ନାଉଗଁ। ,୮ା୧୨(ସ୍ବ.ପ୍ର.): ନାଉଗଁ। ବ୍ଲକ ଗଜରାଜପୁର ପଞ୍ଚାୟତ ତୁମ୍ବେଶ୍ୱରଠାରେ ପ୍ରବାହିତ ଦେବୀ ନଦୀରେ ଏକ ମେଗା ପାନୀୟ ଜଳ ପ୍ରକଳ୍ପ ନିର୍ମାଣ କରାଯାଇଛି। ଏହି ପ୍ରକଳ୍ପ ନିର୍ମାଣ ପାଇଁ ୩୬୦ କୋଟି ୬୦ ଲକ୍ଷ ଟଙ୍କା ବ୍ୟୟବରାଦ କରାଯାଇଛି। ପ୍ରକଳ୍ପ ଦ୍ୱାରା ଦେବୀ ନଦୀରୁ ମଧୁର ଜଳ ସଂଗ୍ରହ କରାଯାଇ ବାଲିକୁଦା ଓ ଏରସମା ବ୍ଲକର ଲୁଣି ପାଣି ଥିବା ବିଭିନ୍ନ ପଞ୍ଚାୟତକୁ ମଧୁର ଜଳ ଯୋଗାଇ ଦିଆଯିବ। ଏହି କାର୍ଯ୍ୟ କରିବା ପାଇଁ ଏକ ଠିକା ସଂସ୍ଥାକୁ ଦାୟିତ୍ୱ ପ୍ରଦାନ କରାଯାଇଛି। ସମ୍ପୃକ୍ତ ସଂସ୍ଥା ଏବେ ପୂର୍ତ୍ତବିଭାଗ, ଗ୍ରାମ୍ୟ ଉନ୍ନୟନ ବିଭାଗ ରାସ୍ତା ଖୋଳି ପାଇପ ବିଛାଉଛି। ହେଲେ ଠିକା ସଂସ୍ଥା ରାସ୍ତା ଖୋଳିବା ନିମନ୍ତେ ବିଭାଗୀୟ ଅନୁମତି ଆଣି ନ ଥିବାରୁ ରାସ୍ତାଖୋଳକୁ ପୂର୍ତ୍ତ ବିଭାଗ ପକ୍ଷରୁ ବିରୋଧ କରାଯାଇଛି। ଫଳରେ ରାସ୍ତା ଯେତିକି ଖୋଳାଯାଇଛି, ସେତିକିରେ ରହିଛି। ଆଉ କାର୍ଯ୍ୟ ଆଗେଇ ପାରୁନାହିଁ। ଯଦ୍ଦ୍ବାରା ଲୋକେ ଦୁର୍ଦ୍ଦଶା ଭୋଗୁଥିବା ଅଭିଯୋଗ କରିଛନ୍ତି।
ବ୍ଲକର ଅଲଣା ପଞ୍ଚାୟତ ଦେଇ ଯାଇଥିବା ବାଲିଭଉଁରୀ-ଶିଖରଘାଟ ମୁଖ୍ୟ ରାସ୍ତାରେ ଏହି ଘଟଣା ଦେଖିବାକୁ ମିଳିଛି। ଏହି ରାସ୍ତା ପୂର୍ତ୍ତ ବିଭାଗ ଅଧୀନରେ ରହିଛି। ଏହା ମଧ୍ୟ ବ୍ଲକର ମୁଖ୍ୟ ରାସ୍ତା। ଅଲଣାହାଟ ନିକଟରେ ଠିକା ସଂସ୍ଥା ତରଫରୁ ରାସ୍ତାର ଉଭୟ ପାର୍ଶ୍ୱ ଦୀର୍ଘ ୧୫ ଦିନ ହେବ ଖୋଳାଯାଇଛି। ସଂସ୍ଥା ପକ୍ଷରୁ ରାସ୍ତା ଖୋଳାଯିବା ସମୟରେ ପୂର୍ତ୍ତ ବିଭାଗର ଅଧିକାରୀମାନେ ଆସି ରାସ୍ତା ଖୋଳା ବନ୍ଦ କରିିଛନ୍ତି। ଅପରପକ୍ଷେ ଅଲଣାହାଟ ଉଚ୍ଚ ବିଦ୍ୟାଳୟ ସମ୍ମୁଖରେ ରାସ୍ତା ଖୋଳା ହୋଇଥିବାରୁ ପିଲା ବିଦ୍ୟାଳୟକୁ ଯିବାକୁ ଅସୁବିଧାରେ ସମ୍ମୁଖୀନ ହେଉଛନ୍ତି। ନିକଟସ୍ଥ କଳିଙ୍ଗ ଗ୍ରାମ୍ୟ ବ୍ୟାଙ୍କକୁ ହିତାଧିକାରୀ ଯାଇପାରୁନାହାନ୍ତି। ରାସ୍ତାର ଉଭୟ ପାର୍ଶ୍ୱରେ ମାଟି ଜମିବା ଦ୍ୱାରା ରାସ୍ତା ଅଣଓସାରିଆ ହୋଇପଡ଼ିଛି। ସେହିପରି ପୂର୍ତ୍ତବିଭାଗ ଦ୍ୱାରା ରାସ୍ତା କାର୍ଯ୍ୟ ଚାଲୁଥିବାରୁ ଏବେ ରାସ୍ତାରେ ଡଷ୍ଟ ପକାଯାଉଛି। ଫଳରେ ପ୍ରତ୍ୟେହ ଯାତ୍ରୀବାହୀ, ମାଲବାହି ଗାଡି ଯିବା ଅସିବାଦ୍ୱାରା ରାସ୍ଥାରୁ ଡଷ୍ଟ ଉଡୁଛି। ତେଣୁ ଶୀଘ୍ର ଖୋଳା ଯାଇଥିବା ସ୍ଥାନକୁ ପୂରଣ କରିବା ପାଇଁ ଜନସାଧରାଣ ପ୍ରଶାସନ ନିକଟରେ ଦାବି କରିଛନ୍ତି।
ଏ ସମ୍ପର୍କରେ ଗ୍ରାମ୍ୟ ପାନୀୟଜଳ ପରିମଳ ବିଭାଗ ଯନ୍ତ୍ରୀ ପ୍ରଦୀପ୍ତ ବରାଳଙ୍କୁ ପଚାରିବାରେ ସେ କହିଥିଲେ, ୧ ଫୁଟ ଖୋଳି ପାଇପ ଯିବାର ନିୟମ ରହିଥିବାରୁ ସଂସ୍ଥା ପକ୍ଷରୁ ଖୋଳା ଯାଉଥିଲା। କିନ୍ତୁ ପୂର୍ତ୍ତ ବିଭାଗର ଅଧିକାରୀମାନେ ଆସି ତାଙ୍କ ଅଧୀନରେ ଥିବା ରାସ୍ତାକୁ ଖୋଳିବା ପାଇଁ ମନା କରି ଦେଇଥିବାରୁ କାମ ବନ୍ଦ ରହିଛି। ଆମେ ଆମ ବିଭାଗର ନିର୍ବାହୀ ଯନ୍ତ୍ରୀଙ୍କ ସହ କଥା ହେଇଛୁ। ସେ ପୂର୍ତ୍ତ ବିଭାଗ ସହ ଆଲୋଚନା କରିବା ପରେ କାର୍ଯ୍ୟ ଆରମ୍ଭ ହେବ ବୋଲି କହିଥିଲେ। ପୂର୍ତ୍ତ ବିଭାଗ ନିର୍ବାହୀ ଯନ୍ତ୍ରୀ ନିମାଇଁ ଦାସଙ୍କୁ ପଚାରିବାରେ ଏବିଷୟରେ ମୁଁ ଜାଣି ନାହିଁ। କ’ଣ ହୋଇଛି ଏସଡିଓଙ୍କୁ ପଚାରି ବିଝୁଲା ପରେ ଯାହା ପଦକ୍ଷେପ ଗ୍ରହଣ କରାଯିବ ବୋଲି କହିଥିଲେ। ଏବେ ଦେଖିବାକୁ ଅପେକ୍ଷା ଆଗକୁ ଏଦିଗରେ କ’ଣ ପଦକ୍ଷେପ ଗ୍ରହଣ କରାଯାଉଛି।
