ନୂଆଦିଲ୍ଲୀ,୮।୩: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରବିବାର ଅନ୍ତର୍ଜାତୀୟ ମହିଳା ଦିବସ ଅବସରରେ ତାଙ୍କ ଟୁଇଟର ଆକାଉଣ୍ଟକୁ ୭ ଜଣ ମହିଳାଙ୍କୁ ହସ୍ତାନ୍ତର କରିଛନ୍ତି। ଏମାନେ ଏହି ଆକାଉଣ୍ଟ ମାଧ୍ୟମରେ ସେମାନଙ୍କ ଜୀବନଯାତ୍ରାର କଥା ଦିନ ତମାମ ଶେୟାର କରିବେ ବୋଲି ମୋଦି କହିଛନ୍ତି। ଏହି କ୍ରମରେ ମୋଦିଙ୍କ ଟୁଇଟର ଆକାଉଣ୍ଟରେ ପ୍ରଥମେ ସ୍ନେହା ମୋହନ ଦାସ ଟୁଇଟ୍ କରିଥିବା ଦେଖାଯାଇଛି। ସ୍ନେହା ଏକ ଭିଡିଓ ଟୁଇଟ୍ କରି ଲେଖିଛନ୍ତି, ସେ ଏକ ଫୁଡ ବ୍ୟାଙ୍କର ସଂସ୍ଥାପିକା। ଦେଶରେ କେହି ଭୋକିଲା ନ ରହୁ ଭାବି ସେ ଏହି ଫୁଡ୍ ବ୍ୟାଙ୍କ ଆରମ୍ଭ କରିବା କଥା ଚିନ୍ତା କରିଥିଲେ। ତାଙ୍କର ଏହି ପ୍ରୟାସ ଫଳରେ ଏବେ ଦେଶରେ ପ୍ରାୟ ୧୮ଟି ଫୁଡ୍ ବ୍ୟାଙ୍କ ପ୍ରତିଷ୍ଠା ହୋଇପାରିଥିବା ସେ କୁହନ୍ତି। ତେବେ ସ୍ନେହାଙ୍କ ମା’ ଯେତେବେଳେ ତାଙ୍କ ଜେଜେଙ୍କ ଜନ୍ମଦିନରେ ଛୋଟ ଛୋଟ ପିଲାମାନଙ୍କୁ ଡାକି ଖାଇବାକୁ ଦିଅନ୍ତି, ତାହା ସେତେବେଳେ ତାଙ୍କ ନଜରକୁ ଆସିଥିଲା। ମାଆଙ୍କ କାମକୁ ଆଗକୁ ବଢାଇବାକୁ ଚିନ୍ତା କରି ସେ ଏହି ଫୁଡ୍ ବ୍ୟାଙ୍କ ଆରମ୍ଭ କରିଥିବା କୁହନ୍ତି। ଏଥିପାଇଁ କାମ କରୁଥିବା ସ୍ବେଚ୍ଛାସେବୀମାନେ ଲୋକଙ୍କଠାରୁ କଞ୍ଚା ପରିବା ସଂଗ୍ରହ କରି ଏହାକୁ ରୋଷେଇ କରି ଭୋକିଲା ଲୋକଙ୍କୁ ଖାଇବାକୁ ଦିଅନ୍ତି ବୋଲି ସେ କୁହନ୍ତି। ଏତଦ୍ ବ୍ୟତୀତ ଯେଉଁମାନଙ୍କର ଅଧିକ ଖାଦ୍ୟ ବଳକା ରହିଯାଇଥାଏ, ସେମାନେ ମଧ୍ୟ ଫୁଡ୍ ବ୍ୟାଙ୍କକୁ ଖାଦ୍ୟ ଦାନ କରି ଦେଇଥାଆନ୍ତି। ଏବେ ଦେଶ ବାହାରେ ଅର୍ଥାତ୍ ଦକ୍ଷିଣ ଆଫ୍ରିକାରେ ମଧ୍ୟ ଏମିତି ଏକ ଫୁଡ୍ ବ୍ୟାଙ୍କ ଖୋଲିଥିବା କୁହନ୍ତି ସ୍ନେହା।
