲ୍ୟାକୁ ଗୁରୁବାର ପୂର୍ବାହ୍ନରେ ଜଣେ କଲେଜ ଛାତ୍ରୀ ଡେଇଁ ଆତ୍ମହତ୍ୟା ଉଦ୍ୟମ କରୁଥିବା ବେଳେ ଧୀବରମାନେ ତାଙ୍କୁ ଉଦ୍ଧାର କରିଛନ୍ତି। ସେ ହେଲେ ଚିକଲଖଣ୍ଡି ଗ୍ରାମର। କୌଣସି କାରଣରୁ ସେ ଆତ୍ମହତ୍ୟା ଉଦ୍ୟମ କରିଥିବା ବେଳେ ସେଠାରେ ମାଛ ଧରୁଥିବା ସୁକାନ୍ତ ବେହେରା, ପବିତ୍ର ବେହେରା ତାଙ୍କୁ ଉଦ୍ଧାର କରିଛନ୍ତି। ପୂର୍ବତନ ସାଂସଦ ପ୍ରତିନିଧି ସୁଧୀର ପାଢ଼ୀ ଏବଂ ସାମାଜିକ କର୍ମୀ ଉମାକାନ୍ତ ବେହେରାଙ୍କ ସହଯୋଗରେ ତାଙ୍କୁ ଗଞ୍ଜାମ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଛି। ତାଙ୍କ ସ୍ବାସ୍ଥ୍ୟାବସ୍ଥା ସ୍ଥିର ଥିବା ଫାର୍ମାସିଷ୍ଟ ଶ୍ରୀମୟ ରଥ କହିଛନ୍ତି। ଘଟଣାସ୍ଥଳରେ ଗଞ୍ଜାମ ପୋଲିସ ପହଞ୍ଚି ସଂପୃକ୍ତ ଛାତ୍ରୀଙ୍କୁ ଥାନାକୁ ନେଇଛନ୍ତି। ନଦୀକୂଳରୁ ଛାତ୍ରୀଙ୍କ ସାଇକେଲ ମଧ୍ୟ ଉଦ୍ଧାର କରାଯାଇଛି।
