ଓ୍ବାଶିଂଟନ,୨୬।୩(ଏପି)- କୋଭିଡ-୧୯ ଆତଙ୍କ କାରଣରୁ ଟୋକିଓ ଅଲିମ୍ପିକ୍ସକୁ ଗୋଟିଏ ବର୍ଷ ଘୁଞ୍ଚାଯାଇଛି। ତେବେ ଏଥିପାଇଁ ସାରା ବିଶ୍ୱରେ ଆଥଲେଟମାନେ ଏକ ନୂଆ ପ୍ରକାର ସମସ୍ୟାର ସମ୍ମୁଖୀନ ହୋଇଛନ୍ତି। ଅଲିମ୍ପିକ୍ସ ଗୋଟିଏ ବର୍ଷ ଘୁଞ୍ଚିଯାଇଥିବାରୁ ଏବେ ଆଥଲେଟମାନେ ସେମାନଙ୍କ ପ୍ରାୟୋଜକ ନେଇ ଅନିଶ୍ଚିତତାରେ ରହିଛନ୍ତି। ଫଳରେ ନିଜର ସ୍ବାସ୍ଥ୍ୟ ଓ ଫିଟ୍ନେସକୁ ବଜାୟ ରଖିବା ଏବେ ଆଥଲେଟଙ୍କ ପାଇଁ ଚ୍ୟାଲେଞ୍ଜ ସୃଷ୍ଟି କରିଛି। ଏହାର ସବୁଠାରୁ ବଡ଼ ଉଦାହରଣ ହେଉଛି ଆମେରିକୀୟ ଶଟ୍ପୁଟର ରିଆନ କ୍ରୋଉଜର। ଗତ ୨୦୧୬ ଅଲିମ୍ପିକ୍ସରେ ରିଆନ ଶଟ୍ପୁଟ୍ରେ ସ୍ବର୍ଣ୍ଣ ପଦକ ଜିତିଥିଲେ ଓ ଏହାକୁ ଟୋକିଓ ଅଲିମ୍ପିକ୍ସରେ ବଜାୟ ରଖିବାକୁ ଚାହୁଁଛନ୍ତି। ବର୍ତ୍ତମାନ ସେ ପ୍ରାୟୋଜକଙ୍କଠାରୁ ପାଉଥିବା ଅର୍ଥ ପାଇବା ନେଇ ଆଶଙ୍କାର ରହିଛନ୍ତି। ଅଲିମ୍ପିକ୍ସ ଗୋଟିଏ ବର୍ଷ ଘୁଞ୍ଚିଯାଇଥିବାରୁ ଏପରି ପରସ୍ଥିତି ସୃଷ୍ଟି ହୋଇଛି। ପ୍ରାୟୋଜକଙ୍କ ସହ ତାଙ୍କର ଚୁକ୍ତି ୨୦୨୦ ପର୍ଯ୍ୟନ୍ତ ରହିଛି। ଏପରିସ୍ଥଳେ ଏହି ଚୁକ୍ତି ୨୦୨୧ ପର୍ଯ୍ୟନ୍ତ ରହିବ କି ଏନେଇ ସେ ଆଶଙ୍କାରେ ରହିଛନ୍ତି। ଅର୍ଥ ମିଳିବା ବନ୍ଦ ହେଲେ ନିଜକୁ ଫିଟ୍ ରଖିବା ଓ ଅଲିମ୍ପିକ୍ସ ପାଇଁ ଟ୍ରେନିଂ ଜାରି ରଖିବା କଷ୍ଟକର ହୋଇପଡିବ ବୋଲି ରିଆନ କହିଛନ୍ତି। ପ୍ରାୟୋଜକଙ୍କଠାରୁ ମୋତେ ଅଧିକାଂଶ ଅର୍ଥ ମିଳିଥାଏ। ଜଣାଶୁଣା କ୍ରୀଡ଼ା ପୋଷାକ ଉତ୍ପାଦନକାରୀ କମ୍ପାନୀ ନାଇକ ତାଙ୍କର ପ୍ରାୟୋଜକ ରହିଆସିଛନ୍ତି। ତେବେ ଏ ସଂକ୍ରାନ୍ତରେ ନାଇକ୍ ତରଫରୁ କିଛି କୁହାଯାଇନାହିଁ। ରିଆନଙ୍କ ଭଳି ପ୍ରାୟ ସବୁ ଆଥଲେଟ ସମାନ ପ୍ରକାର ପରିସ୍ଥିତିର ସମ୍ମୁଖୀନ ହୋଇଛନ୍ତି। ତେବେ ଅଲିମ୍ପିକ୍ସ ଘୁଞ୍ଚିଯାଇଥିବାରୁ ପ୍ରାୟୋଜକମାନେ ଆଥଲେଟଙ୍କ ସମସ୍ୟା ହୃଦୟଙ୍ଗମ କରି ଆବଶ୍ରକୀୟ ପଦକ୍ଷେପ ନେବେ ବୋଲି ଆଶା କରାଯାଉଛି।
