ହାଟଡ଼ିହୀ, ୧।୮ (ଡି.ଏନ.ଏ.)-କେନ୍ଦୁଝର ଜିଲା ହାଟଡିହୀ ବ୍ଲକ ଗୁହାଳଗଢ଼ିଆ ଅଞ୍ଚଳରେ ଜଣେ ୧୫ ବର୍ଷିଆ ନାବାଳିକା ଜୁଲାଇ ୨୦ ତାରିଖ ନିଖୋଜ ହୋଇଯାଇଥିଲେ। ପରିବାର ପକ୍ଷରୁ ଏନେଇ ୨୨ ତାରିଖରେ ନନ୍ଦିପଦା ଥାନାରେ ଅଭିଯୋଗ ହୋଇଥିଲା ା ପୋଲିସ ଏକ ଅପହରଣ ମାମଲା (ନଂ ୫୭/୧୯) ରୁଜୁ କରି ତଦନ୍ତ ଆରମ୍ଭ କରିଥିଲା। କିନ୍ତୁ ୭ ଦିନ ବିତିଯାଇଥିଲେ ପୋଲିସ ନାବାଳିକାଙ୍କ କୌଣସି ପତ୍ତା ପାଇ ନ ଥିଲା। କିନ୍ତୁ ବୁଧବାର ସମ୍ପୃକ୍ତା ନାବାଳିକାଙ୍କ ବିବାହ ଆମ୍ବୋ ଅଞ୍ଚଳରେ ହେଉଥିବା ଖବରପାଇ ଆନନ୍ଦପୁର ଚାଇଲ୍ଡ ଲାଇନର କର୍ମକର୍ତ୍ତା ନନ୍ଦିପଦା ଥାନାରେ ପହଞ୍ଚି ଏ ସଂକ୍ରାନ୍ତରେ ପୋଲିସକୁ ଅବଗତ କରିଥିଲେ। ନନ୍ଦିପଦା ପୋଲିସ ଓ ଚାଇଲ୍ଡ ଲାଇନ କର୍ମକର୍ତ୍ତା ସେଠାରେ ପହଞ୍ଚିଲା ବେଳକୁ ଅପହରଣକାରୀ ନାବାଳିକାଙ୍କୁ ନେଇ ନିଜ ଘରୁ ଫେରାର ହୋଇଯାଇଥିଲେ। ଫଳରେ ବିବାହ ବନ୍ଦ ହୋଇଯାଇଥିଲା। ହେଲେ ପୋଲିସ ଓ ଚାଇଲ୍ଡ ଲାଇନ କର୍ମକର୍ତ୍ତା ଖାଲି ହାତରେ ଫେରିଥିଲେ। ନାବାଳିକାଙ୍କୁ ଉଦ୍ଧାର ପାଇଁ ଆମେ ପଦକ୍ଷେପ ନେଉଛୁ ବୋଲି ପୋଲିସ କହିଛି। ସୂଚନାଯୋଗ୍ୟ, ଗତ ୩ ମାସ ତଳେ ମଧୁରଗଢ଼ିଆ ଅଞ୍ଚଳର ଜଣେ କଲେଜ ଛାତ୍ରୀଙ୍କୁ ଅପହରଣ କରାଯାଇଥିବା ଥାନାରେ ଅଭିଯୋଗ ହୋଇଥିଲା ା ପୋଲିସ ସମ୍ପୃକ୍ତା ଛାତ୍ରୀଙ୍କୁ ଠାବ କରିବାରେ ବିଫଳ ହେବାରୁ ହାଇକୋର୍ଟରେ ଏକ ମାମଲା ରୁଜୁ ହୋଇଛି ା ହାଇକୋର୍ଟ ଅଗଷ୍ଟ ୨ ତାରିଖ ସୁଦ୍ଧା ସମ୍ପୃକ୍ତା ଛାତ୍ରୀଙ୍କୁ ଠାବ କରିବା ପାଇଁ ନିର୍ଦ୍ଦେଶ ଦେଇଥିବା ପୋଲିସ ସୂତ୍ରରୁ ଜଣାପଡିଛି ା
