ବ୍ରହ୍ମପୁର ଅଫିସ୍,୧୧ା୬-ପୁରୁଣା ବ୍ରହ୍ମପୁର ତଥା କୁଠାରୀ ମନ୍ଦିର ସାହିରେ ଥିବା କଂସାରି ଶାଳଗୁଡ଼ିକୁ ନେଇ ଏବେ ଅଞ୍ଚଳବାସୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି । ଏନେଇ ବହୁ ଅଞ୍ଚଳବାସୀ ସୋମବାର ଉପଜିଲାପାଳ ଦିଗନ୍ତ କୁମାର ରାଉତରାୟଙ୍କ ଦେଖା କରିଛନ୍ତି। ଅଞ୍ଚଳବାସୀଙ୍କ ଅଭିଯୋଗ ହେଲା, ସେହି ସାହିରେ କଂସାରୀ ସମ୍ପ୍ରଦାୟର ଲୋକେ ବାସ କରୁଛନ୍ତି।
ସେମାନେ ନିଜ ଘରେ ହିଁ ପିତଳରୁ ବାସନ କୁସନ ପ୍ରସ୍ତୁତ କରୁଛନ୍ତି। ତେବେ ପିତଳ କାମ ବେଳେ ପ୍ରବଳ ଶବ୍ଦ ହେଉଛି। ସକାଳରୁ ରାତି ପର୍ଯ୍ୟନ୍ତ ପ୍ରଚଣ୍ଡ ଶବ୍ଦରେ ନିକଟରେ ବାସ କରୁଥିବା ଲୋକେ ଅସୁବିଧା ଭୋଗୁଛନ୍ତି। ସାହିରେ ରହିବା କଷ୍ଟକର ହୋଇପଡ଼ିଲାଣି। ପିଲାମାନେ ଘରେ ପଢ଼ି ପାରୁନାହାନ୍ତି। ରୋଗୀମାନେ ଶୋଇ ପାରୁନାହାନ୍ତି।
ଦିନ ତମାମ୍ ଶବ୍ଦ ହେଉଛି।
କଂସାରୀମାନଙ୍କୁ ଏନେଇ କହିଲେ, ସେମାନେ ଓଲଟା ଯୁକ୍ତି କରୁଛନ୍ତି। ଅସଭ୍ୟ ଭାଷାରେ ଗାଳି ଗୁଲଜ କରୁଛନ୍ତି। ଗତ ମାସରେ ମଧ୍ୟ ସାହିବାସୀ ଏହି ସମସ୍ୟା ସମ୍ପର୍କରେ ଉପଜିଲାପାଳଙ୍କ ଦୃଷ୍ଟି ଆକର୍ଷଣ କରିଥିଲେ। ଶବ୍ଦ ପ୍ରଦୁଷଣ ରୋକିବା ପାଇଁ ଉପଜିଲାପାଳ ନିର୍ଦ୍ଦେଶ ଦେଇଥିଲେ । ବଡ଼ବଜାର ଥାନା ପୋଲିସ କଂସାରୀମାନଙ୍କୁ ତାଗିଦ୍ କରିଥିଲେ। ସରକାରୀ ଗାଇଡ୍ଲାଇନ୍ ଅନୁଯାୟୀ ପ୍ରଦୁଷଣ ନିୟନ୍ତ୍ରଣ ବୋର୍ଡ଼ଠାରୁ ଅନୁମତି ଆଣିବାକୁ ନିର୍ଦ୍ଦେଶ ଦିଆଯାଇଥିଲା। ଏଣୁ କଂସାରୀ ଶାଳଗୁଡ଼ିକ କିଛି ଦିନ ପାଇଁ ବନ୍ଦ ହୋଇଯାଇଥିଲା । କିନ୍ତୁ ଏବେ ପୁଣି ଥରେ ଶାଳ ଆରମ୍ଭ ହୋଇଯାଇଛି।
ତୁରନ୍ତ କଂସାରୀ ଶାଳଗୁଡ଼ିକ ବନ୍ଦ କରିବା ପାଇଁ ଅଞ୍ଚଳବାସୀଙ୍କ ତରଫରୁ ହରିଚରଣ ପାଢୀ, ସୀମାଞ୍ଚଳ ବେହେରା, ସୁରେନ୍ଦ୍ର ସେଠୀ, ବିଜୟ ଲକ୍ଷ୍ମୀ ଦାସ, ଏନ୍. ସୁଧାକର, ସୁରେନ୍ଦ୍ର ସେଠୀ, କୁନି ସାହୁ ଏବଂ ଦୀନବନ୍ଧୁ ସୁବୁଦ୍ଧି ପ୍ରମୁଖ ଉପଜିଲାପାଳଙ୍କ ନିକଟରେ ଅଭିଯୋଗ କରିଛନ୍ତି।
