ଭୁବନେଶ୍ୱର,୧୧।୬(ବ୍ୟୁରୋ)-: ମହାପ୍ରଭୁ ଶ୍ରୀଜଗନ୍ନାଥଙ୍କ ବିଶ୍ୱପ୍ରସିଦ୍ଧ ରଥଯାତ୍ରାର ସିଧା ପ୍ରସାରଣକୁ ବ୍ୟବସାୟୀକରଣ କରିବା ପାଇଁ ମନ୍ଦିର ପ୍ରଶାସନ ପକ୍ଷରୁ ଗତ ୪ ତାରିଖରେ ଏକ ଚିଠି ଜରିଆରେ ବିଜ୍ଞପ୍ତି ଜାରି କରାଯାଇଛି। ମନ୍ଦିର ପ୍ରଶାସନର ଏଭଳି ପଦକ୍ଷେପ ଦ୍ୱାରା ବିଶ୍ୱର କୋଟିକୋଟି ଜଗନ୍ନାଥପ୍ରେମୀ ରଥଯାତ୍ରାର ସିଧା ପ୍ରସାରଣ ଦେଖିବାରୁ ବଞ୍ଚିତ ହେବେ ବୋଲି ଓଡ଼ିଶା ସଚେତନ ନାଗରିକ ଫୋରମ୍ ପକ୍ଷରୁ ଅଭିଯୋଗ କରାଯାଇଛି। ଜମି ମାଫିଆମାନେ ମାଡ଼ିବସିଥିବା ମହାପ୍ରଭୁଙ୍କର ହଜାର ହଜାର ଏକର ଜମିକୁ ଉଦ୍ଧାର କରିବାରେ ମନ୍ଦିର ପ୍ରଶାସନ ବିଫଳ ହୋଇଛି। ଏପଟେ ରଥଯାତ୍ରାର ସିଧା ପ୍ରସାରଣ ନିମନ୍ତେ ଟେଣ୍ଡର ଡାକି ପ୍ରସାରଣ ଦାୟିତ୍ୱ ଦେବାର ଯେଉଁ ମସୁଧା କରିଛନ୍ତି, ତାହା କୋଟିକୋଟି ଭକ୍ତଙ୍କ ମନରେ ଆଘାତ ଦେଇଛି। ଏହାଫଳରେ ଆସନ୍ତା ରଥଯାତ୍ରା ସମୟରେ ଟେଲିଭିଜନ ପ୍ରସାରଣ ଅଧିକାରକୁ ନେଇ ଭକ୍ତଙ୍କ ଭିତରେ ଅଶାନ୍ତି ଓ ଅସନ୍ତୋଷର ଆଶଙ୍କାକୁ ଏଡ଼ାଇ ଦିଆଯାଇ ନ ପାରେ। ଜଗନ୍ନାଥପ୍ରେମୀଙ୍କ ସ୍ବାର୍ଥ ଦୃଷ୍ଟିରୁ ରାଜ୍ୟ ସରକାର ତୁରନ୍ତ ଏହି ଟେଣ୍ଡର ପ୍ରକ୍ରିୟାକୁ ବନ୍ଦ କରିବାକୁ ନାଗରିକ ଫୋରମ୍ ଦାବି କରିଛି। ସରକାର ଯଦି ଏ ଦିଗରେ ବିହିତ ପଦକ୍ଷେପ ନ ନିଅନ୍ତି, ତା’ହେଲେ ରଥଯାତ୍ରାର ସିଧା ପ୍ରସାରଣ ଦେଖିବାର ଭକ୍ତଙ୍କ ଭିତରେ ଯେଉଁ ଆଗ୍ରହ ଓ ଉତ୍ସାହ ଥାଏ, ତାହା ମଉଳିଯିବ। ଏଭଳି ସ୍ଥିତିରେ ମନ୍ଦିର ପ୍ରଶାସନର ଏହି ବ୍ୟବସାୟିକ ମନୋବୃତ୍ତି ଓ ଅପରିଣାମଦର୍ଶୀ ନିଷ୍ପତ୍ତି ବନ୍ଦ କରିବା ପାଇଁ ସରକାର ତୁରନ୍ତ ହସ୍ତକ୍ଷେପ କରିବାକୁ ଫୋରମ୍ ପକ୍ଷରୁ ସଭାପତି ପ୍ରଦୋଷ ପଟ୍ଟନାୟକ ଓ ସମ୍ପାଦକ ଦିଲ୍ଲୀପ ହାଲି ମୁଖ୍ୟମନ୍ତ୍ରୀ ଏବଂ ଆଇନ ମନ୍ତ୍ରୀଙ୍କ ନିକଟରେ ଦାବି କରିଛନ୍ତି।
