ଛତ୍ରପୁର,୧୧ା୬(ଡି.ଏନ.ଏ)-ଗଞ୍ଜାମ ଜିଲାରେ ଥିବା ଅଙ୍ଗନୱାଡି କେନ୍ଦ୍ରଗୁଡିିକୁ ଅଧିକ ଆକର୍ଷଣୀୟ କରାଯିବ। ଛୋଟ ପିଲାଙ୍କୁ ଆକୃଷ୍ଟ କଲା ଭଳି ଚଟାଣରେ ଭିନାଇଲ୍ ଫ୍ଲୋରିଂ କାର୍ପେଟ ପଡ଼ିବ। ବିଦ୍ୟୁତ, ପାନୀୟଜଳ ଏବଂ ଶୌଚାଳୟ ସୁନିଶ୍ଚିତ ରହିବ। ପିଲାଙ୍କ ଖେଳିବା ପାଇଁ ନିର୍ଦ୍ଧିଷ୍ଟ ସ୍ଥାନ ରହିବ। ଜିଲାରେ ଥିବା ୫,୧୪୧ ଅଙ୍ଗନୱାଡି କେନ୍ଦ୍ର ମଧ୍ୟରୁ ୨୪୦ଟିରେ ପ୍ରଥମେ ଏହା କାର୍ଯ୍ୟକାରୀ ହେବ। ସୋମବାର ଛତ୍ରପୁରସ୍ଥିତ ଜିଲାପାଳଙ୍କ ସମ୍ମିଳନୀ ଗୃହରେ ଅନୁଷ୍ଠିିତ ସମନ୍ବିତ ଶିଶୁ ବିକାଶ ପ୍ରକଳ୍ପ ସମୀକ୍ଷା ବୈଠକରୁ ଏହା ଜଣାପଡିଛି। ବୈଠକରେ ଜିଲାପାଳ ବିଜୟ ଅମୃତା କୁଲାଙ୍ଗେ ଅଧ୍ୟକ୍ଷତା କରିଥିଲେ। ବୈଠକରୁ ଆହୁରି ଜଣାପଡିଛି ଯେ, ଅଙ୍ଗନୱାଡି କର୍ମଚାରୀ ସଫାସୁତୁରା ହୋଇ କେନ୍ଦ୍ରକୁ ଆସିବେ। ସୁପରଭାଇଜରମାନେ ରିତିମତ କେନ୍ଦ୍ର ପରିଦର୍ଶନରେ ଯିବେ। ଯିଏ ଅବହେଳା କରିବ ତାଙ୍କୁ କାରଣ ଦର୍ଶାଅ ନୋଟିସ୍ ଜାରି ହେବ। ଜିଲାପାଳ ନିଜେ ଏହାର ଶୁଣାଣି କରିବେ। ଆକର୍ଷଣୀୟ ଅଙ୍ଗନୱାଡି କେନ୍ଦ୍ରର ଫଟୋ ପଞ୍ଚାୟତ କାର୍ଯ୍ୟାଳୟରେ ଲାଗିବ। ଏବେଠାରୁ ଅଙ୍ଗନୱାଡି କେନ୍ଦ୍ର ଗୁଡିକର ନୂତନ ଭାବେ ହେଉଥିବା ଘର ପ୍ରାଥମିକ ବିଦ୍ୟାଳୟ ପରିସରରେ କରିବା ପାଇଁ ଜିଲାପାଳ କହିଛନ୍ତି। ଅଙ୍ଗନୱାଡି କେନ୍ଦ୍ରକୁ ସହଯୋଗ କରିବା ପାଇଁ ସ୍ଥାନୀୟ ବ୍ୟକ୍ତିବିଶେଷ କିମ୍ବା ଅନୁଷ୍ଠାନଗୁଡିକୁ ପତ୍ର ମାଧ୍ୟମରେ ଅନୁରୋଧ କରାଯିବ। ଲୁଚାଛପାରେ ଯଦି କେଉଁଠି ଭ୍ରୁଣ ଲିଙ୍ଗ ନିରୂପଣ କରାଯାଇଥାଏ, ଅଙ୍ଗନୱାଡି କର୍ମୀମାନେ ଖବର ସଂଗ୍ରହ କରି ଜିଲା ପ୍ରଶାସନକୁ ଜଣାଇବାକୁ ନିର୍ଦ୍ଦେଶ ଦିଆଯାଇଛି। ସ୍ବୟଂସହାୟିକା ଗୋଷ୍ଠୀଗୁଡିକୁ ଅତ୍ୟଧିକ କ୍ରିୟାଶୀଳ କରାଯିବ। ସେମାନଙ୍କ ପାଇଁ ସ୍ବତନ୍ତ୍ର ଭାବରେ ମାର୍କେଟ ୟାର୍ଡ ହେବ। ପ୍ରଥମ ପର୍ଯ୍ୟାୟରେ ବ୍ରହ୍ମପୁର, ଛତ୍ରପୁର, ହିଞ୍ଜିଳି ଓ ଆସିକାରେ ମାର୍କେଟ ୟାର୍ଡ ସ୍ଥାପନ କରାଯିବାକୁ ସ୍ଥିର ହୋଇଛି। ଗ୍ରାମପଞ୍ଚାୟତ ସ୍ତରରେ ମିଶନ ଶକ୍ତି ଗୃହ କରାଯିବ। ଜିଲାରେ ବାଲ୍ୟ ବିବାହକୁ ପ୍ରତିହତ କରିବା ପାଇଁ ସ୍ବଂୟ ସହାୟିକା ଗୋଷ୍ଠୀଙ୍କ ସହାୟତା ନିଆଯିବ। ବୈଠକରେ ଜିଲା ସମାଜମଙ୍ଗଳ ଅଧିକାରୀ ମନୋରମା ରେଡ୍ଡୀ, ଜିଲା ଶିଶୁ ସୁରକ୍ଷା ଅଧିକାରୀ ସୁବୋଧ ଷଡଙ୍ଗୀ ଏବଂ ଅନ୍ୟମାନେ ଉପସ୍ଥିତ ଥିଲେ।
